Joseph@外地遊記: 201709 日本山陰第五日 - 北榮町，倉吉，三朝溫泉

今日依然天陰，仲要中午後不斷落大雨。早上係米子酒店執埋行李上車，然後揸大約一個鐘車去到東伯郡既北榮町。山陰除左有鬼太郎，仲有名偵探柯南，名偵探柯南作者「青山剛昌」既故鄉就係北榮町。所以係北榮町有一座青山剛昌博物館，而北榮町市內亦都有好多關於柯南既野。

青山剛昌博物館

北榮町地圖，好多有關柯南既景點

我地一早 9:30 就去到青山剛昌博物館，博物館門口有阿笠博士架甲蟲車，而博物館內有兩層，主要介紹返名偵探柯南呢個漫畫。影相位唔多，裡面多數係紙版人像，只有入口處有個大型雕像，所以好快參觀完。

阿笠博士架甲蟲車

作者青山剛昌既辦公室

扮柯南踩滑板既遊戲

我係被麻醉既毛利小五郎

我地揸車去附近既米花商店街，米花市係名偵探柯南中虛構既城鎮，而米花商店街就係模仿呢個虛構城鎮既場景，係度仲有一度大宅鐵閘模仿工藤新一 (即係未變細路前既柯南) 既大宅。係米花商店街前小小就係柯南大橋，大橋頭尾兩端都有柯南既銅像，橋上有好多柯南的浮雕。

米花商店街

工藤新一

柯南大橋

工藤新一既大宅

係北榮町既由良駅，因為柯南既原故，亦都改名做柯南駅。最多影相位原來係車站及車站附近。車站前首先有個超大既柯南像，車站候車室、月台，四周亦都見到柯南。而車站前既街道上更有少年偵探隊既雕像。

柯南駅

柯南駅侯車室

少年偵探隊

係北榮町玩左三個鐘，我地 11:45 揸車前往倉吉。去鳥取既遊客一定會去位於倉吉既二十世紀梨記念館，我地揸左 20 分鐘車，先將架車泊係二十世紀梨記念館門前既免費停車場，跟住就行去位於白壁土藏群既清水庵食午餐。

清水庵係倉吉頗有名既食店，佢主打係十二色麻糬涮涮鍋，呢個鍋除左有十二種不同口味既麻糬片，仲有跟烏冬、蔬菜及肉丸，另外仲可以點牛肉或海鮮。今次係我第一次食麻糬涮涮鍋，麻糬放入鍋，二秒左右就要拎出黎食，塊麻糬有唔同口味，例如芝麻或蝦，有啲食得出佢講個種味，有啲就食唔出。不過塊麻糬煙煙韌韌，又幾特別！

清水庵

十二色麻糬涮涮鍋

十二色麻糬

食完午餐，雨亦越黎越大，本來打算係白壁土藏群慢慢散下步，影下以前江戶，明治時期建的建築，參觀下以前造酒廠和醬油廠改建成既物產館及咖啡店。不過真係大雨到唔想係戶外行，所以我地快快趣行返去二十世紀梨記念館。

白壁土藏群

日本人真係好厲害，為左梨都可以整個咁靚既博物館。二十世紀梨記念館入場費 ¥300，館內有介紹鳥取梨既歷史，種植方法及品種。而大家最期待既係試食！試食區有專人不斷切梨，四盤不同品種既梨放係度任你試，我都學識左有一種叫「新甘泉」既梨，佢係好甜，好多汁。

二十世紀梨記念館

館中間既大梨樹

不同品種既梨

梨試食

大家食飽梨之後，我地就揸車去三朝溫泉。係去三朝溫泉前，我地嘗試去倉吉火車站搵櫃員機提款，不過冇一部收銀聯卡或 VISA Plus，咁之後再搵啦！

我地今晚住係三朝溫泉既橋津屋，一泊兩食，晚餐選左食鳥取和牛, 燒蟹及燒鮑魚，好期待！到達橋津屋，雨亦係最大，本來打算出去三朝溫泉既河邊及溫泉街行下，而家唔駛去啦！

去到橋津屋，先食接待處食茶點

女仕可以揀浴衣

我間房

女將堅持要同我地影呢張相

太大雨，只可係門口影張相

呢張係明天早上影既橋津屋門口

因為冇咩野做，係食飯前就去一去浸溫泉。橋津屋本屋既地庫有分開男及女既內湯，叫岩の音，係一個好細既室內浴場，而其中一面牆身舖上岩石，扮係岩洞內咁既樣，其實冇咩睇頭。住得溫泉旅館，我當然唔會選擇冇外湯既。係橋津屋行兩分鐘左右，會去到橋津屋既外湯，叫雨情，呢個係一間獨立屋內既風呂，有一個檜木既內湯，加一個露天風呂。露天風呂冇咩景觀，只係有少少草草木木睇下，不過露天已經好爽啦。因為得一個外湯，所以男女要交替時間使用，女士食飯前用，男士食飯後用，而早上又輪到女士使用。另外係雨情旁有另外比錢既貸切風呂，叫吟湯，大家只要比 ¥1300 就可以私人使用 45 分鐘。因為某特別原因，我唔駛錢可以用到，原因我一陣先講啦！

雨情

貸切風呂，吟湯

6:30 開始食晚餐，呢度既晚餐係住客既房度食，因為我住一樓，而朋友們住地下，所以我地全部去左朋友既房食。一入到去，照例成枱已經係精美器皿盛載住既美食，我地一人有五片厚切既鳥取和牛。呢五片和牛放上鐵板上燒，燒完入口真係入口即溶，牛油香又係爆滿口內。不過始終都同第一日既 A5 差少少，不過都有 90 分既質數。

鳥取和牛

到燒鮑魚，隻鮑魚新鮮生猛郁郁下咁放上鐵板上燒，好彩佢有個蓋，所以睇唔到佢慢慢燒死。我好記得十七年前，即 2000 年，第一次係箱根住一泊二食既溫泉旅館，就係睇住隻鮑魚慢慢係面前燒死，佢不斷想逃走，但又走唔出個殼，到而家講返都歷歷在目。新鮮鮑魚即燒，然後切片食，中間仲有未熟透既鮮味，鮮鮑魚真係簡單咁燒已經好好食。