Joseph@外地遊記: 201609 瑞士第二日 - 倫敦，日內瓦 (Geneva)

瞓到大約清晨五點幾，起身快快執好野，就去坐 6:11 既 Hoppa 返去希斯路機場。本來酒店係包早餐，不過因為太早，所以仲未有得食！去到希斯路機場，冇禽晚咁多人，半個鐘左右就寄好行李，出埋境，去到候機大堂。我地走左去 Lounge 食早餐，因為比預算早左，所以可以輕輕鬆鬆慢慢食。英國既 Lounge 有晒香腸、炒蛋、茄汁豆等比你自己整個英式早餐，真係幾好！

6:51 去到希斯路機場

Lounge 食早餐

都幾多野食

英式早餐

短途機一向都好準時，我地架機 08:55 起飛，個半鐘左右，係瑞士時間 11:30 到達日內瓦機場。機場唔係太多人，半個鐘就過左海關，拎埋行李。要由日內瓦機場去市中心，可以係拎完行李，出去之前，有一部機，拎一張免費車票，然後免費坐火車入市中心，呢張免費車票有效時間係 80 分鐘。去到市中心，當入去酒店 check-in，酒店又會比另一張免費車票你，呢張車票就比你係日內瓦住幾多日，就可以有幾多日免費坐公共交通工具，即係係日內瓦，你係完全唔駛錢搭車。

坐瑞士去日內瓦

拎免費車票既機

火車去市中心

由機場坐左六分鐘車就去到日內瓦火車站。我地訂左係火車站附近既 Residence Studio Geneve Centre 住一晚，我地先去 check-in。呢間野係 Accor 集團，check-in 要去旁邊 Novotel 既櫃檯。上到房，係一間好簡陋既房，得張雙人床、一張小書檯、一個好細既開放式廚房。間房好暗，地方又唔係太乾淨，我見到牆角仲有個有蜘蛛既蜘蛛網。好彩個浴室係番新過，好光猛同乾淨。另外唔知係唔係因為冇開冷氣，間房好熱，我即刻開大個冷氣，希望今晚返黎會涼返！

Residence Studio Geneve Centre 既房

出到去先去搵下邊度有上網 simcard 賣，本來我想買一張 Lycamobile 既卡，CHF19.9 可以有 5GB 同用 30 日。網上面話可以去郵局或一間叫 Interdiscount 既大型電器店買。今日係星期日，郵局冇開門，我走左去兩間 Interdiscount 又話冇得賣，咁我唯有去普通電訊商既門市買。我先去左 Swisscom，CHF19，得 600MB ，1.2GB 就要 CHF29，都幾貴。跟住入左去一間叫 Salt ，其實即係 Orange (即香港既 3)。佢用 CHF10 ，可以買一張面值 CHF20 既儲值卡，每日 CHF1.99，就可以無限上網，即係可以用到 10 日，好抵喎。雖然我地係瑞士十一日，不過我地買兩張卡，一張今日開始用，另一張聽日先用，咁未可以夠十一日囉！(雖然我咁諗，但我都係唔夠 3 玩，唔知點解中途會扣多左面值，搞到最後個日，兩張卡都用唔到。

Salt 買左電話卡

日內瓦景點唔係太多，半日時間都夠晒。我地先沿湖邊行去英國花園 (Jardin Anglais)，花園有一個建於 1869 年既花鐘（L'horloge fleurie）。一提起花鐘，我就諗到台灣陽明山既花鐘，大家都係斜斜地，上面鐘面種左不同既植物，講真，其實冇咩特別，行過影張相！

湖邊

花鐘

Montblanc 大道

日內瓦市內最熱鬧既係地方就係 Rue de Rive 至 Rue du Marche 呢條街。成條街只有電車行使，唔淮車輛使入。街既兩邊開滿不同既店舖及百貨公司，可以話係日內瓦既彌敦道。

Rue de Rive 大街

午餐我地去左 Place de Molard 廣場旁既 Globus 大百貨公司內高級版 Food Court。簡簡單單食左件薄餅同一件蘋果批。因為係 Food Court，價錢都唔係太貴，CHF5 (HK$41) 一件薄餅，CHF4.8 (HK$40) 一件蘋果批。

Place de Molard 廣場

Globus 大百貨公司

買午餐

午餐

由 Rue de Rive 大街行上山，可以去到聖彼德大教堂 (Cathedrale Saint-Pierre Geneve)，教堂冇咩特別，經過不妨影張相，入去睇下。

行去教堂途中見到有木馬

聖彼德大教堂

日內瓦最具代表性既景點一定係湖上面既大噴泉 (Jet d'eau)，呢個人工噴泉由一部高壓抽水機，將湖水打上 140 米既空中，每秒噴出 500 升既水。係日內瓦大部份地方都可以見到呢條大水柱，就算今朝飛機降落時，離遠都可以見到！

日內瓦湖邊

今早係飛機上面都見到大噴泉

大噴泉

我地行去湖既東面，有一條路伸出去湖中心大噴泉既底部，我去行左出去睇，去到大噴泉底，見到強勁既水噴出黎，我厲害！今日好彩吹東風，風力張噴出既水吹左去湖上，冇照頭淋落去條路度。

有細細架既船可以租黎玩

近看大噴泉

日內瓦另一個著名地點係聯合國總部 (Palais des Nations)，聯合國總部設有導賞圍，有專人帶入去參觀，不過我地今日星期六係冇既。我地坐 15 號電車去到 Nations 站落車，係門口既大廣場影下相，透過個閘偷望下聯合國總部裡面。算係到此一遊！

聯合國總部

聯合國總部外廣場既三腳椅

坐電車返去日內瓦火車站，先去票務處買左張 Swiss Half Fare Card，每張 CHF120，差唔多成一千蚊港幣，有效期係一個月。雖然我會租車玩瑞士，但計過數，上少女峰及策馬特峰坐登山火車，有半價已經值回票價！

火車站

今日既晚餐，我地去左聖彼德大教堂附近一間叫 Restaurant Chez ma Cousine 既烤雞店。網上好多人都有介紹呢間烤雞店，唔太貴，又好食！我地冇訂位，都只係等左幾分鐘就有位啦！入到呢間舖，只有烤雞同沙律呢兩味，半份烤雞配薯角及沙律，CHF 15.4，都只係 HK$125 左右，真係唔貴。烤雞唔算太大隻，肉質算嫩，但烹調方法不算特別，味道好普通。不過以瑞士既物價，算係比足晒功課。算平平地食一餐，都可以一試！