Joseph@外地遊記: 201510 南法秋遊第十三日

2015/11/01

201510 南法秋遊第十三日 - Paris (巴黎)

對上一次黎巴黎已經係十幾年前，今日除左會再遊巴黎著名景點，仲會去上次冇去過既巴黎歌劇院 (Palais Garnier)。今早 9:30 酒店旁既 Paris de Lyon 車站坐 RER A 火車去 Auber 車站，然後係附近既 Starbucks 食早餐，食完就行去巴黎歌劇院 (Opéra national de Paris)。

巴黎歌劇院

星期日百貨公司唔開門

冇咩人既巴黎街頭

早餐

巴黎歌劇院係一座新巴洛克風格既建築，建於 1862 年。入去參觀，每人 €11。巴黎歌劇院內部裝飾古典華麗，可以見到不論牆身、天花、樓梯、燈飾，甚至每條柱上都佈滿不同既雕刻藝術品。入到大休息廳，整個地方以金色為主，金碧輝煌，廳內更掛滿閃閃生輝既水晶燈，表現出奢華耀目既豪華感。去到歌劇院中間既大劇場，劇場可容納差不多二千觀眾，以當年黎講，係非常大既劇場。劇場內既裝潢跟出面一樣，非常華麗，天花既畫、吊燈，精雕細琢、一絲不苟。巴黎歌劇院真係一個好值得一到既地方。

巴黎歌劇院

燈都係雕刻品

巴黎歌劇院中間既樓梯

四圍都有藝術品

金碧輝煌既休息廳

休息廳既天花

兩排吊燈

劇場

劇場既天花

睇完歌劇院，我地坐地鐵 (Metro) 去到 Saint-Germain-des-Pres 站，一間叫 Huîtrerie Régis 既小店食午餐。呢間小店專食生蠔，佢有一份份套餐，我地叫左兩份 €30 既 la Degustation 套餐，包12 隻 Fines de Claires 生蠔，一杯白酒及一杯咖啡，另外仲叫左兩份 €39.5 既 la Cabane 套餐，包 6 隻 Fines de Claires 生蠔、6 隻 Speciales de Claires 生蠔及 6 隻蝦。野食黎既時間，48 隻生蠔加 12 隻蝦，全部放晒係一隻大銀碟上，好震撼！係法國食生蠔真係冇得輸，又平、又新鮮！呢一餐好滿足！

Huîtrerie Régis 小店

48 隻生蠔加 12 隻蝦

配埋白酒

食飽飽，天氣又溫暖，我地慢慢係巴黎街頭散步，我地沿塞納河行去西堤島既聖母院 (Cathédrale Notre-Dame de Paris)，再行去羅浮宮 (Louvre-Rivoli)。聖母院同羅浮宮依然係咁多人，我地十幾年前入過去睇，所以今次只係門口影下相就算啦！

塞納河畔

塞納河

聖母院

羅浮宮

日落巴黎

由西堤島 (Cite) 坐地鐵去香榭麗舍大道 (Avenue des Champs - Elysees)，行去影下黃昏下既凱旋門 (Arc de Triomphe)，跟住差唔多 7:00 食下午茶。我地既下午茶係去出名食馬卡龍 (Macarons) 既 Laduree。Laduree 開業於 1862 年，有 153 年歷史，係法國其中一間甜品名店。我地去到香榭麗舍大道既分店，樓高幾層，裝修典雅。我地叫左八件唔同口味既馬卡龍，再叫左茶同咖啡。

香榭麗舍大道

凱旋門

Laduree

Laduree 馬卡龍

下午茶時間

食完下午茶都已經七點半有多，又係晚飯時間啦！不過剛食完下午茶，更係冇胃口即刻食晚飯。我地先坐地鐵去艾菲爾鐵塔 (Eiffel Tower) 睇下夜景，大約 9:00 就坐地鐵去 Grand Boulevards 一間叫 Bouillon Chartier 既餐廳食晚餐。

艾菲爾鐵塔

去到餐廳門口，咁夜都仲要排隊，一定唔會太差。Bouillon Chartier 已有百年歷史，前身係工人食堂，所以食物價格非常便宜，但質數又唔會因價格而變差，網上非常多人推薦黎食飯。入到餐廳，地方非常之大，雖然食平野，但環境都唔錯，係比較嘈少少。餐廳餐牌全法文，好彩我之前上網做定野，已經一早翻譯左做英文。呢度一碗湯 €1，真係冇睇錯，係一蚊，仲平過係香港餐廳飲湯。一打焗蝸牛只係 €13.2，因為太平，又好食，我地食左兩打。另外又叫左鴨肶同漢堡扒，四個人仲叫左支酒，一共只係食左 €81.8。真係又唔差，又超抵食既一餐。