Joseph@外地遊記: 201709 日本山陰第七日 - 宮津 (天橋立)，城崎溫泉

係酒店食完早餐，9:15 出發去宮津，車程一個半鐘。先解釋下禽晚我地點解唔直接由鳥取揸車去宮津，然後係宮津住一晚，咁今朝就唔駛再揸一個半鐘車。第一個原因係由鳥取揸車去宮津，車程兩個半鐘，夜晚不停揸兩個半鐘，司機同乘客都好辛苦。第二個原因係宮津冇咩平既酒店，多數係一泊兩食既溫泉酒店，如果我地好夜先到宮津，跟本就享受唔到間溫泉酒店，好似比多左錢，但又用唔到佢既服務。所以我地就係鳥取同宮津中間既豊岡，搵間平平地既酒店住一晚。

我地 10:30 去到宮津，我地架車泊左係智恩寺旁既收費停車場。黎到智恩寺旁，當然順便入去睇下。智恩寺係求智慧既寺，參拜既人會求一扇小紙扇，上面會寫左大吉、小吉等字樣，參拜者會張小紙扇掛係寺內既松樹上，一把把小紙扇係松樹上，都幾有趣！

智恩寺

智恩寺旁就係天橋立既起點，天橋立係日本三大景之一，三大景有廣島縣既宮島，宮城縣既松島及京都府既天橋立。天橋立其實係一個天然既沙洲，由地穀移動而形成，沙洲分隔開阿蘇海及宮津灣。要觀賞天橋立，日本人認為走上山上既傘松公園，倒過來，頭低於褲襠間睇見既天橋立就好似一條奔上天上既龍，或者似一座架係天上既橋。

遊覽天橋立有好多方法，我地選擇左係智恩寺旁租架單車，經過天橋立，踩去另一邊，跟住坐吊椅上傘松公園，係傘松公園玩完就坐吊椅落返黎，跟住再坐快艇返去智恩寺。單車加快艇一個套餐，每人 ¥900 (唔包來回吊椅)。

租單車公司

由智恩寺出發，踩單車上天橋立沙洲，去到沙洲另一邊， 3.5 公里，行路大約 45 分鐘，踩單車只需 15 分鐘左右。但係我地沿途停下影相，差唔多踩左一個鐘先去到另一邊。

出發

天橋立上踩單車

當我地去到沙洲另一邊，還左架單車，時間已經係中午 12:00 。係行去傘松公園時，我地見到有間食手打烏冬既舖頭。踩完單車，熱熱地，好想食碗冷烏冬，所以走左入去食午餐！我叫左個天婦羅冷烏冬，天婦羅有米餅、雞肉、牛蒡、魚片、冬菇等。即叫即炸，好好味！宮津既黑豆原來很有名，呢間烏冬店好窩心咁提供免費黑豆茶，個茶飲落真係有黑豆既焦香味，好特別！

午餐幫襯既烏冬店

上傘松公園，我地買左 ¥660 來回既吊椅劵。一面坐吊椅，一面睇住個天橋立既景慢慢開始廣闊，係一種唔錯既欣賞方法。

坐吊椅上傘松公園

上到傘松公園剛剛有一團日本菁英團，我地等佢地影完相，我地就輕輕鬆鬆走去用指定標準動作，倒過來，頭低於褲襠間睇天橋立。倒轉睇其實有咩特別？我都係唔講啦！大家自己去試下啦！

我地坐吊椅返去海邊，再轉坐快艇返去天橋立棧橋，大約 2:15 左右，然後直接揸車離開前往城崎溫泉。

坐吊椅返去海邊

坐快艇

我地坐船頭

大約 3:30 ，我地就去到城崎溫泉。我地訂左一間叫緑風閣既溫泉旅館，所以我地先去旅館 check-in。緑風閣有兩個溫泉，「緑風」及「水風」，兩個都有露天風呂。兩個溫泉採取男女交替方式，晚上男士可使用「緑風」，女士可使用「水風」，第二朝就會交換使用。

緑風閣

城崎溫泉有一個特別既地方，就係有個城崎七外湯。遊客可以比錢買七外湯放題劵(¥1200)，就可以全日任浸位於城崎溫泉街上七間各具特色既公眾溫泉。不過住係城崎溫泉任何旅館都可免費獲得呢張七外湯放題劵。

我地係旅館換左浴衣，旅館會提供一個籃，比大家放毛巾，然後就出發去浸外湯。城崎溫泉既溫泉街都唔短，溫泉街大部份都沿著條河，河兩旁有好多垂柳及橋，而旁邊仲有好多不同既商店，著住浴衣，踏住木屐係條街上，好似回到江戶時代既日本。

去浸外湯

溫泉街

我地雖然 3:30 就黎到城崎溫泉，但要慢慢行下商店同浸外湯，都係唔夠時間。所以下次再黎城崎溫泉，起碼要中午就黎到。要係有限既時間浸晒七外湯，真係好難。我地當日有三個外湯維修，所以我地既目標只係要浸晒四個外湯。我地晚飯前浸左二個，晚飯後再去浸另外兩個去完成目標。

如果真係浸唔到咁多外湯，我推介大家一定要去浸下面呢三個。第一個係御所の湯，御所の湯有美人湯之稱，裡面有一個面向流水叢林既露天風呂，環境開揚舒服。第二個係一の湯，一の湯最特別係洞窟風呂。第三個係駅舍溫泉さとの湯，呢個湯因為維修，所以我冇浸過，但網上其他人講，さとの湯係有和式及洋式既大浴場，和式及洋式既露天風呂，仲有蒸氣浴，烤箱及冰箱，係設施最齊備既外湯。