今日好早就起身，諗住先去內湯浸溫泉。但係禽晚既水浸仲未整好，所以今朝佢開放貸切風呂比男士使用。我去到貸切風呂，有一個室內及一個露天風呂，我入到去得我一個人，變成我自己獨佔既貸切風呂，太好啦，最重要係免費！
 |
| 今早既水位仲係好高，個野湯都浸晒 |
早餐係傳統溫泉旅館既燒魚、豆腐、溫泉蛋、漬物、白飯。有人鐘意早餐食自助餐，款式多，份量多。但我反而喜愛傳統一碟碟細細碟又精緻既日式早餐。
今早天氣同禽日十百八十度轉變，烈日當空。禽日出唔到去附近影相，今早趁離開前出去行下。我地走到河邊，本來河邊有個野湯，但河水已將佢淹過。另外有個叫藥師の湯既足湯，又唔知點解係乾既！冇溫泉水既！好奇怪！
 |
| 冇水既足湯 |
我地 9:30 離開三朝溫泉，跟住揸一個鐘車，去到鳥取最有名既名勝，鳥取沙丘。鳥取沙丘南北寬2.4公里、東西長16公里，面積非常之大。當我地行到入去沙丘，真係好厲害，面前一大片沙，係遠處仲有座好高既沙丘，好多人都行左上去。之前上網見過鳥取沙丘有騎駱駝、滑翔傘及滑沙等活動玩，但我係沙丘一樣都見唔到。不過算啦！我地行左去最高既沙丘，影下相，幻想下自己係沙漠，已經非常過癮！
 |
| 沙丘後面就係大海 |
係沙丘附近有一座砂之美術館，內裡有好多大型沙雕，而沙雕會不時轉主題，我地呢段時間係以美國為主題，所以有太空人、瑪莉蓮夢路、自由神像、荷李活及西部牛仔等既沙雕。沙雕擺放得好集中，大約 15 至 20 分鐘可睇晒。砂之美術館入場費係 ¥600 ，一場黎到，時間又唔會花太多，都值得入黎睇下既！
係鳥取海邊有個魚市場叫賀露港，呢度梗係食刺身、海鮮出名啦！我地由沙丘揸 15 分鐘車就黎到。之前我做定功課，搵左一間叫海陽亭既餐廳食午餐，呢間餐廳網上評價不俗架。我地 1:30 去到海陽亭，都要等一陣位。我地叫左海鮮丼及鳥取出名既白魷魚刺身。白魷魚刺身晶瑩雪白，真係正既。海鮮丼好豐富，有蟹、海膽、鮑魚、吞拿魚等，見到已經覺得正。不過一食入口，唔新鮮喎，海膽有怪味，其他刺身都唔得，雖然只收 ¥2160 ，但平都要好食架，我專登黎魚市場，食呢個質數既刺身，真係想反佢枱。
 |
| 海陽亭 |
 |
| 海鮮丼 |
 |
白魷魚刺身
好辛苦咁捱左呢碗海鮮丼，跟住係魚市場行下。魚市場內有一間間少舖都有海鮮丼，價錢平過海陽亭，望落去都幾新鮮，早知係呢種小店食仲好。賀露港除左魚市場，仲有農產品及和果子手信賣，我地係呢度大手入左鳥取廿十世紀梨及好多盒手信，呢度既價錢比出面平少少架！
|
 |
| 旁邊既魚市場 |
 |
| 仲有個地方可以買農產品及手信 |
我地既現金已經所餘無幾，所以急切要搵 ATM 機提款。我地揸車去市中心鳥取火車站，網上搵到附近有間大和証劵係有 Seven Eleven 既 ATM (Seven Eleven ATM 係接受銀聯提款卡)。去到大和証劵，因為今日係假期，所以冇開門。佢地既 ATM 機唔似香港咁放係外面，佢地係放入面，冇開門就冇得入去用 ATM。咁多嘗試去火車站，博佢有可以接受銀聯既 ATM，點知佢真係多唔同銀行既 ATM 機，但都係冇一部收銀聯。我即刻上網搵下附近有冇郵局，係火車站不遠處有間好大既鳥取中央郵便局。行到去，終於搵到可以收銀聯既 ATM，呢度既 ATM 假期開放時間係 09:00-19:00，好彩解決到冇現金呢個問題！
 |
| 鳥取中央郵便局 |
 |
| 好辛苦咁終於搵到呢兩部可以用銀聯或 PLUS 既提款機 |
有錢就身痕，我地即刻上車，然後揸車去鳥取市既驚安の殿堂購物，跟住仲去埋鳥取北既 AEON Mall。呢間 AEON Mall 真係超大型既 AEON Mall ，唔似米子個間，不過時間有限，我地好快咁行左一陣，然後搵左間拉麵店食左晚餐。
 |
| 鳥取市既驚安の殿堂 |
 |
| 食晚餐既拉麵店 |
晚上我地趕車由鳥取揸車去豊岡，我地 8:30 出車，係漆黑既路上，我都唔知自己行緊山路定係公路。揸左一個半鐘車，去到位於豊岡既酒店
豊岡スカイホテル 。呢間酒店，完全只係借宿一宵，因為第二朝一早，我地又開車離開豊岡。
 |
| 豐岡晚上條街冇咩人 |
No comments:
Post a Comment