Joseph@外地遊記: 201706 韓國首爾第四日

2017/06/18

201706 韓國首爾第四日 - 首爾

今早 10:00 左右去到明洞，大家分頭行街購物。大約 11:30 就相約明洞站出發去食午餐。

樂天百貨

明洞

明洞, 見到首爾塔

韓星既星光大道

今日既午餐，我地預訂左 12:00 到米之蓮一星餐廳 Bicena。以我一向習慣，我會上網搵定地址，點樣坐車去。Bicena 網頁只係得韓文，邊句韓文係地址我都唔識分，咁我上 Google Map 搵 Bicena，搵到係梨泰院一帶。我唔放心，上埋米之蓮網頁及 Tripadvisor 搵，都係同一地址，咁一定冇死啦。好啦！咁我地就 11:30 坐地鐵去到漢江鎮站，出左站，跟住 Google Map 去，點解唔見左間餐廳架？我以為我之前搵錯資料，所以即刻上網再睇，地址冇錯喎！我地入去附近既店舖問，原來間餐廳 2017年5月搬左去蠶室既樂天世界塔，我地只有即刻坐的士去樂天世界塔。

樂天世界塔

我地足足遲左一個鐘，1:00 先去到。入到餐廳，原來餐廳都知 Google Map 個地址未更新，今次真係第一次做足功課都去錯地方。

講完我地既傻仔野，講返間餐廳。Bicena 位於新建既樂天世界塔 87 樓，有一架專用既電梯由地面直達餐廳。我地被安排坐一張靠窗既檯，位於 87 樓，景觀真係無敵。

全部位都係窗旁邊

首爾景色

旁邊既樂天世界

餐廳既餐牌有韓文及英文，不過英文餐牌好似係 Google Translate 既出品，明明識晒每個英文單字，但夾埋一齊就睇唔明。好彩餐廳既侍應英文幾好，可以叫佢黎講解下。餐廳既午餐係有八道菜，價錢 KWD 70,000，約 HK$480。如果要轉菜式就另加錢，例如主菜由黑毛豬轉韓牛就加 KWD 15000。有一道菜係白飯，不過好講究，佢會即時跟據你喜好磨米，你可以選擇磨米既深度，你鐘意硬既就磨少少，軟既就磨深些。另外仲會跟好多配菜比你送飯。因為我估唔到佢個飯咁精彩，我好笨咁加左 KWD 5,000 轉左個白飯做豆漿冷蕎麥麵。

白飯都有不同精米度既米

睇見佢個餐牌，佢每一度菜都會加個年期。刺身會寫 "6 hour aged fish"，腐竹會寫 "18 hours soaked beans..."，雪糕都寫 "5 days aged ...."，雪左五日都寫出黎? 我覺得將熟成講得過左火位。唔通我地既皮蛋又叫熟成一千年既鴨蛋，咸魚又熟成一千年既鮮魚咩？

唔好理個餐牌，我地睇返間餐廳既食物。呢間餐廳係主打新派韓菜，每道菜都以西式精緻既標準黎處理，菜式中加入韓國既原素。例如刺身跟帶柚子味既醬，雪糕會加入艾草，都係好特別既菜式。

前菜有三道，分別係刺身、蟹肉腐皮卷配豆漿及蘑菇牛肉餃。因為個煮法及醬料跟我地平時香港食開既不同，所以都好有驚喜。主菜有炭烤豬肉，可配泡菜或特製醬料，豬肉燒得香脆，不錯不錯。我叫左既豆漿冷蕎麥麵，開頭食好清新，不過份量不細，食食下都飽到膩。甜品有艾草雪糕，呢個真係爆驚喜，我真係第一次食到帶藥草味既雪糕，個味道又好夾，真係估唔到。最後仲有幾粒精緻既小甜品作尾。