201709 日本山陰第一日 - 米子

今次去日本中國地區既山陰，好多人一見到中國呢個字，都以為我返大陸。所以先介紹一下山陰係邊度先。日本既中國地區係指本州既西部，包含鳥取縣、島根縣、岡山縣、廣島縣、山口縣等5個縣。簡單小小講，大約即係近畿 (大阪一帶) 同九州中間既地方。而中國地區又分成山陰山陽地區，山陽係面向四國既山口縣、廣島縣及岡山縣。山陰就係面向大陸既鳥取縣及島根縣。

山陰既位置

以往去山陰地方，要先去大阪，再轉火車或內陸機。近年香港航空開辦好多日本冷門地方既直航航線。今次我就係坐直航機去米子。我地坐中午 12:00 既機，大約日本時間下午 4:10 到達米子鬼太郎空港，米子鬼太郎空港好細，得兩條登機橋，全日只有六至九班機。細有細好既，過關同拎行李都唔會太耐。

降落米子鬼太郎機場

叫得米子鬼太郎空港，機場內當然有好多鬼太郎既野。例如成個天花都畫左鬼太郎，好多標誌都同鬼太郎有關，所以我地都係機場影左一陣相。

鬼太郎接機

天花既鬼太郎

進入禁止 係 牆壁怪

通常我去日本都會用提款機直接提取日元，係機場既提款機每次最多只可提 ¥100,000，咁我就先取 ¥100,000，諗住唔夠先係市內再提款。點知係山陰既銀行好多都唔可以用銀聯或 VISA Plus 既提款卡，只有郵局及 7-eleven 可以收銀聯或 VISA Plus 既提款卡，而山陰地方極少 7-eleven，郵局就多數要辦公時間先可以用佢既提款機。我地 18/9 星期一，因為係日本假期，我地搵左好耐，要去到鳥取市最大既中央郵局，先提到款。所以最好都係於機場先提取足夠既現金。

由米子鬼太郎空港坐 JR 去米子市，大家要留意，呢條鐵路線差唔多一個鐘先一班車，如果掛住係機場影相，錯過左班車，就要等好耐啦！而我地就真係差少少錯過左班車！

普通電車去米子市中心

米子市係山陰地方其中一個主要都市，一出車站，唔好以為好似大阪咁繁榮，佢只係一個冇咩人既鄉下地方。係車站前既街係最旺既地方，大部份餐廳都位於此，而附近有一間 AEON Mall，不過亦都好細。跟住就咩都冇啦。

米子火車站

火車站前既地標

AEON Mall

米子市內既酒店唔係太多，我地選擇住係車站附近既 Super Hotel，行去車站只係兩分鐘左右，酒店旁就係我地之後租車既 Toyota Rent a car。Super Hotel 係商務集團式酒店，房間唔會太大，比較特別係有一個大浴場。當夜晚返到黎，可以去浸一浸消除疲勞，都幾爽架。不過因為佢得一個浴場，男女交替使用，通常我地夜晚返到黎都係女士使用既時間，要去到 11:00 先輪到男士使用時間。我地會係 Super Hotel 住四晚，呢幾日我地會去境港一日遊、出雲一日遊及松江一日遊。

Super Hotel

我間房

今日冇咩行程！去到酒店都已經 6:30，放低左行李，先去 AEON Mall 既超級市場買生果今晚食。今日一早係屋企出門口，夜晚先黎到米子，舟車勞動左一日，所以要慰勞下自己，去食好野。我地由 AEON Mall 行左十幾分鐘，去到一家叫大力家族亭既餐廳食晚飯，呢間餐廳係食 A5 黑毛和牛，係 Tabelog 有成 3.54 分，非常高分。

大力家族亭

我地先叫左一個四人分量既牛肉拼盤，拼盤有唔同級數既 カルビ 及 ロース。係日本既燒肉店，最常見係 カルビ 及 ロース，カルビ 通常係指肋骨附近比較多脂肪既肉，ロース就係其他冇咁多脂肪既肉。另外拼盤仲有牛舌 (タン)。我地食左幾款唔同既肉，我地最鍾意係一款上級既ロース，入口即溶，香噴噴既牛油香佈滿整個口腔，再配上香軟日本白飯，食完有好幸福既感覺！我地食完個拼盤，另外再叫左厚切ロース及上級ロース，真係超級滿足！

牛肉拼盤

韓式煎餅

上級ロース

配白飯，好好食！

返到酒店，沖完涼，我地就走去酒店大堂既檯食生果。我地買左桃及香印提子，桃可能已經過左當做既時候，所以唔係好甜。而香印提子就剛好季節，真係又香又甜又多汁，香印提子最特別係入口有一種獨特既花香味！平時係香港買香印提子，最平都要百幾蚊，我地係 AEON Mall 買都只係 ¥398，約 HK$28，好抵食！

宵夜

酒店大堂