201609 瑞士第四日 - 西昂(Sion)，策馬特 (Zermatt)

今日向策馬特 (Zermatt) 進發，由酒店座落既 Chexbres 小鎮去策馬特要兩個半鐘車程。我選擇係中途既西昂(Sion)停一停行下同食午餐。今早瞓到好晏，差唔多九點先起身，因為酒店唔包早餐，我地係房食左麵包、杯麵及生果。跟住大約 10:15 開車離開！

今早係房既露台望出去

露台食我地既早餐

一個鐘車程，我地就去到西昂。西昂最著名係有兩座建係兩個山峰上面既中世紀城堡，一座係瓦萊城堡 (Chateau de Valere)，另一座係托魯比恩城堡 (Chateau de Tourbillon)，兩座城堡遙遙相對，好有趣！

經過西昂火車站

西昂街頭, 後面有雪山

城堡就係上面

經小巷上城堡

我地泊好車就行上山，當去到半山既 Place Maurice-Zermatten 廣場，就係去兩個城堡既分叉路，左邊既山路就係去托魯比恩城堡，右邊既山路就係去瓦萊城堡。我地見右邊好似冇咁高，所以就上左瓦萊城堡。途中有一間小教堂，後面有托魯比恩城堡做背景，係好好既影相位。上到瓦萊城堡，入面係一個藝術館，我地冇入去睇，反而走到觀景臺，高處欣賞整個西昂古城既景色。我地沿路落返去 Place Maurice-Zermatten 廣場，睇見上另一座城堡條路都好甘，決定放棄，行返落城醫肚算啦！

Place Maurice-Zermatten 廣場

托魯比恩城堡

瓦萊城堡

上瓦萊城堡途中既風景

上瓦萊城堡途中既風景

上到一半有座石教堂

遙望托魯比恩城堡

遙望托魯比恩城堡

瓦萊城堡

瓦萊城堡上睇到遠處既雪山

西昂

我之前上網搵左一間出名食漢堡既餐廳，叫 Holy Cow!。其實正確黎講，呢間係似老麥既快餐店，不過就高級少少，標榜用瑞士牛肉。我叫左個 BIG BEEF 套餐，有一個飽，薯條及一枝汽水，價錢係 CHF15.9，即係約 HK$130，嘩！好鬼貴！呢度既漢堡及薯條都算好味，係中上既水準，不過以快餐店方式，我覺得好貴囉！

食漢堡

西昂市內廣場

西昂教堂

西昂教堂

我地食完就係城內行左一陣，睇下教堂。大約 2:00 就離開前往策馬特。策馬特係一座無車小鎮，所有用汽油既車都唔可以入去，鎮內只可以電動車及馬車代步。我地先揸一個鐘頭十五分鐘車去到塔什(Täsch) ，泊好車，然後帶住行李去坐火車入去策馬特。塔什既停車場係 CHF15.5 一日，我地會係策馬特住兩晚，所以有兩日唔使用車！

到達塔什(Täsch), 見到後面有好高既雪山

由塔什去策馬特既火車每二十分鐘一班，車程只係十二分鐘。單程價錢每位 CHF8.2，我地用半價証，所以每位 CHF4.1。一出策馬特火車站，可愛既小鎮就呈現眼前。大街兩旁全都係傳統小木屋，石板路上不時有馬車經過，街上眾多遊人，完全係大家心目中歐洲度假小鎮既景色！

泊好車, 坐火車去策馬特

策馬特火車站

我地今明兩晚住係 Residence Patricia 住宅式公寓，呢間野係由 Best Western 集團經營，所以我地要先去 Best Western Alpen Resort Hotel 酒店既接待處 check-in，拎左鎖匙後，就再行一段路去我間住宅式公寓。我住間房位於三樓，面積有 25 平方面，全開放式設計，有客廳、有廚房，另外仲有個大露台，可以見到著名既馬特洪峰 (Matterhorn)。今次成個瑞士旅程，我覺得最舒適係呢間住宅式公寓。唯一既缺點係離策馬特主要大街 Bahnhofstrasses 有一段距離，大約有十分鐘路程。要去大街食野，買日用品補給，一來一回都要行成二十至三十分鐘。

Best Western Alpen Resort Hotel 酒店

先去 Check-in

我地住既 Residence Patricia

我間房

有個客廳仔

露台見到馬特洪峰 (Matterhorn), 不過今日有少少雲

我地安頓好都大約下午 5:00 ，今日其實已經冇咩野做，所以走去行下 Bahnhofstrasses 大街。難得我地間 apartment 有廚房，我地走去火車站對面既超級市場買野返去煮，順便買埋聽日既早餐，同下午上到山食既食物。返到 apartment，我整左個湯，沙律做頭盤，主菜有煎牛扒同薯仔，甜品更係 Movenpick 雪糕。最可惜係因為聽日上山，我驚有高山症，所以今晚唔飲得酒。

Bahnhofstrasses 大街

Bahnhofstrasses 大街

大街上既教堂

自已煮晚餐食