今次呢個首爾快閃遊，真係晚機去早機返，一放工就即出機場，一返香港返屋企放低行李，幾個鐘之後就返工。我地係 14/6 坐夜晚 8:50 既機去首爾，到達已經係零晨既 2:40。過左海關，係櫃員機提左韓圜已經係 3:15 左右。我地本來打算坐通宵巴士出首爾火車站，再轉的士去龍山站既汗蒸幕。 2:55 既巴士又走左，下一班要去到 3:45，車程差唔多一個鐘，所以預算去到汗蒸幕要 5:00。當我地去到巴士站，有個司機問我地係唔係出首爾，佢話佢架大車可以接我地一共七個人加行李，而價錢跟巴士一樣，只係另加路費，一共 KWD 112,000。仲要直接車我地去到龍山站。由機場去到龍山，只係要 40 分鐘左右，4:00 就到啦！比巴士預算到達時間快左一個鐘，太好啦！
 |
| 零晨時無人既仁川國際機場 |
 |
| 坐呢架車入市區 |
 |
| 入市區時, 高速公路都冇咩車 |
龍山既
Dragon Hill Spa 係好有名既汗蒸幕，我地打算入去沖個涼，然後去休息室瞓幾個鐘，跟住早上 10:30 就去東大門既旅館 check-in。Dragon Hill Spa 入場費 KWD 15,000 一個人，呢個汗蒸幕係自己獨立既建築物，有七層樓高。一入到去，先辦理入場手續，每一個人會有一條電子手帶，入場後所有消費就以呢條手帶記賬。過左入閘機，先脫鞋，然後放到一排排既鞋櫃鎖好。跟住就分開男及女去各自既大浴場沖涼。
 |
| 第二朝早影既 Dragon Hill Spa 門口 |
 |
| 入口 |
 |
| 先放鞋入 Locker |
經過上次去汗蒸幕有毛番皂既經驗，我知道韓國汗蒸幕係冇供應沖涼液、洗頭水、牙膏及牙刷，所以今次我有備而黎！係花灑區沖完涼，跟住去熱水池浸左一陣，就離開。同上次去汗蒸幕既經驗一樣，韓國人真係好豪邁，坦蕩蕩，條條揈！
返到去休息區，四圍已經有不少人隨地瞓，因為我上次瞓硬地板頂唔順，所以四圍搵下有冇軟墊。後來發現有一間男士專用休息區及一間女士專用休息區，裡面就有一排排軟墊比人瞓。咁我就跟幾位女士分開，約好明早係大眾休息區再會合。入到男士專用休息區，我是但搵個位就瞓。比個 Tips 大家，軟墊係 PVC 質地，你手臂、大脾既肉一出汗就會比 PVC 焗住好唔舒服，所以大家可以去大浴場拎條乾毛巾黎墊下。
 |
| 休息區 |
 |
| 其中一個汗蒸幕 |
 |
| 汗蒸幕內 |
 |
| 另一款汗蒸幕 |
始終唔係太習慣係其他人既鼻鼾聲伴奏下瞓，所以不斷瞓下醒下，唔係瞓得太好。9:00 左右起身，梳洗完就去大眾休息區集合。去到汗蒸幕，好多人都話要試下米水及蛋，我地叫左黎試，米水比較甜，但可接受，但係蛋就太硬，好似台灣既鐵蛋咁，我唔鍾意！跟上次東大門既 SPAREX 汗蒸幕比較，雖然 Dragon Hill Spa 大好多，但比較殘舊，我都係比較喜歡東大門既 SPAREX！
係首爾呢幾日，我地會住係東大門一間叫 Hostel Vanilla 1 Dongdaemun 既小旅館。旅館位於東大門既興仁之門附近橫街內，離地鐵站好近，算係幾方便。一入去旅館就係一個煮食區，旅館提供免費咖啡、茶或果汁任飲。而房間唔係太大，冇衣櫃，冇檯，所以夠位開行李箱。廁所就冇淋浴既地方，沖涼會成個廁所濕晒，連馬桶都濕埋。但最大問題係隔音勁差，尤其是夜晚，連門外既行路聲都聽到，搞到大聲少少講野都唔敢，好似去左圖書館咁。
 |
| Hostel Vanilla 1 Dongdaemun 小旅館 |
 |
| 旅館既公共地方 |
 |
| 我間房 |
 |
| 床尾既地方 |
我地係旅館放低行李，跟住就坐地鐵去位於江南既
