201709 日本山陰第二日 - 境港

我地係米子住既 Super Hotel 包早餐，早餐主要係日式，所以係食飯。我地食完早餐就去車站坐 8:42 既 JR 去境港。境港係鬼太郎作者水木茂既故鄉，因此境港市而家變左係鬼太郎既故鄉。由米子去境港會有鬼太郎列車行走，係車站會列出鬼太郎列車時間表，我地坐呢班剛好係貓女列車，成架車由內到外都畫滿貓女，而車內廣播亦都由貓女講出黎。由米子到境港途中各車站亦都會以鬼怪命名，境港呢個鬼太郎故鄉當然係鬼太郎站啦！

坐貓女電車

境港鬼太郎站

境港鬼太郎站內

經過 50 分鐘車程，我地到達境港車站。一出車站，不論你係任何地方，一定會見到有關鬼太郎既野，道路維修會有鬼太郎雪糕筒，街燈係鬼眼爸爸，的士車頂燈箱又係鬼眼爸爸，飛髮舖又係鬼太郎，連洗手間指示牌都係。由車站至水木茂紀念館呢條路叫做水木茂之路，大約有八百米，本來道路兩旁放滿不同妖怪既雕像，最近水木茂之路開始大改革，所以將妖怪雕像搬到車站旁一個公園，佢地仲美其名話因為佢地要開世界妖怪會議，所以搬晒過去。

車站前既水木茂及鬼太郎

郵筒

巴士

世界妖怪會議

世界妖怪會議

妖怪神社

燈，廁所指示牌都咁有趣

賣酒既商店

理髮店

地下既水渠蓋及電話亭

沿水木茂之路行，你會不斷拎部相機出黎影相，因為真係不斷有關於妖怪既野出現。我地已經冇咩入去商舖睇野，但都行左四十五分鐘先去到水木茂紀念館。係紀念館旁，有間妖怪食品研究所，我見黎親境港既人，都會幫襯買一對鬼眼麻糬。大家旨在放對鬼眼麻糬係自己塊面影相。

鬼眼麻糬

水木茂紀念館展出水木茂既畫作及一些有關妖怪既資料，入場費每位 ¥700，不過只要係外國遊客，就特價 ¥300 一位。之後既行程，有好多景點都有外國遊客特價，所以我覺得鳥取同島根縣對外國遊客真係幾好！

水木茂紀念館入口既鬼太郎

水木茂紀念館

我地今日要趕坐 13:35 電車返米子，再去鳥取花回廊，所以 11:30 就去食午餐。一講日本既蟹，大家必會想起北海道。但原來日本產蟹量最多既係鳥取縣，比北海道多四倍，所以鳥取縣又有人叫蟹取縣。九月份未到松葉蟹既季節，但可以去食紅楚蟹，價錢非常平民。我地去左一間叫「かにじまん」既餐廳，佢有一個原隻紅楚蟹餐，價錢只係 ¥ 1,500。呢個餐張一隻紅楚蟹跟飯一齊蒸，再跟個蕎麥麵、湯及甜品，真係超晒價。不過一分錢一分貨， 紅楚蟹比松葉蟹平咁多，味道當然冇松葉蟹咁肉質肥厚及鮮甜啦！但以 ¥ 1,500黎講，值得一試！

かにじまん 餐廳

紅楚蟹餐

紅楚蟹餐

我地準時坐 13:35 電車返米子，今次又係坐貓女列車，所以冇影相，全程差唔多瞓足 50 分鐘。返到米子車站，車站前既巴士站有免費車接載去鳥取花回廊 (とっとり花回廊)，不過又係一個鐘一班，我地坐最後 15:00 個班。見仲有時間，入左去米子車站既咖啡店坐下。

去鳥取花回廊既免費車

由車站坐免費車去鳥取花回廊大約 25 分鐘車程，而最後一班車係 16:45 開出，所以我地只係得一小時十五分鐘左右。鳥取花回廊入場費  ¥ 1,000，外國遊客特價  ¥ 500。鳥取花回廊佔地達五十公頃，係全日本最大規模的花卉公園，園正中有一個溫室，一年四季都有不同品種既花盈開。不過九月就真係比較少花，成個園最靚只有一大片紅色既一串紅花田。而其他地方既花都比較少，反而過幾日之後去既松江花鳥園仲多靚花睇。去完鳥取花回廊真係有少少失望。

鳥取花回廊

溫室

溫室內

花回廊空中走廊

呢度冇咩花

返到米子車站，又走去 AEON 超級市場買生果，今次買左巨峰提子及鳥取廿十世紀梨。

巨峰提子, 鳥取廿十世紀梨, 番薯及杯麵

今日既晚餐去左一間係 Tabelog 超高分既居酒屋 「旬門 米子本店」，地點位於米子車站前既大街。我地被安排於一間獨立既房間，餐廳以 Tablet 為餐牌，並可直接按圖落單，好方便。我地叫左刺身、壽司、雞翼、天婦羅、串燒、以及鳥取一帶最出名既白魷魚刺身。唔駛講，係日本居酒屋食，一定質數又好，價錢又平啦！

旬門 米子本店