Joseph@外地遊記: 201609 瑞士第十一日 - 聖加侖 (St. Gallen)，蘇黎世 (Zurich)

2016/09/19

201609 瑞士第十一日 - 聖加侖 (St. Gallen)，蘇黎世 (Zurich)

本來我預左兩日比蘇黎世，但研究左一堆資料後，我都係搵唔到咁多景點可以比兩日佢。所以決定今早坐火車去聖加侖，目的係去睇聖加侖圖書館。

由蘇黎世火車站有直接火車去到聖加侖，車程一個鐘左右。聖加侖既歷史建築主要位於東北面城舊城區，由火車站行二十分鐘左右可以到達。去到舊城區，成個區都禁止車輛駛入，而四周既房屋好似德國既建築，色彩繽紛。

坐火車去聖加侖

火車內好舒適

好似德國既建築

聖加侖大教堂 (St. Gallen Cathedral) 及修道院圖書館 (Abbey Library)被列入為世界文化遺產。聖加侖大教堂係一間巴洛克式教堂，教堂內部以白色為主，再配上金色既裝飾，整體比較光猛。修道院圖書館要比入場費，CHF12 一個人，所有隨身物品，包括相機，要放入儲物櫃，入去圖書館時要穿上特大保護拖鞋，防止你對鞋破壞圖書館既地板。修道院圖書館其實唔係好大，不過以洛可可風格裝潢，有華麗書櫃及漂亮既天花壁畫。圖書館內藏有十四萬本，其中包括有過千年既手抄書籍，非常珍貴。

聖加侖大教堂

修道院圖書館 (圖片由官方網頁提供)

係聖加侖市區內，有幾條街都鬆上全紅色，好似舖左紅色地毯，大家記得要順便去睇下。

我地係聖加侖一個大廣場 (Gastronomie Raiffeisen Roter Platz) 既樓上餐廳食午餐，餐廳叫 Restaurant 90Grad，都係食薄餅及意粉，價錢唔太貴。

順便行下購物街

食午餐

3:00 我地坐火車返去蘇黎世市區，一出火車話就係人來人往既 Bahnhofstrasse 購物街，我地沿購物街一路行去湖邊，一路既商店都唔係太吸引，所以我地行得好快。中間我地經過 Paradeplatz 廣場，係市內電車匯集既廣場，四周有不少名店，不過都吸引唔到我地。當我地行到去湖邊，又開始落雨，望出去個湖，完全冇野睇。

蘇黎世火車站

Bahnhofstrasse

行到湖邊

天開始黑，又落雨，我地就買左 Zurich Day Pass，然後坐電車返去機場附近食晚飯。Zurich Day Pass 係可以用 24 小時，我地今日 7:00pm 買，就可以用到聽日 7:00pm，剛剛好夠我地聽日返香港前用。

今日既晚餐，我地去左機場附近一間叫 Runway 34 既餐廳，呢間餐廳以停機坪既機倉改建而成，餐廳內更停泊左一架真既1940年製古董飛機。整間餐廳都環繞飛機為主題，係餐廳外先經一條類似登機橋既隧道入去，入到去有 Check-in 櫃位，穿著空中服務員制服既員工會跟你辦理 Check-in 手續，跟住比張登機証你。餐廳有頭等位，真係用飛機座椅架，不過比人預定左，所以我地就坐係飛機機頭對落既位置。

Runway 34 餐廳

有架真飛機係餐廳入面

登機橋入餐廳

飛機椅

可以上架飛機

飛機內係酒吧

服務員推住飛機上用既餐車過黎，問我地飲咩，當然呢度既飲品係續杯計錢，唔似係飛機上無限量免費供應啦！餐廳既餐牌係一個金屬既盒，外型似機翼，切合返主題。Runway 34 係主打瑞士菜，再加上多國菜式，包括亞洲食物。我地就叫左瑞士牛扒及法國大蝦，食物水準中上，價錢都係中上，不過係呢種特色餐廳，可以全晚坐係飛機旁食飯，加上入晒戲既服務員，真係一次好特別既體驗。