Joseph@外地遊記: 201701 越南峴港會安第二日 - 巴拿山 (Ba Na Hill)，峴港 (Da Nang)

係出發前，我一早用電郵跟酒店預定左一架五人房車今朝去巴拿山，車費係 VND700000，即係 HK$250。係酒店先食左早餐，早餐有四款選擇，即叫即煮。分別有越南麵、奄列、煎蛋火腿麵包或法包。

早餐

坐呢架車去 Ba Na Hill

9:00 由酒店上車出發去巴拿山，司機途中停車帶我地去一間街邊舖頭買入場票，每位 VND600000，HK$215，其實我覺得以越南生活水平，巴拿山入場費係超貴。我地比左入場費，收到一張幾舊既入場卡，我地然後估下點解司機叔叔會帶我地去呢間舖買呢，佢會唔會昆我地呢？去到巴拿山，售票處既價錢跟叔叔間舖既價錢一樣，我地估叔叔間舖買既係月票之類既票，然後就收我地錢，比我地用，用完就要比返張卡佢，佢第二日就再賣比其他人用。咁樣佢就可以賺到錢啦！

BaNa Hills

Ba Na Hill 入口，有 d 似以前荔園個宋城

巴拿山係位於峴港郊外一座山上既度假區，山上建築物建於法國統治時期 (1919年)，所以全是法國式建築，於山上有如去到法國小山城。由山下到山上，要乘坐 2013 年開幕的纜車，巴拿山纜車好巴閉架，係健力士紀錄中全世界最長既不停站單纜纜車，全長有 5.801 公里，並且係落差最高既纜車，有 1.291 公里。我地去到山下既纜車站，天氣灰檬檬，不過好彩冇落雨，但係坐纜車上到半山，外面超大霧，白色一片，咩都睇唔到，跟住再上高少少，仲開始落雨。呢段纜車大約坐 20 分鐘，跟住就去到 Ba Na Station。據說係呢度可以係高處欣賞峴港既景色，不過今日大霧到連三米前既人都見唔到，戶外又凍又落雨。

上左小小山已經開始有霧

大霧到咩都睇唔到

山上面仍然好大霧

係 Ba Na Station 可以再比錢坐好似香港上山頂既纜車去一個花園及酒窖。個花園應該都幾靚，不過又係太大霧，睇唔到。係花園有個位可以出去睇一座白色 27 米高既大佛，因為個大佛係白色，我地行到出去，望黎望去都見唔到。後來要好留心好留心先係霧中見到個大佛既影，同埋我地先發現原來一直企係大佛旁邊，真係大霧到好誇張！

轉另一架纜車

又雨又霧,搞咩呀

酒窖門口

酒窖內

花園

人地個花園係咁架，我地咩都睇唔到

個佛，連樣都睇唔到

由 Ba Na Station 再坐一短途纜車，大約五分鐘車程，就去到法國小山城 Morin Station。一出車站，應該會有一個法式噴水池，後面有個小型哥德式教堂，四圍都係法國建築物，不過上到黎，濃霧係去到就黎伸手不見五指既地步，四圍只有白色，咩都見唔到，個教堂係邊個方向都分唔到。好彩呢度都有個三層樓高既室內遊樂場，我地景又睇唔到，相又影唔到，只好去遊樂場玩下機動遊戲打發時間。成個遊樂場最好玩係碰碰車，跟住仲有好多免費任玩既「街機」電子遊戲。而佢既 3D，4D遊戲及鬼屋就好雞，我屋企個 PlayStation VR 真實過佢好多！

Morin Station

一出車站，咩地方黎，向邊行好?

本來應該係咁樣，後面既建築物，我地一個都睇唔到

行近左，終於見到個教堂

去左遊樂場玩

免費任打機

午餐我地係濃霧中亂咁行，入左一間酒店既餐廳食左個生牛肉河粉，同埋越式春卷。平時都好鍾意食生牛肉河粉，今日終於可以真真正正係越南食到啦！呢度個粉真係好好味，個湯超甜！係份量比較少！食完野，出返戶外，據說呢度有個戶外過山車，又係搵唔到係邊個方向。算啦！都係落山返去峴港市啦！

午餐

頂唔順，都係走啦！

我地返到酒店，問下酒店附近有冇地方飲咖啡。原來係正酒店後面有一間咖啡館叫 Cloud Garden，咖啡館都好靚，有個大魚池。我地入到去是但搵張檯坐，睇餐牌時，總係覺有股怪味不斷湧過黎。四圍嗅下，發現原來張檯布好鬼臭，我估呢間野既檯布係冇洗過既。我地即刻搬去另一張冇檯布既檯。越南咖啡出晒名，黎到梗要試下。我地叫左越南滴漏咖啡，原來凍既係滴好先比你，熱既先係係你面前慢慢滴。一杯越南滴漏咖啡 VND25000，HK$10 都唔駛，超平。好平時飲開 Espresso，喜歡濃既咖啡，今次係第一次試越南咖啡，原來越南咖啡都係好濃，我覺得好好！

Cloud Garden 咖啡館

越南滴漏咖啡

好多人都話係越南食法國菜又抵又好味，我搵過峴港既法國菜唔多，今晚我就訂左一間叫 Le Rendez Vous。6:30 左右，我地經酒店幫我地叫的士去 Le Rendez Vous。開頭我估會好多人幫襯，成晚得個四檯客。法國菜來來去去都係食鵝肝、牛扒、沙律、甜品，要睇就睇下食物質數、烹調技巧及擺盤既功力。食物質數、烹調技巧我覺得係合格既，不過欠缺驚喜，反而食物擺係碟上擺得好靚，個前菜直情好似一幅畫咁。呢餐我地開左一支紅酒，四個人 VND 3,725,000，約 HK$1,420，係越南算係好高級同昂貴。