今早落超大雨，我地一早係酒店食左早餐，然後參加 8:30 出發既越南烹飪班。我地參加左一個叫
Thuan Tinh Cooking Tour 既半日班，每位 US$34，包酒店接送。
 |
| 酒店大堂等車 |
佢架專車接送就係一架的士，首先車我地去會安古城既街市買餸，買餸前烹飪導師每人派一件便利雨衣，但因為太大雨，有雨衣都冇咩用，成腳連鞋都濕晒。本來去當地街市買餸係好好玩既體驗，導師都不斷介紹當地食材，但我只係想快快買完，跟住去返室內地方避下雨。
 |
| 大雨中既市場 |
係街市被人、被電單車、被水氹，好狼狽，搞到半身濕晒。買完野，我地就係街市旁既河邊上船出發去煮野食。由古城去煮野食既地方都幾轉折，先坐可以容納十幾人既電船，跟住上岸轉小型巴士，然後去到另一個河邊就轉坐一條小舟舟。
 |
| 先坐呢架船 |
 |
| 轉坐小舟舟 |
煮野食既地方係一片綠油油既樹林中間，如果好天，環境一定唔錯。我地先抹一抹濕晒既身，飲杯果茶，跟住開始煮野。越南食物好多都以米為主，導師先比我地試下用石磨整米漿，跟住佢話會用米漿整米紙，不過我地今日用既米紙會係佢地預先整好既。
 |
| 整米漿 |
越南菜最出名梗係生牛肉湯粉，而湯粉既精髓就係個湯底。因煮湯底需時，所以我地第一樣整既就係呢個湯底。我地切好及放好晒所需材料，就由得佢慢火慢慢煮。
 |
| 煲湯底 |
跟住我地整左越南米紙春卷、米紙煎餅及牛肉米粉沙律。可能導師收得我地錢，買既食材，用既調味料都會好好，所以我整呢幾道菜都好好食。又可能係因為我既烹調技術好掛！
 |
| 越南米紙春卷 |
 |
| 米紙煎餅 |
 |
| 牛肉米粉沙律 |
煮完上面幾道菜後，一開始煮既湯底亦大概完成。最後我地整埋同食埋呢個勁好食既生牛肉湯粉，就完左今早既越南烹飪班。除左因為今日太大雨，全身濕晒，煮越南菜係好玩同好食既。
 |
| 整生牛肉湯粉 |
離開時我有少少擔心又要大雨中坐小舟舟、坐車、坐電船、坐的士返酒店。原來烹飪中心係有車路，我地全部人上左一架客車，直接送我地返去酒店。今早咁轉折，完全係因為想我地體驗下河上泛舟。唉！今日落咁大雨就唔好搞咁多花臣啦！
返到酒店，我地上左去頂樓既咖啡室飲下咖啡，順便去泳池既更衣室洗下對焗左半日雨水既臭腳。大約 3:00pm ，我地就坐預先跟酒店訂左既車去機場，車費係 VND 616000 (HK$215)，車程一個鐘多少少，然後就坐 6:00 飛機返香港。
 |
| 酒店咖啡室 |
 |
| 天台泳池 |
 |
| 包車去機場 |
 |
| 機場唯一既餐廳 |
 |
| 上機前再食生牛肉湯河 |
No comments:
Post a Comment