201609 瑞士第五日 - 策馬特 (Zermatt)，馬特洪峰 (Matterhorn)

一早起身，整左煎蛋、火腿、多士早餐。再整定午餐帶上山。然後 8:30 出發上去馬特洪峰 (Matterhorn)。我地去到火車站以半價証買左來回馬特洪峰既火車飛，一個人原價 CHF45，半價後 CHF22.5。

早上係露台見到既馬特洪峰

去到火車站,出發去海拔 3089 米既葛內拉特 (Gornergrat)

我之前上網睇過，好多人都話上山要坐火車既右邊，風景會好好多。一上到火車，真係人人都走晒去坐右邊，好彩我都搵到個右手邊既位。呢程火車由策馬特去到海拔 3089 米既葛內拉特 (Gornergrat)，車程只係 33 分鐘。沿途一路爬升，景觀越見壯麗，一座一座雪山慢慢出現眼前。

上山既火車

上山時係火車見到既風景

火車一路向上爬

去到雪山既高度

雪山

上到葛內拉特，天氣非常好，又唔凍，藍天下尖尖既馬特洪峰非常特出。我估大家都知道，我地時常食既瑞士三角朱古力標誌上既山就係馬特洪峰，所以我地由細睇見呢個峰睇到大。上到葛內拉特除左睇馬特洪峰，仲可以睇到冰川，包圍住你既雪山。另外山上仲有個小商場賣紀念品及一間咖啡店。雖然山上行既地方唔係太多，但我地見到咁靚景，忍唔住狂影相，再四圍行下，都係山上玩左兩個鐘。

到葛內拉特

一去到就即影馬特洪峰

山頂既商場

冰河

上到 3089 米啦

馬特洪峰

大約 11:30，我地坐五分鐘火車，落一個站，去到海拔 2815 米既羅登波登 (Rotenboden) 站，開始行山。由羅登波登站只係行幾分鐘就可去到利菲爾湖 (Riffelsee)。呢個湖係好多遊客會去既一個景點，因為呢個湖可以影到馬特洪峰係湖中既倒影。今日天朗氣清，我地冇難度地就見到馬特洪峰倒影。呢個景真係靚到冇朋友，比咁多錢黎到馬特洪峰，最值就係見到呢個景！

羅登波登 (Rotenboden) 站

利菲爾湖 (Riffelsee)

馬特洪峰倒影於利菲爾湖

影完相，我地就係湖邊搵舊石，坐低開始野餐。我地既午餐有烚蛋、烚薯仔及火腿三文治及一壺熱茶，再配上一個雪山美景。

午餐

好多人去到利菲爾湖就走回頭路回去羅登波登站，然後坐火車落山。我地就決定由羅登波登行落山，去下一個站利菲爾堡 (Riffelberg)，然後先坐火車返去策馬特。呢段路行大約一個鐘，沿山脊而行，東南西北四面都係雪山群包圍住，呢個風景真係國際級超壯闊一流景色。要留意行到最後會有一後好斜又難行既落斜路段，呢段要好小心慢慢行，個斜度係行到腳趾甲痛既！

開始行山

呢個堅壯闊既風景

見到目的地啦

離馬特洪峰好近

坐火車落山

去到利菲爾堡只係兩點半，見有時間，我地坐火車去到半山既 Riffelalp。呢個站有個花園，好似幾靚。但係我地行到入去花園，原來正在維修，咩野都冇得睇，我地只有返去再坐火車回去策馬特。

行左大半日，都幾攰，所以先返 Apartment 休息幾個鐘。大約 6:30 我地就出去搵食，我本來打算去一間叫 Restaurant Schaeferstube 既餐廳食燒黑面羊，去到餐廳門口，睇下餐牌，好很貴呀！我地成個行程得住策馬特呢兩晚係有廚房煮食，所以決定今晚都係去超級市場買野返去煮，之後仲有幾日可以出去餐廳食！今晚既晚餐煮左沙律、湯、漢堡扒意粉，同埋啤酒！

係策馬特散下步

自家煮晚餐

馬特洪峰夜景