Joseph@外地遊記: 201609 瑞士第六日 - 格里姆瑟爾山隘 (Grimselpass)，格林德瓦 (Grindelwald)，少女峰 (Jungfraujoch)

今早係 Apartment 整左簡單既早餐，煎蛋火腿加麵包，然後執好野離開策馬特 (Zermatt)。今日原本既行程係慢慢揸車去全球十大危險公路 - 格里姆瑟爾山隘 (Grimselpass)，沿途停下小鎮食下野及行下，再去 Grimselsee 人工湖及 Grimsel Pass Dam 水壩行下，預計黃昏去到格林德瓦 (Grindelwald)，好悠閒既行程。然後明日一早就上少女峰 (Jungfraujoch)。

不過睇左天氣預測，明日及後日少女峰既天氣都好差，只有今日既天氣比較好。上少女峰要成千蚊港幣，如果上到去天氣唔好，又浪費金錢又浪費時間，所以我決定由策馬特飛車去格林德瓦，今日上埋少女峰。

我地坐 9:35 火車由策馬特返去塔什(Täsch)既停車場攞返架車，然後直接揸左大約兩個鐘車去到格里姆瑟爾山隘。由塔什去格里姆瑟爾山隘其實經過好多好靚既小鎮，如果有時間係好值得停車行下同影相。

沿途既美景

係其中一個小鎮停一停車

全球十大危險公路 - 格里姆瑟爾山隘，我地望見已經覺得好誇張，公路以連續多個「之」字型路段上山，真係從來冇見過咁既建築。係山腳先影張相，然後出發上山。揸到上去條公路，其實都好闊，係「之」字型時既 180 度彎要收到好慢去過。上到山上，再望返落去條路，真係鬼斧神工！

格里姆瑟爾山隘

格里姆瑟爾山隘既公路上

由山上睇返落去

因為趕時間去少女峰，Grimselsee 人工湖都只係停一停車影張相就算。我地揸左一個半鐘車，係下午 1:30 左右去到格林德瓦。為左慳時間，我費事先去今晚住既地方 check-in 先，直接揸去登山火車站旁既停車場，快快泊好車，然後衝去車站。

其中既人工湖, 好奇特既地貌

好好彩，買左飛，跟住就即上 1:47 既登山火車。呢張飛用左半價証都要 CHF 92 一個人，好鬼貴。由格林德瓦坐呢架火車，先坐半個鐘去到半山既小謝德格 (Kleine Scheidegg)。呢個站係補給既地方，有餐廳，有商店。而環山包圍既景色亦非常壯觀。不過呢度既指示就唔係咁好，我落左車，得十分鐘左右時間轉車，但冇咩指示牌指我去邊度轉車，問左幾個人先知道要去邊，都係又趕又驚咁去轉車！

趕到去格林德瓦火車站

火車出發上少女峰

格林德瓦真係好靚

小謝德格車站轉車

小謝德格

由 Kleine Scheidegg 上到山頂呢程大約一個鐘，呢段路段係最斜既路段，大部份係山內開鑿出黎，以當時開鑿既技術，真係好大毅力先做到！全程會停兩個站，停站最主要係比大家適應高山既氣壓，減少高山症既症狀出現。

上山途中停既站

上到有海拔 3454 公尺既歐洲最高火車站已經係下午 3:30 左右，尾班火車落山係 5:17 ，我地有一個多小時既時間係度行下。我地先去觀景平台睇下三大峰，有歐洲之巔 - 少女峰 (Jungfraujoch)，艾格峰 (Eiger) 及僧侶峰 (Monch)。出到去觀景平台，超凍，超大風，直情大風到呼吸唔到。少女峰頂有雲，睇唔到成個峰，僧侶峰就好彩未有雲。我地快速衝出去平台，快速影張相，跟住衝返入去室內。所以影出黎既相個頭好似癲雞咁。係平台望遠處仲可以見到最長既冰河阿雷奇冰河 (Aletsch Glacier)。

觀景平台 (影人地既相)

觀景平台

雲中既少女峰

阿雷奇冰河

僧侶峰

行返去室內，跟住我地去在由萬年冰中鑿出黎既冰宮 (Eispalast)，冰宮內有好多冰雕睇！最搞笑有冰河世紀卡通入面隻松鼠困左係塊冰裡面。

冰宮

另外原來仲有一處叫 Plateau 既室外觀景台，呢度可以更加近睇見少女峰。黎到呢度雖然都好大風，但冇之前個觀景台咁勁，起碼可以停低影下相。(但係個頭都係好似癲雞咁！)

Plateau 室外觀景台

離少女峰好近

我地早少少去到車站等車，然後準時坐 17:17 既車回去，大約 18:50 返到去格林德瓦。我地走去停車場攞返架車，我地停左五個鐘多少少，泊左 CHF15 ，成 HK$130，簡直係香港中環既停車場價錢。

回到小謝德格

小謝德格

由火車站駛去今晚住既酒店，好近，唔駛一分鐘就到。我地住係一間叫 Jungfrau Lodge 既旅館，旅館係傳統瑞士木屋建築，係屋內行，地板真係會發出木板既吱吱聲，不過放心，好穩陣既！我地住係三樓一間有露台既房，面積唔算大，但露台面向整個格林德瓦，景色無敵。呢間旅館係冇升降機，所以又要抬行李上樓梯，都幾辛苦。

回到格林德瓦

格林德瓦車站

Jungfrau Lodge 旅館

我間房

大露台,仲望住靚景

8:00 出發去食晚餐，我地沿格林德瓦唯一既大街行，去到一家叫 C and M Cafe Bar Restaurant 既餐廳，餐廳係一間以 Cafe 路線為主，好輕鬆既自家小店，服務員得一兩位，入到去隨意搵位。我地今餐點左合桃沙律、烤帶子蝦配南瓜及瑞士軟芝士。每碟都好有份量，先講個沙律，外國食沙律，蔬菜必定新鮮脆口，個合桃又好味，份量足夠兩個人食。烤帶子蝦配南瓜呢個好驚喜，係內陸山區都可以食到咁好味既蝦同帶子，而個份量，你地睇下張相，仲要超多蝦同帶子。瑞士軟芝士就叫黎試下呢個熱食既瑞士名菜，個芝士好似甜品心太軟咁，一切開芝士外層，內裡既芝士就流出黎，我地就搵薯仔點芝士食。我覺得都幾好食，不過始終我地唔係芝士愛好者，所以食左大半就放棄。