201609 瑞士第九日 - 琉森 (Luzern)

本來今日打算上去鐵力士峰 (Titlis)，但天氣預測話鐵力士峰會落雨，而我今早上鐵力士峰網站睇下佢個直播鏡頭，山上又真係白茫茫一片。所以唯有取消呢個行程。其實附近一帶天氣都唔好，所以我地只好留係琉森市內觀光。

係酒店食完歐陸自助早餐，10:00 揸車去琉森市，我地泊返禽晚泊既停車場。由停車場行去市中心，首先去到聖萊奧德伽爾教堂 (Hofkirche St. Leodegar) 參觀，唔知係唔係真係「上帝早已預備」，一去到教堂，教堂上空既雲就散開，比我地影到有藍天既教堂。

琉森湖畔

聖萊奧德伽爾教堂

聖萊奧德伽爾教堂

藍天下的琉森

難得天氣好左少少，我地走去湖邊影下相。湖邊有間租船既檔口，佢有兩款船出租，一款係用腳踩既船，另一款係電動船。見個天都光光地，今日又冇其他野好做，所以決定租隻電動船，係琉森湖上面玩下。玩一個鐘 CHF 50，即約 HK$400。呢架船用軚盤轉向，好易操作。琉森湖上唔係太多船，所以唔駛怕要左穿右插。我地係歐洲建築圍住既湖上，揸住架遊艇仔係湖上漫遊，真係自我感覺好有型。

租船玩

我地架船仔

出發

玩完遊艇仔，係對面街有周未跳蚤市集 (Weekend Flea Market)，呢個臨時市集有好多即製熟食，仲有得試食。我地買左少少野係度食當係午餐。

周未跳蚤市集

琉森保留左一段建於十四世紀既舊城牆叫穆西格城牆 (Maseggmauer) ，經過咁多年，而家只剩下九百多米城牆及九座塔樓。由市中心行去城牆唔係太遠，遊客可以登上城牆，有幾座塔樓更開放比大家上去欣賞琉森市既風景。

穆西格城牆

城牆上睇琉森市

琉森湖

塔樓

塔樓內既鐘

今日其實已經冇其他行程，所以餘下既時間，我地就係舊城區行下街，食下午餐。晚餐我地走左去琉森火車站既 Coop 超級市場買左燒雞，然後返去酒店房配我地由香港帶黎既杯麵。

經過都要影下相

下午茶

買野返酒店房食晚餐

燒雞配杯麵

燒雞

食完燒雞同杯麵，我地又揸車返去市中心，影下琉森市既夜景。今次我地冇泊停車場，我地泊左係卡貝爾橋 (Kapellbrucke)橋頭附近既街錶，好方便！

橋上

宵夜