Joseph@外地遊記: 201701 越南峴港會安第三日 - 峴港 (Da Nang)，會安 (Hoi An)

今日下午會轉去會安，早上有半日時間黎個峴港市內觀光。我地係酒店食完早餐，9:30 出發去峴港沙灘。峴港沙灘被稱為全世界十大漂亮沙灘之一，我地去到見到個沙灘真係好長，不過因為天氣唔好，冇咩人，個天、個海同沙灘全都係灰灰暗暗，唔靚囉！其實係沙灘，只要藍天白雲，好多人係度曬太陽、玩戶外活動、仲要有幾個比堅尼！咁已經係一個好靚既沙灘。

係沙灘坐的士去市中心既峴港占婆博物館 (Cham Museum)。呢個博物館係峴港一個重要既博物館，內裡展出好多當地占婆時期既文物。你唔好似為重要就有羅浮宮既級數，呢度簡陋好多。第一，冇冷氣，成個博物館既窗係開晒既，佢又唔會怕空氣、濕氣影響到展品。第二，好細，呢度係得一層，好似一間普通既平房。第三，多數展品係唔會有射燈照住比你睇，係靠自然光。所以黎參觀之前，要調節好心態，唔好有太大期望。

占婆博物館入口

港占婆博物館行去北面，就會去到峴港大教堂及 Han Market。峴港大教堂係一座粉紅色既教堂，都幾靚。而 Han Market 就係一個室內街市，有熟食、札肉、蔬果及衫賣，我地入左去買左札肉拎返香港。不過去到街市入面，我見到有老鼠係賣零食既舖頭出現，去到越南既街市，都預左有蛇虫鼠蟻！

峴港大教堂

Han Market

Han Market 內

Han Market 的熟食檔

係買札肉既舖頭，我地問老闆娘附近有邊間食越南牛肉河好食，佢介紹左我地去兩三個街口左右，一個位於轉角位叫 Pho Bac Hai 既大排檔式小店。，我地一人食左一碗牛肉河同叫左個炒米粉，都只係 170000 (約 HK$60)，真係好平。碗牛肉河大大碗，好多芽菜及其他香葉，不過湯底比較咸，冇係 Ba Na Hill 山上個碗咁清甜。

食越南牛河

湯底

越南牛河

炒粉

係越南牛肉河店對面，有間地道越南咖啡店，點為之地道越南咖啡店？係越南既咖啡店會好似歐洲咖啡店咁，係門口放晒檯椅比人飲咖啡，不過越南既檯椅就簡陋好多，只係一張好細好矮既木檯，旁邊隨便放幾張木矮凳，坐係度好似大人去到小學既課室，坐小學生既凳。我地見有時間，又想試下好似當地人咁飲咖啡，所以就坐底叫左三杯越南滴漏咖啡，每杯都只係港紙幾蚊，好平！

街邊飲咖啡

越南咖啡

我地 2:00 返酒店，坐預早跟酒店訂左既車去會安，呢程車係 VND 412,000，即約 HK$145，車程約一個鐘。我地先直接車去會安住既酒店 Lasenta Boutique Hotel Hoian，呢間酒店好好多，成個建築物已經係帶歐陸色彩，酒店內中庭有個噴水池，一入去個感覺已經好良好。酒店有不同房型，我地訂左 Deluxe Double with Rice Field View，係一間有 38 平方米既雙人房，房內有分開既浴室及洗手間，浴室有個大浴缸及大花灑。房中間有張七呎大雙人床，房間窗外係一片無敵稻田景，比禽晚峴港既酒店好好多。係酒店既頂層仲有個無邊界泳池，住客可以對住青翠既稻田游水，可惜今日天氣唔好，又比較涼，所以游唔到水。

Lasenta Boutique Hotel Hoian

酒店內中庭

我間房

泳池

酒店有提供免費單車比住客玩，我地先去左酒店對面稻田影下相，然後嘗試踩去古城方向。一出到大街，情況好惡劣，人、車及電單車爭路，我踩住架單車係馬路邊行，好危險。我地踩左兩個路口，頂唔順，就踩返轉頭返酒店。

酒店對住既稻田

見有些少肚餓，係酒店旁有間咖啡室，我地入去食少少野。我係個餐牌見到佢有會安特色美食，高樓麵 (Cao Lao)，即刻叫碗試下。高樓麵係一款乾身既撈麵，裡面有豬肉、香葉、蔬菜。醬汁甜甜地，好好食。

酒店旁咖啡室

高樓麵

酒店離會安古城有一段距離，所以酒店有免費專車接大家去到古城既邊皮，點解只去到邊皮？因為古城內係唔可以行車既。由古城既邊皮行去古城中心，要十至十五分鐘。會安古城我覺得好特別，成個古城都係古舊既一層或兩層建築物，好多都改成有特色既新款型格小店、餐廳及咖啡店。古城既街道掛滿唔同顏色既燈籠，晚上亮起燈後，好有特色，真係估唔越南都有咁型既地方！

會安古城

有得買燈籠

河邊

我地今晚訂左一間位於古城河邊既餐廳，叫 Mango Mango。餐廳主打係新派既越南菜，網上評價都唔差。我地叫左春卷、帶子、魚，其實我都唔係好記得食左咩，不過印象中，野食係幾好食，最印象深刻反而係熱情果 Cream Brelee，因為未食過帶酸既 Bream Brelee，原來又夾到喎。食完野，客人仲可以去露台，一路飲野，一路欣賞會安古城河邊既景色。