Joseph@外地遊記: 201609 瑞士第八日 - 伯恩 (Bern)，琉森 (Luzern)

今日既目的地係琉森 (Luzern)，上午我地會先去瑞士首都伯恩 (Bern)，黎個伯恩半天遊。我地係旅館食完早餐，大約 9:30 執好野離開格林德瓦 (Grindelwald)。唔記得講下呢間旅館既早餐，係自助式傳統歐陸早餐，即係得麵飽、冷盤火腿、芝士、烚蛋、茶及果汁。好唔好食？填飽個肚算係咁啦！

今日係房既露台影出去既格林德瓦

離開格林德瓦

由格林德瓦去伯恩約一小時十五分鐘，我預先上網搵左泊車地點既資料，係愛因斯坦博物館對出有好多街錶，泊好車，行過條橋就到伯恩既市中心，算幾方便。伯恩係少數仍保留中世紀面貌既城市，基本上一入市中心，四周既建築物及地上既石磚地都係珍貴既景點。不過冇可能只係市中心四圍漫無目的咁行，係市中心都有幾個景點既！我地首先去到地標 - 伯恩鐘塔 (Zytglogge)，鐘塔建於十三世紀，係以前第一座城門既遺跡，有成八百幾年歷史，鐘塔外觀非常精緻，大家可以欣賞當時工匠既精湛工藝。

愛因斯坦博物館

伯恩阿勒河

伯恩鐘塔

係鐘塔附近有愛因斯坦故居 (Einstein Bern)，你唔好問我邊個人愛因斯坦？佢有咩特別要去佢故居睇下？我係唔會答既！要搵愛因斯坦故居係有少少難度，我地跟住地圖行在兩次都搵唔到，原來佢係一間咖啡店旁既樓梯仔上去。呢個愛因斯坦故居係愛因斯坦出世及童年生活既地方。故居展出當時單位既面貌，另外仲展出愛因斯坦不同年齡時既照片，護照等物件。係愛因斯坦故居行下，可能可以吸收到佢少少靈氣，個人都聰明少少！

愛因斯坦故居

愛因斯坦故居內既廳

少年愛因斯坦

愛因斯坦故居既窗望出去

舊時既人影合照興唔望鏡頭

市內電車路就係伯恩最旺既街 - Maktgasse。我地係呢條街見到有間 Migros 超級市場，之前網上好多人話超級市場內既燒雞又平又好食，而唔係間間 Migros 都有架，我地咁好彩見到呢間 Migros 到燒雞肶，所以決定今日既午餐就係食燒雞肶。另外係超級市場門口有即製熱狗，又香又熱，所以又買左一條。買完梗要搵地方食，我見好多人就咁坐係街邊既樓梯食，我地行行下去到國會大樓 (House of Parliament) 對出既 Bundesplatz 廣場，廣場有好多人坐左係地下，唔爭在我地都坐係度食啦！隻燒雞肶真係唔差，以瑞士物價黎講，CHF 3.9 一隻燒雞肶，算抵食啦！

伯恩 Maktgasse

Migros 超級市場買雞肶

Migros 超級市場門口買香腸

國會大樓前開餐

食完野，我地慢慢行返去攞車，大約 1:45 左右，我地揸車上去半山上既玫瑰花園 (Rosengarten)。玫瑰花園對面住宅區內有不少街錶可以泊車。去到玫瑰花園，開始落雨，我地係花園影下不同品種既玫瑰花，然後去左花園內一間咖啡店食個下午茶，呢間咖啡店面向住伯恩市整個景色，一面嘆咖啡，一面欣賞無敵景！

玫瑰花園睇落去伯恩

係伯恩玩到三點左右就離開，前往琉森 (Luzern)，車程大約一小時十五分鐘。係琉森呢種熱門城市泊車，價錢非常甘，不過我之前上網格左價，比較平少少既係垂死獅子像 (Lowendenkmal) 附近既 Parkhaus City Parking 停車場。因為泊左係垂死獅子像附近，順理成章，就成為琉森既第一個景點。垂死獅子像既典故係紀念 1792 年期間係法國犧牲既瑞士士兵。去到見到個石像，真係雕得好真！唔怪得可以成為琉森著名既地標。

垂死獅子像

我地由垂死獅子像經過舊城區既商店街，行到去另一琉森地標 - 卡貝爾橋 (Kapellbrucke)。卡貝爾橋建於 1333年，長 204 米，係歐洲現存最古老既木橋。卡貝爾橋位處琉森湖出口，橋既中間有座八角形水塔，係呢條橋既特色。

舊城區

卡貝爾橋

卡貝爾橋上

卡貝爾橋上睇返去湖邊

琉森湖

日落

舊火車站遺址

黃昏的琉森

我地係舊城區行下百貨公司及商店，行到 7:00 就去搵野食。我開一開個電話睇下，今晚住既酒店比左個 Email 我，佢話佢地 8:00 前先有人同我辦理 check-in 手續，所以問我點解仲未去 check-in。我完全唔記得呢間酒店要 8:00 前 check-in 呢回事，死啦！仲有 45 分鐘就 8:00 啦！Check-in 唔到今晚要瞓街！我地嗱嗱聲半走半跑咁走返去停車場攞車，然後快快揸去琉森市中心外圍既 Hotel Spatz 酒店。好彩！我地 7:50 左右去到，check-in 成功！嚇死我！

Hotel Spatz

我間房係頂樓

琉森市中心既酒店通常都比較貴，所以我選左呢間外圍少少既酒店，呢間酒店有免費停車場，又包早餐，冇車既朋友，係酒店門口有個巴士站，坐唔駛 10 分鐘巴士就可以返去市中心，所以係好方便既酒店。但呢間酒店又係冇升降機，我地又被安排住頂樓，又要抬重到死既行李上樓！我地間房都好大，但冇咩傢俬，感覺好空洞。

我地酒店有間扒房，叫 Restaurant Obergrund Grill Gut，我地費事出去市中心，所以就係呢度食啦！我地叫左兩款扒，一款係 180g 既炭燒牛扒，價錢係 CHF36，另一款係 180g 既熱石西冷牛扒，價錢係 CHF29。熱石係會上一塊塊已經切好既生牛扒及一塊熱石，然後自己用塊熱石烤牛扒，都幾好玩。另外再叫左兩個配菜，有酸忌廉焗薯及焗蔬菜，每個配菜 CHF4.5。呢間餐廳既價錢唔貴，牛扒好好食，係香港要有呢個質數既牛扒，呢個價錢一定食唔到，呢一餐我完全唔覺得係瑞士既價錢，好抵食！