Joseph@外地遊記: 201609 瑞士第十二日

2016/09/20

201609 瑞士第十二日 - 蘇黎世 (Zurich)

今日係行程最後一日啦！今晚坐 22:45 瑞士航空直航返香港，所以我地仲有一日時間遊覽蘇黎世。今日既早餐係酒店房食埋最後一個杯麵，懶得帶返香港。

9:00 我地出發去 FIFA 世界足球博物館 (FIFA World Football Museum)。FIFA 世界足球博物館係由國際足協 (FIFA) 營運，於 02/2016 開幕，只係開左七個月。我地比開門時間早左少少到，所以要係門口等入去，目測當時都只係得十數人等入場，博物館入場費 CHF24。

FIFA World Football Museum 係 Zurich Enge 火車站對面

FIFA World Football Museum

張入場卷都好精美

因為唔可以帶袋入去，所以要將物品放去儲物櫃。當我地跟指示去到一間房，一個個彩色繽紛既儲物櫃出現眼前，佢最醒係每個櫃門都寫左球星既名，大家好似真係可以見到真人咁，係度搵自己喜愛球星既儲物櫃。一個普普通通既儲物櫃，即時變成打卡景點！

美斯儲物櫃

博物館樓高四層，我地一入去，首先可以見到排晒 211 隊足協會員國既球衣，佢仲要跟顏色去排，好壯觀！跟住我地去到地下第二層，呢層展出有關世界盃既歷史、每一屆既吉祥物、參與球隊既珍貴物品，另如阿根廷奪冠時馬勒當那穿過既球衣，或者當時被用過既足球，內容好詳細及豐富。上到一樓，有個遊戲地帶，可以透過遊戲考驗大家腳法。另外仲有好多影片講下足球及社區既關係。最後二樓就係賣紀念品既商店及咖啡室。因為呢間博物館好新，所以場內有好多互動既裝置，如果真係慢慢睇、慢慢玩，真係可以玩足大半日。

不同國家既球衣

1946 第一個世界盃獎杯

呢部機有全世界球隊既資料

不同年代既足球及球鞋

阿根廷奪冠時馬勒當那穿過既球衣

有好多遊戲比遊客一展腳法

午餐我地返去蘇黎世市中心，光顧一間叫 Zeughauskeller 既餐廳，有好多人叫呢間餐廳做軍火庫餐廳，因為佢係 1927 將原本真係軍火庫既地方改建而成，而家餐廳內四周仲有軍火器械既擺設。軍火庫餐廳係食瑞士及德國菜，我地點左鴨胸配瑞士薯餅 Rösti 及德國香腸配薯仔沙律，然後再叫左兩杯檸檬茶。個鴨胸同香腸又真係唔錯，而個瑞士薯餅係好好食，好食過早幾日係 Interlaken 食既薯餅。呢一餐兩個人 CHF68.5。係瑞士已經十二日，對價錢亦已經麻木左，其實係瑞士食咩都唔平，咁不如唔好理，想食就食，比多少少食好少少啦！

Zeughauskeller 餐廳

軍火器械

大炮都有支

瑞士薯餅、鴨胸及香腸

蘇黎世市內景點都係去下教堂，上小山丘睇下景。我地食完飯，先去左聖彼得教堂 (St. Peter)，Fraumunster 教堂及Grossmünster 教堂，呢三個已經係蘇黎世四個主要教堂之三。跟住就去左小山丘上既 Hill Lindenhof 觀景台睇下景。

火車站前大街

FC Zunich 球隊既博物館

小山丘上

行到咁上下，我地去左一間飲熱朱古力好有名既 Café Schober 下午茶。我們學歐洲人搵左個戶外既位，叫左兩杯熱朱古力及一件蘋果酥，大家見我以往去任何地方食 Tea，大多數都係叫蘋果批、蘋果撻、蘋果酥，次次都係蘋果既甜品，因為我真係好鍾意食蘋果！呢度既熱朱古力真係真材實料，好香好濃，蘋果酥好大件，味道不過不失。

Café Schober

我地坐係度就係望住人地背脊

我地係市內再行左一陣，跟住就坐車返酒店，7:30 由酒店去機場。瑞士有一家專賣 Luxembergerli 甜品及朱古力既店舖，叫做 Sprüngli 。首先講下咩係 Luxembergerli，簡單講就係迷你版既 Macaron。係機場有間 Sprüngli 專門店，我地入左去試食，真係好好食，所以即刻買左帶返香港。Sprüngli 除左機場有之外，蘇黎世市中心都有。