旅館係有早餐，佢有方包、杯麵、午餐肉放係度，比你自己煮，煮完要自己洗返晒你用過既野。不過我地今日 8:00 太早，旅館方面都未買麵包同杯麵返黎，所以冇野食。咁我地就去東大門既 Isaac 買三文治。上次我冬天黎，係 Isaac 買完，上火車先食，但因為冬天，成個三文治凍晒，唔好食。今次比多次機會佢，我一買完，即時係佢檔口前食。剛整好，熱辣辣食真係唔同，好食好好好好多！
 |
早晨, 東大門
|
 |
| Issac 三文治 |
 |
| Issac 三文治 |
我地今日會去 Hertz 租兩日車，然後揸去南怡島及春川一帶，不過我地唔會搬酒店，所以每晚都會返黎首爾。跟據網上既地址，Hertz 係位於 Lotte FITIN 商場既地庫，去到你唔會見到大大隻招牌寫住 Hertz，因為佢原來係 Lotte Rent A Car 既舖頭。佢比左架銀色既 KIA K3 我，仲幫我設定好英文既 GPS。因為剛開車，唔係太熟習佢個 GPS，所以我用埋我預先安左係 iPhone 既免費 GPS 軟件 Waze。兩個一齊用就一定冇事啦！由首爾去南怡島車程本來只係一小時二十分鐘左右，但路程中有人炒車，搞到大塞車，我地足足用左兩個鐘，11:30 先去到！
 |
| Lotte Rent A Car 既舖頭 |
 |
| 兩個 GPS |
 |
KIA K3
|
前幾年試過冬天黎南怡島，四周都被白雪舖滿，白茫茫一片，感覺好滄桑。今次夏天黎到，因為唔係花季，所以冇咩期望。不過去到南怡島，由碼頭行去島既中心地帶，沿途跟住樹蔭行，望去四圍一片綠油油，好舒服！行行下，居然發現有幾棵開滿紅葉既樹，估唔到未到秋天都見到紅葉！
 |
| 冇咩人既南怡島登船處 |
 |
| 上船去南怡島 |
 |
| 船入面 |
 |
| 紅葉 |
 |
| 大草地都冇人 |
我地由河邊行去南怡島著名既杉樹大道，沿路真係得我地行，冇咩人！可能因為少左強國人。一切景點都行得好舒服，好悠閒。我地係杉樹大道仲影到背景冇咩人既相。
 |
| 杉樹大道 |
午餐我地去左島上既韓式料理餐廳「南門」，我地叫左牛肉湯定食、冷麵、炸蠔餅等韓式經典菜式。好唔好食我就唔識評啦！跟我食開既味道一樣囉！
 |
| 南門 |
我地係南怡島逗留左三個半鐘，下午 3:00 離開去小法國村，車程約半小時。揸車去到法國村之前個灣位，我見有個小草地，好多車泊左係度，所以我就張架車都就咁泊左係度，唔駛比錢。法國村係好多韓劇同綜藝節目既拍攝場地，而今次係我第二次黎，所以都冇咩特別野做，係村內行個圈，影下相，睇下木偶表演，5:30 左右就離開返去首爾。
 |
| 小法國村 |
回程都幾順暢，直至去到首爾市內就開始塞車。其實首爾市內基本上是由朝塞到黑，所以係市內揸車真係冇著數。
我地因為有人唔可以食牛，所以就分開左，有人去食紅蟹，而我就去食燒韓牛。我直接揸車去到食韓牛既餐廳
강강술래 Sullai。Sullai 係一間正宗既燒韓牛餐廳，首爾市內有多間分店，我地選擇去左位於江南既分店，而餐廳門口仲有專人代客泊車，食燒韓牛係一件好高級既事情。
 |
| Sullai |
餐廳有不同既牛肉，有肉眼、西冷及助骨等。佢最貴既係高級肉眼，一碟 150g，KWD 55,000，即約 HK$380，最平既醃過既肉眼，一碟 260g，KWD 29,000，約 HK$200。我地每款都叫一碟，咁就可以試晒不同既款式。
我地張檯，有一位專人姨姨招待我地，係牛肉未到之前。姨姨先上左好多不同既韓國配菜，呢度既韓國配菜跟其他餐廳既不同，雖然都係芽菜、泡菜、魚仔等。但個質數係食得出高一班，好食好多。而個辣湯又係恰到好處，令到你好開胃！
 |
| 用炭火燒韓牛 |
 |
| 一大堆配菜 |
好啦！到個韓牛啦！韓牛賣相好靚，跟和牛有得揮。個專人姨姨會幫我地係面前個炭爐燒同剪開分比我地，我地完全唔駛自己出手。韓牛入口牛味香濃，油份適中，有咬口。但始終不及和牛果種係個口爆出油香既驚喜。呢餐韓牛價錢唔平，但為左一嘗高級韓牛，我覺得值得一試。不過一試好啦，下次都係留返比和牛啦！
 |
| 韓牛 |
因為係韓國時間有限，但又有好多野想食，所以接住我地就揸車去普樂醬蟹 ProSoyCrab (프로간장게장) 食第二餐。係首爾揸車有時真係仲煩，我係其中一個路口轉唔到灣，點知就上左漢江旁既高速公路，仲要夜晚既高速公路都塞車，搞到本來十分鐘左右既車程，變左大半個鐘。
上次黎首爾，去左弘大一間餐廳食醬油蟹，我覺得太咸，同個質感好奇怪。今次比多次機會醬油蟹，所以去左最著名既普樂醬蟹。因為剛食完韓牛，唔太餓，所以我地點左一隻特大母蟹，三個人分黎食，呢隻蟹要 KWD50,000，約 HK$350。另外仲叫左個蟹籽伴飯及紫菜湯。
 |
| 普樂醬蟹 ProSoyCrab |
普樂醬油蟹既蟹膏好豐富，蟹膏及蟹肉入口唔會勁咸，但都帶咸香鮮味。質感比上次好，唔會流質到一 Pat 野咁。跟住我試下撈飯食，因為有飯係度，食入口更實在。普樂醬油蟹真係比上次好好多，不過我都係鍾意食煮熟左既蟹。所以今次試左最好既醬油蟹，知道醬油蟹應該係咁既味道，所以唔駛再試囉。
 |
| 特大母蟹 |
 |
| 好多膏 |
 |
| 紫菜湯 |
 |
| 蟹籽伴飯 |
食完蟹都 10:00，我揸車返去東大門附近，女士們又要去行街，所以我係 APM Place 商場門口放低佢地，然後我一個人就揸去旅館附近搵地方泊車。之前旅館主人幫我地搵左旅館對出大街對面條小巷內有地方泊，咁我就揸入去睇下。係巷內有個好簡陋得幾個泊車位既停車場，係個更亭內又冇人，咁我停埋一邊落車去睇下。突然有個阿叔係一度門走出黎，我即刻上去用英文問佢有冇得泊車，佢更係唔智識英文啦！咁我同佢用下身體語言，再加埋手機既 Google Translate，問到可以泊到聽朝，只係 KWD 2,000，好平！跟住阿叔仲幫我泊車，佢駛入去個位時，差少少撞到隔離架車，嚇到我心都離一離！
返到去旅館，旅館既男主人仲未瞓，我同佢吹左一陣水。佢話聽日星期六，我地揸車去春川好大機會塞車，其實坐火車會仲好！但係我已經租左車，冇辦法啦！
No comments:
Post a Comment