201701 越南峴港會安第四日 - 美山聖地 (My Son)，會安 (Hoi An)

天氣依舊唔係太好，我地禽日 Check-in 時，透過酒店訂左架車，今早接我地去美山聖地 (My Son)。出發前先係酒店食早餐，呢間酒店既早餐超得，係自助餐型式，食物款式好多，仲有即煮既蛋，係講出蛋既整法，佢都盡量整出黎。另外仲有即煮越南生牛肉河，真係勁豐富既早餐。

越南生牛肉河

酒店食早餐

有西式早餐

9:00 我地上酒店既 Toyota Altas 出發去美山聖地，車程一個半鐘，來回車費係 VND 816,000，約 HK$285。美山聖地被列入為世界文化遺產，建於公元 500 年，有成千五年歷史，係越南占婆時期既大型建築群。去到美山聖地，影入眼簾既係一座座殘破既古神殿，所以美山聖地又被稱為小吳哥窟。從建築中，依然可以睇到好多雕飾，反映出當時占婆時期既藝術及美學。雖然今日天氣唔好，但係細雨霧霧下既古神殿，又有一番神秘既色彩。

包車去美山聖地

美山聖地入口

有車接送,可以行少一大段路

我地係美山聖地逗留左一個半鐘，然後就返去會安。我地叫司機直接車我地去會安古城一家食法包既小店，叫 Bánh mì Phượng ，呢間店係大牌檔式，雖然好簡陋，但係好出名，被喻為越南最好食既法包。我地去到已經差唔多 2:00，但仲係好多人。佢有好多不同餡料既法包，有豬、牛、蛋及漢堡可選擇，我叫左個 BBQ 豬肉，價錢只係 VND 20,000，約 HK$7，超平。本來睇見呢間舖既門面，我冇咩期望，但係個法包一食入口，真係超好食，個包外脆內軟，餡料味道剛剛好，唔會太咸或甜，真係我食過最好食既法包，係會安一定要試既美食！

Bánh mì Phượng

一大班人整緊包

一人一個包

美味既法包

食完野，我地就係會安古城行下小商舖，行下街市，跟住去左一間叫 Hoi An Roastery Espresso & Coffee House 既咖啡店飲下野。好彩行既時候冇落雨，可以好悠閒咁 Hea 下。

街市

Hoi An Roastery Espresso & Coffee House

Hoi An Roastery Espresso & Coffee House

我地間酒店有附設 SPA 及按摩，我地下午就係酒店做左個 90 分鐘既按摩，每人 VND 675,000 (HK$240)。按摩既獨立房可以同時兩人使用，環境幾光鮮。按摩師傅就好睇個人既要求，我既就覺得幾好，其他人既就話唔夠力。

夜晚我地坐酒店專車出返去會安古城。係古城中間條河，有隻艇賣串燒，我地走左上去試下，除左串燒，佢都有高樓麵。不過食落串燒好一般，高樓麵又唔夠禽日下午食既好味，唯一係好有特色咁係隻艇上面食。

晚上既會安

會安地標- 日本橋

日本橋

日本橋上

賣串燒既艇

賣串燒既艇

只係食串燒同高樓麵梗係唔夠飽，我地去左 Vy's Market Restaurant 再食，Vy's Market Restaurant 係由當地一位飲食專家 Miss Vy 開設，搜羅越南不同美食。餐廳內有少少似 Foodcourt，不過唔駛自己去買野食，有 iPad 餐牌，有專人落單及送菜。係會安除左高樓麵 (Cao Lao) 外，仲有一道好出名，名字又好靚既菜式，叫做白玫瑰。不過唔好比佢個名吸引左，以為係咩特別野，其實只係一件粉皮包左少少肉，點魚露食既野。我地仲叫左春卷、湯粉及甜品食，我食完其實覺得一般，都係正正經經搵間餐廳食好過！

Vy's Market Restaurant

白玫瑰