到達成田機場，從朋友口中得知可能於機場兌換日元比較化算，所以一辦完入境手續便到銀行查看，銀行牌價表寫著兌港元 8.05，嘩...香港銀行當日 9.6 算，日本銀行真的平咁多！我立即兌三萬港元，以後行程中的所有酒店、食及交通全付現金！當兌換成日元，點點數，點解少咁多既？再看清楚，原來我計錯數，日本銀行牌價表的8.05原來是說 HK$1000 可以兌 JPY¥8050，香港銀行的 9.6 是說可以用 HK$960 可以兌 JPY¥10000 ，嘩...我比多左 HK$7000 兌這些日元，未開始行程已經用左 HK$7000，想死！
心情極度低落，嘗試問銀行可唔可以比返港元我，佢話唔得！唉....我唯有試下出個可憐樣求下佢地，我同佢講我計錯數，可唔可以唔兌換呀 (用英文)，前面坐櫃台兩個姐姐都話唔得，我唯有用個可憐樣求下坐後面班高層叔叔，可能佢比我個可憐樣感動到，佢地終於肯比返三萬港元我呀！嘩.....極開心......執返身彩！好彩我自己帶左 JPY¥180000，我諗酒店及租車比信用咭，十八萬円都應該夠我駛十日！
執返身彩後，笑笑口影返張相先！搞了一大輪，原來已經 2:25，我立即走到 JR 駅的售票處換之前上網買了的 JR East Pass Special，這款票是秋季限定的，只可於 1/9 - 30/11
使用，這款票可無限次搭乘JR東日本線的新幹線及特快列車，並可於十天內，任選三天使用。價錢只需 JPY¥10000，上網買用港元結算，更只需 HK$885。詳情可參考 JR 網頁：http://www.jreast.co.jp/e/eastpass_sp/
換了 JR Pass 便坐 NEX 成田快線到東京駅，NEX 成田快線14:45 開車，不用一小時，15:53 便到達東京駅，最緊要我張 JRPass 可以免費坐 NEX 成田快線。到了東京駅，於售票處換了 16:56到八戶的新幹線指定席車票，之後便到東京駅一番街食午餐，拖著兩件大行李，要找些方便快捷的食店，忽然看見一家立食的壽司店，就這間啦！快快點壽司，Tamago、Ika、Otoro ........ 師傅即叫即整，暖暖的飯被新鮮的魚生包著，O-i-shi！
東京駅一番街立食壽司店
由東京到八戶，距離總共是 632 公里，搭乘新幹線要三個小時，時間很長。由於今早太早起身，一坐長途車便抱頭大睡了！20:05 到達八戶，於八戶走到另一個月台便上了東北本線到青森，東北本線速度不快，所以要坐 45 分鐘。由香港屋企早上 5:00 出門口，到晚上 9:30 終於到達青森。
東北本線
終於到達青森駅
房內
拉麵店是一家小本經營的小店，全店得兩人，我們點了帆立貝拉麵及餃子。帆立貝拉麵有兩隻大大隻連殼的帆立貝，一送來已經很震撼。味道方面，帆立貝很甜美，湯底又夠清，麵帶有蛋香味，想不到小小店子都有如此水準。吃飽後，滿足地回酒店休息！
No comments:
Post a Comment