今日天陰，間中有雨，但係我地今日松江一日遊，戶外活動多，有少少麻煩。講到鳥取，最有名既梗係鳥取二十一世紀梨啦，所以今早先安排去梨園摘梨，即摘即食。
 |
鳥取二十一世紀梨
|
係米子出發，大約二十分鐘車程，我地去到「大山観光農園」。係梨園，你可以選擇買梨走， ¥1000 大約八至九個梨。或者入園摘梨任食，每位 ¥800。以經濟效益黎講，入園比你任食，你最多未食三至四個，所以買走係比較抵。不過我地一場黎到，當入園觀光，體驗下親手摘梨，所以照比 ¥1000 入去。梨園既嬸嬸帶我地入去梨園內，雖然佢同我地溝通唔到，但都盡力用身體語言教我地點去摘梨。
 |
| 大山観光農園 |
摘左第一個梨落黎，影完相，一口咬落去，個梨好多汁，好清甜，鳥取梨果然係唔錯。一個人食完一個梨，都有少少食唔落啦！跟住再摘多個梨，然後用嬸嬸比我地既膠刀切開一片片黎食，原來切開一片片食係冇咁膩，可以食多啲。我地四個人埋單食左 14 個梨，我已經覺得成績唔錯啦。走之前，我地同嬸嬸買左一袋梨，拎返香港做手信。
去松江有兩條路線可以去，比較近既係行山陰道，但我地走左去行米子空港方向，經江島過去。因為我地專程去睇連接境港及江島既江島大橋。江島大橋據說係日本最斜天橋，斜度有 6.1%。之前一個日本汽車廣告，配合拍攝角度，將條橋影到好似過山車既斜度，所以成為左一個景點。我地駛過條橋，然後停係橋下面，其實感受唔到佢好斜，後來發現要離遠睇先會覺得斜。
 |
| 江島大橋 |
 |
| 要離遠睇先會覺得好斜 |
去到松江已經下午 12:30 ，今日既午餐係去一間叫「大はかや」既鰻魚飯專門店，餐廳係松江市中心既西面，於 Tabelog 獲得幾高既分數。鰻魚飯有分大、中及少，我叫左個中既。中既份量其實都唔少，有三大片燒鰻魚。鰻魚肉質肥美，唔帶腥味，雖然炭火味唔夠，但都有 70 至 80 分水準，好食過東京某鰻魚飯名店。
 |
| 「大はかや」既鰻魚飯專門店 |
今日不斷落雨，去
松江花鳥園都有少少擔心，但入到去，原來全部地方都有蓋遮住，所以落幾大雨都冇問題。松江花鳥園入場費係 ¥1540，外國人又有特價，只係 ¥1080。係購票處既兩旁，未入場既位置都有十幾二十隻貓頭鷹比你睇。
入到花鳥園，你會見到好多精心擺設既花，比鳥取花回廊重多重靚。我地沿住佢預設既路線行，先坐扶手電梯上半山，半山上有幾個類似溫室既建築，內有不同既雀鳥，有啲鴨及鶴會係你旁聽走黎走去。
 |
| 松江花鳥園 |
松江花鳥園既重頭戲就係每日只有兩次既「企鵝散步」及「貓頭鷹飛行表演」。先介紹下「企鵝散步」，園內有四隻企鵝，每日於 10:30 及 14:00，就會穿上制服，於熱帶鳥溫室內散步。遊客可隨意跟住班企鵝行，佢地係完全唔驚人，好得意！散步完，你只要比幾百円 ，就可以抱住一隻企鵝影相。
 |
| 有五隻企鵝 |
 |
| 企鵝散步 |
「貓頭鷹飛行表演」就會係鮮花大展示溫室內進行，表演時不同種類既貓頭鷹係觀眾頭頂上飛過，結束後仲可以將貓頭鷹放係手臀上合照。我地呢一代睇哈利波特大既，對貓頭鷹總有小小情意結，所以我都比幾百円同一隻貓頭鷹合照！
 |
| 呢隻雀好得意 |
 |
| 白色貓頭鷹 |
 |
| 貓頭鷹飛行表演 |
松江市通常有兩件遊客會做既事，一係參觀松江城，二係坐船遊覽市內既河川。因為時間關係，我地只係去左參觀松江城。松江城既天守係日本國寶之一，不過去過好多日本不同地方既城堡，其實都大同小異，感覺不大。旨在到此一遊，影張相！
 |
| 松江城 |
 |
| 松江城 |
 |
| 松江歷史館 |
 |
| 歷史館內有鼓比你打 |
 |
| 我地去左市中心行下百貨公司，但冇野睇既 |
每次去日本，都會搵間迴轉壽司餐廳。我係 Tabelog 搵到一間係米子既「すし弁慶 道笑町店」，係呢一帶最高分既迴轉壽司餐廳。我地 6:20 係松江揸車去，大約 7:00 到達，因為正值晚餐時間，好多人等位，我地都等左半個鐘先有位！
係日本既迴轉壽司餐廳，通常我都唔會拎迴轉緊既壽司，我會直接用我非常有限既日語，直接同壽司師傅落單，咁樣先可以食到壽司師傅剛剛整好既壽司。我地又叫大吞拿魚腩、又叫海膽，專食貴價刺身。四個人埋單都只係 ¥9500，即係約 HK$670，係香港一定貴一倍都唔得。
宵夜我地又去 AEON 買生果，今次我地買左岡山晴王提子同桃。桃真係唔得，真係要不時不食。而晴王就冇得頂，甜度比之前食既香印仲高，而花香未更出。如果係夏天尾去日本，一定一定要買晴王食，價錢一定比香港買到既晴王平，質數又一定高幾班。
 |
| 晴王 |
No comments:
Post a Comment