Joseph@外地遊記: 201609 瑞士第三日 - 布羅克 (Broc)，格魯耶爾 (Gruyeres)，蒙特勒 (Montreux)

住左一晚呢間咁差既酒店，一早 8:30 快快走人！我地係酒店附近既 Sixt 預訂左一架 Mercedes Benz A-class。預訂時，有一日上去 Sixt 網頁，突然見到個價跌左好多。我而家訂 8 日，都只係 CHF306。好多人話瑞士租車貴，好好彩又比我搵到咁平。去到辦手續時，職員話可以 Upgrade 我架車去 SUV，我唔制，我要揸 A-class。去到停車場攞車，一架好靚仔既紅色 Mercedes Benz A180 出現眼前，仲要係剛剛轉小款既 Facelift 版。上到車，好熟悉既感覺，同我自己架 A200 大同小異。

Sixt 租車

紅色型仔 A180

合照

有導航,好好用

9:30 開車，先揸車去法國 Ferney-Voltaire 既家樂福 (Carrfour) 超級市場入下乾糧同水，再買左個法飽當早餐。我地專登揸去法國既超級市場，因為物價比瑞士平。由瑞士駛去法國時，條路只有一個關員，佢好似 Road Block 咁，抽樣截停駛過既車，我就比佢抽中左。佢問我去邊，我答佢我去超級市場買野，之後返瑞士，跟住比左本 Passport 佢睇一睇，然後佢就放行啦！

去法國既家樂福

補給糧水後，我地就揸左一個半鐘左右去到位於布羅克 (Broc) 既 Maison Cailler。Cailler 係瑞士最出名既朱古力品牌之一，Maison Cailler 就係呢個品牌既朱古力廠，入場費每位 CHF12。係朱古力廠有介紹品牌既影片，有好似迪士尼樂園式既動態展品介紹朱古力及品牌既起源，仲有製造朱古力既機器運作，最後當然有好多不同味道既朱古力試食！試食完，仲可以去售賣區買返屋企。我覺得呢度雖然冇朱古力獎門人電影既朱古力河，又冇小矮人唱歌，但都算有野睇，又有得試食，都幾好玩！

Maison Cailler

成幅牆都係朱古力

用朱古力做既人像

任試朱古力

試食左好多朱古力，成口甜味，冇咩胃口食午餐。我地就係朱古力廠內既咖啡店，點左個湯、麵包及咖啡就當午餐啦！

簡單既午餐

揸左半個鐘車，去到格魯耶爾城堡 (Château de Gruyères) 既小山城。穿過城牆就係城中心既大廣場，四周保留著中世紀時代既小屋，真係好靚既小山城。因為今日係星期日，吸引左好多遊客，好熱鬧！係山城內往上走，好容易就去到格魯耶爾城堡，入城堡要比錢，我地冇入到去。而城堡旁有條路可以圍著城堡外圍走，居高臨下欣賞山下既風景。大家可以留意一間叫 HR Giger Museum 既酒吧及博物館，成間酒吧及博物館以異形概念為主，好特別，不仿去睇下！

城門

城牆上

城中心既大廣場

HR Giger Museum 門口

山城最高處既城堡

由山城上睇既風景

落山

好多羊

格魯耶爾山城唔係太大，我地行左一個鐘頭多就離開到附近既 La Maison du Gruyere 芝士廠。格魯耶爾芝士 (Gruyere Cheese) 係世界聞名既芝士之一，去到 La Maison du Gruyere 芝士廠可以入內參觀芝士製作過程。我地去到門口，諗住買飛入場，賣飛位女士話今日既芝士製作導賞團已經完左，入去冇咩野睇，暗示我地唔好入去。咁我地冇入到去，只係去左芝士廠既售賣店試下食及買左一塊格魯耶爾芝士。

La Maison du Gruyere 芝士廠

芝士廠後既草地

存芝士既地方

有得試食

買左返去食

我地揸左一個鐘車去返日內瓦湖邊既蒙特勒 (Montreux) 鎮，見只係 5:45 左右，天仲未黑，所以去埋西庸城堡 (Château de Chillon)。西庸城堡係一座中世紀，建於湖邊既水上城堡。因為城堡被阿爾卑斯山脈及日內瓦湖包圍，景色非常優美，所以係瑞士其中一個重要既城堡。要拍攝城堡既最佳位置，係沿湖畔再向前行幾分鐘，有一個伸出湖中既小碼頭。

路邊有位泊車

西庸城堡 (Château de Chillon)

今晚我地入住一間叫 Hôtel Préalpina 既酒店，呢間酒店位於 Chexbres 小鎮，房間裝修新穎，面積亦不小，最好既係有個露台，可以一百八十度飽覽日內瓦湖景。

Hôtel Préalpina

我間房

有露台

房內睇見既風景

仲有葡萄園

我地問下酒店櫃檯職員附近有咩好食，我介紹我地去小鎮一間葡萄牙菜餐廳，由酒店行過去大約 15 分鐘左右。呢間餐廳叫 Café de la Poste，佢有室內同露天座位，露天座位可以睇見日內瓦湖，雖然夜晚天氣有些少凍，但坐露天座位氣氛比較好。個餐牌全部係葡萄牙文，唔識睇，唯有靠 Google Translate ，好彩老闆娘都識少少英文，佢又介紹下，咁我地就點左個西班牙火腿葡式薄餅、沙律及龍蝦仔長通粉。西班牙火腿葡式薄餅真係第一次食，佢係一個夾餅咁既樣，入口好香脆，我覺得比平時食開既薄餅好食！另外個龍蝦仔長通粉非常大碟，個汁有香濃既龍蝦味，真係唔錯。