從來都冇考慮過去越南，又係多得香港航空出左條越南峴港直航線，所以先有呢個行程。上網搵下峴港既資料，發現都幾多野玩，可以去有歐洲式建築物既 Ba Na Hill、去全世界十大漂亮沙灘之一既峴港沙灘行下、又可到會安古城睇滿街燈籠。交通方面，本來有打算租車自己揸，不過諗諗下都係坐的士算啦！因為峴港交通都幾亂，時常會見到逆線行車，十字路口又亂駛出黎，都幾危險！
 |
| 坐粉腸去峴港 |
講一講越南簽證！最正路係去越南領事館申請，價錢六百至千三，睇你係申請單次或多次簽證。另外可以搵旅行社代辦，單次入境，$700 左右，比自己去領事館貴少少，但慳左唔駛自己去領事館既時間。最後，亦係我用既方法，搵網上中介，然後落地簽証。我上網搵左一間中介，填好個人資料，網上用 PayPal 比左 US$8 (一個人)，過兩三個工作天，就會經電郵收到一個成功申請既確認信，記住要印確認信出黎帶埋去越南。網上中介最大既問題係呢封確認信唔單止有你既名、護照號碼及出生日期，仲有其他差唔多時間經呢間中介申請既人既資料，換言之，即係其他陌生人都會見到你既名、護照號碼及出生日期，冇晒私隱。當去到峴港機場，係拎行李附近有一個窗口仔，就係申請落地簽證既地方，我地比左我地本護照，確認信及每人 US$25，跟住等十分鐘左右，佢叫你名，你就可以攞返本護照入境。網上中介呢個方法，每人一共只係 US$33 (HK$260)，係最平同方便既方法，唯一係要唔怕比陌生人見到你個人資料。
講返行程！我地坐下午 4:30 飛機，機程唔駛兩個鐘，係當地時間下午 5:25 到達。辨好入境手續，然後係機場既電訊公司櫃台買左電話 Simcard，US$6 一張，包 2GB 。跟住就去機場既找換店換越南盾，好多人話用美金換係比用港元抵，所以我都帶美金黎換。美金個價係 VND22,420 至 VND22,200，港元係 VND2,837。我唱左 US$530 (HK$4117)，收到 VND11,876,900。如果直接用港元 HK$4117 唱，就會收到 VND11,680,945，相差 VND195,955，即係約 $70 港元。大家自己諗下值唔值專登唱美金去啦！唱完錢，有成千萬係手上，錢包都放唔晒，真係未試過手上咁多錢！
 |
| 找換店換越南盾 |
 |
| 買 Simcard 既櫃位 |
 |
| 成千萬係手 |
係機場搞左都個半鐘，7:00 我地先去坐的士到 Mai Boutique Hotel，Mai Boutique Hotel 位於峴港海邊附近，係一間小型酒店，價錢好平，所以冇咩設施，房間地方好大，同乾淨，不過個裝修有少少老土。地點就唔係咁好，我地去到先知附近仲係發展緊既地區，好多空置既地皮，所以附近冇咩商店。大家去峴港，我建議搵返旺少少地區既酒店。
 |
| Mai Boutique Hotel |
 |
| 接待處 |
 |
| 我間房 |
去到峴港，好多人都介紹去食海鮮，網上好多人都幫襯一間叫 Quan Be Man B 既餐廳，由酒店行過去，大約 15 分鐘。Quan Be Man B 係一間好簡陋既餐廳，似香港大牌檔，不過就真係人頭湧湧，好多人幫襯。
 |
| Quan Be Man B |
 |
| 座滿晒人 |
係峴港食海鮮跟我地係鯉魚門既程序差唔多，首先去到魚缸前挑選海鮮。呢間野有個職員識講國語，所以溝通到！越南蝦一向都好出名，我地叫左一人一隻大頭蝦，隻蝦極大隻，成隻小龍蝦咁大，蝦頭內又勁多膏，係必食既海鮮。另外我地仲叫左魷魚、大蜆及賴尿蝦。所有既海鮮都真材實料，非常新鮮，煮法又好啱我地口味。我地四個人呢餐食左 VND2,750,000，即係約港元 HK$950。其實都有少少近似香港食海鮮既價錢，我好懷疑以越南當地人既收入，冇咩可能去食咁貴既海鮮。
 |
| 挑選海鮮既地方 |
 |
| 我地既海鮮 |
 |
| 越南 Tiger 啤 |
 |
| 超大隻既大頭蝦 |
食完飯，飽飽地，我地就行左超過大半個鐘，去搵地方按摩。我係網上搵左一間叫 Noah Spa ，我地行到去，因為接近關門時間，所以只接受半小時按摩，咁我地唯有走去搵另一間。係條街行下行下，見到一間幾層高既，有好多韓文既按摩店，我地入去真係韓國人開既。一入去，裡面既職員見到我地，好似有少少奇怪，我地問佢想按摩，佢話 ok，跟住帶我地去一間按摩房，女士們就咁係按摩房換衫，男士就有個正正常常有儲物櫃既更衣室換衫，男士更衣室入去仲有浴池、桑拿。點解男士既設施咁齊全，女士冇既？點解呀？典解呀？男士換完衫就返去按摩房會合女士們，我地係房等左一陣，個職員入黎話唔好意思，今日搵唔到按摩師，不過可以免費比男士們地浴池及桑拿。我地男士冇可能自己去浴池及桑拿，女士係度等，所以我地換返衫就走啦。
我地再係街度搵，跟住入左去另一間又係韓國人開既按摩店 Beach Spa。其實呢一帶好多店舖都有韓文，我估呢度係峴港既韓國街。今次入到去見到有其他女士幫襯按摩，應該冇問題掛。老闆見我地四個人，即刻打電話搵按摩師，等左十幾分鐘，終於可以按摩啦。我地一個鐘既全身按摩，一個人約 HK$135。呢間既按摩都幾好，唯一既問題係有兩個按摩師，一路按一路傾計。
按摩後，我地就坐的士返酒店。今次係我地第一次係越南坐的士，呢程大約一公里，坐左 5 分鐘左右。車費只係 VND15000，即HK$5 左右。平到咁，唔駛諗啦，呢幾日不論遠近都照跳上的士啦！
 |
| 晚上冷清清既峴港街頭 |
No comments:
Post a Comment