Mingles 餐廳食午餐。Mingles 係一間新派韓菜餐廳，於 2016 及 2017 年既亞洲五十大餐廳中，排名第十五，韓國排名第一，於今年更奪得米之蓮一星。我地訂左 12:30 ，餐廳為我地預備左一張位於角落既檯，私隱度比較好，一陣我地狂影相都唔怕比其他食客眼超超！先講講個環境，Mingles 唔似其他米之蓮走高級路線，檯上冇檯布，比較 casual 及自在。
 |
| Mingles 餐廳 |
 |
| 餐廳內 |
我地三個人都叫左個 KWD85,000 既 Lunch Tasting Course。前菜有放左不同香料既魚生及一個類似奶凍既蛋，魚生既柚子醬混合得恰到好處，唔會搶左魚生既味道。跟住有韓牛他他及黃金瓜配鮑魚。黃金瓜配鮑魚真係要講一講，黃金瓜原來係韓國夏天當造既水果，大小既雪梨差唔多，味道似蜜瓜。呢道菜佢將黃金瓜切片，鮑魚煮熟亦切片，一層黃金瓜一層鮑魚疊既黎，中間再加少少其他香草及醬料。入口鮑魚香再配埋黃金瓜既清甜，好夾，好驚喜。
跟住再有鱔、炸魚及一個叫 Bansang 既傳統韓國米跟配菜套餐。鱔及炸魚係有水準，不過驚喜欠奉。反而 Bansang 好好，每種配菜都好味到食唔停口，個湯雖然係辣，但冇辣到個口冇晒味覺咁，剛剛好。連我唔太食得辣既人都可以飲晒碗湯。
甜品有三款，我地三個人一人一款，再 Share 食。有一個甜品有威士忌泡沫 (Whisky Foam)，好特別。另外一個係桔梗雪芭，呢個真係第一次食，原來都好食架，真係好新奇。
平時食過其他米之蓮餐廳，多數都係西式菜式，唔係牛就羊，一係鵝肝或者深海魚，都悶悶地！今次第一次食到以 Fine Dinner 型式既韓國菜，真係好有驚喜。原來韓菜唔係只係燒燒燒！
食飽左，女士們夠晒氣力去東大門購物。而我放低左佢地係 APM Place 商場，跟住我就去左平和市場幫朋友買野，然後再坐地鐵去京東市場買人蔘比阿媽。
 |
| 東大門 |
 |
| 京東市場 |
 |
| 買人蔘 |
晚上 7:00 ，我地約返女士們及另外兩位朋友去新村站。當我由清涼里坐地鐵去新村時，一開個地鐵地圖 App 出黎睇下，突然發現原來有兩個新村站，我即刻搵下我地今晚晚餐既地方係近 2 號線既新村站。我即時 Whatsapp 大家，不過已經太遲，佢地已經上錯車，咁佢地唯有轉多幾次先去到我地既新村站。
我地今晚去一間叫
新村食堂 (새마을식당) 既餐廳食燒肉。網上評價幾好，不過我地食完，就覺得麻麻地，烤肉太乾，冇咩特別好食既野。我覺得上次係東大門食既八色五花肉好食好多。起碼人地仲有一個海鮮鍋食下。
 |
| 新村食堂 |
 |
| 燒肉中 |
 |
| 配菜任食 |
食完新村食堂，大家都係覺得唔夠飽，所以我地就走去食出名既大瓦房醬油蟹。我地坐地鐵，再行過去。入到去個侍應本來比我地入去，不過老闆突然出黎話過左 Last Order，唔比我地入去。白行左一趟，我地只好返去東大門既雪冰食甜品。
 |
| 大瓦房醬油蟹 |
雪冰位於 Lotte Fitin 旁，Lotteria 對面，因為係大廈既二樓，所以唔係好易搵。我地叫左個芒果西柚雪冰及一個綠茶朱古力雪冰，叫完先知原來呢度最出名係乳酪哈密瓜雪冰。我地食完覺得幾好食，過幾日可以返黎試埋佢個乳酪哈密瓜雪冰。
 |
| 芒果西柚雪冰及綠茶朱古力雪冰 |
食完都 10:30 啦！女士們戰鬥力仍然旺盛，所以佢地再戰東大門。而我就謝晒皮，所以一條友先返旅館休息。今日下午同而家，兩次由 Lotte Fitin 自己一條友行去東大門地鐵站方向，兩次都比我幾舒服既感覺。以前行呢條路，好多講普通話既人係度橫衝直撞，破口大叫，亂過馬路。今日行兩次都唔係太多人，好悠悠閒咁行。我行行下仲入一入去 DDP (Dongdaemun Design Plaza) 地下既咖啡店睇下。今次東大門比我既印象同感覺好左好多。
No comments:
Post a Comment