Joseph@外地遊記: 201709 日本山陰第三日

今日係酒店食完早餐，然後去酒店旁既 Toyota 租預先訂左既 Prius Alpha，四個人去旅行，呢架車真係最好既選擇，車尾可以放四個大行李，又係混能車。租車時，Toyota 既職員同我地講，外國遊客，又住係米子既酒店可以平 ¥5,000，鳥取真係好外國遊客 Friendly。

我地架 Prius Alpha

去緊出雲既途中

今日我地係出雲一天遊，9:00 開車，大約揸左一小時十五分鐘就去到出雲大社。係出雲大社前既表參道「神門通」，有幾家收費停車場，但係「神門通り交通広場」內有一個大型露天停車場，仲係免費既，所以大家冇必要去收費停車場。

表參道「神門通」

出雲有好多出名既美食，我地首先去左一間叫「日本ぜんざい学会壱号店」既小店食「出雲ぜんざい」，即係一款出雲年糕紅豆湯。紅豆及年糕係日本都係代表消災及吉祥既意思，所以好多日本人都會幫襯下。不過唔係好食甜既話就要注意啦！因為連我呢個好食得甜既人，都覺得呢個年糕紅豆湯係甜到有少少過份左。

日本ぜんざい学会壱号店

出雲ぜんざい

出雲大社係日本地位非常崇高既神社，每年既農曆十月，全日本神社既神據說都會集結到出雲大社，因此全日本農曆十月都稱為「神無月」，只有出雲叫「神在月」。不過當所有神黎晒出雲，我地都冇可能知係唔係真，同冇可能見到，咁黎到出雲大社都有其他野睇既。出雲大社有一條日本最大形既注連繩，長十三米，重五噸。當我地沿表參道一直行入去，去到拜殿，見到條注連繩，比想像中細好多喎。講到係全日本最大，都唔係好勁啫，真係未見過大蛇......。正當想走時，我地行埋去西面既神樂殿，原來個條五噸繩係呢個殿，頭先個條得一噸既細繩咋！好彩過一過黎！

拜殿

神樂殿

呢條注連繩好大條

除左參觀出雲大社，我地沿表參道行左去出雲大社前駅，呢個站係由一畑電車經營，佢地係全日本現役最古老既電車。由出雲大社前駅再向前行，就去到出雲大社既一鳥居，呢個白色既石鳥居係日本第一既鳥居。

出雲大社前駅

車站內

好舊既電車

舊電車上

一鳥居

出雲名產有「出雲蕎麥麵」，所以成條表參道都好多蕎麥麵店。有一兩間門口好多人等位，就知道一定係好野！我地去左一間好多人等位既「田中屋」。黎到出雲，大部人都會叫三色割子蕎麥麵，雖然叫三色，但都係淨蕎麥麵，冇配菜。「割子」其實係放蕎麥麵既漆器小碗，三色割子係將蕎麥麵放係三層既小碗，然後將醬汁倒入第一層食，食完將上一層既醬汁倒入下一層食，如此類推。因為三層蕎麥麵都放左不同既配料，所以口味有少少不同。

田中屋內

三色割子

午餐後，我地揸車前往日御崎燈塔，由出雲大社去日御崎燈塔呢段路係沿海涯岸既路，條路又窄，彎又急，所以要好小心咁揸過去。係 Google Map 睇日御崎一帶都有舖頭及餐廳，但去到見到遊客都唔多，而多數舖頭及餐廳都冇開，只係有少少舖頭買下紀念品及烤魷魚。去到燈塔要比錢上塔頂，塔頂上面極大風，吹到呼吸都有困難，影相就變晒披頭散髮。

燈塔上既風景

係出雲好多地方都會貼左一張風景相，張相係一塊大石於沙灘上，我估呢個都算係出雲其中一個地標。由日御崎燈塔返去出雲大社，途中就會見到呢塊石，我地當然落車去影張相。呢塊石原來叫「稲佐の浜」，在「神在月」既神在祭前一夜，於「稲佐の浜」就會舉行神迎祭黎迎接眾神到出雲大社。

稲佐の浜

由一鳥居向出雲大社反方向走，就會去到一個已經唔再駛用既舊大社駅，舊大社駅之所以出名，係因為佢係一座純日本建築風格既火車站。而月台及路軌都仍然保留著。

舊大社駅

下午 3:30，我地去到根島葡萄酒莊 (島根ワイナリ) , 日本威士忌就係人都知出色及昂貴，日本既紅白葡萄酒就真係唔多識。我地入到去葡萄酒莊，先睇下介紹釀酒過程既展品，然後去到一個售賣區，區內有一盆盆不同種類既紅白酒，旁邊有隻膠杯仔，比你去試酒。成個佈局都好唔專業，我試左幾款酒，好一般，吸引唔到我買。