10 月中時，香港快運突然出一周年特價 $1 機票優惠，第一個目的地是福岡。嘩！一蚊機票，唔駛問，即刻上網搶啦！係香港快運網站選擇不同日子，好多時都死死地，空白一片。間唔中出到可選航班，選好後，輸入完個人資料，一提交資料，又空白一片，死左！不斷選不同日子，不斷入資料，搞左成個鐘，終於買到十二月出發去福岡機票，連稅及行李費，來回每位 HK$ 958，荀野！
 |
| 福岡上空 |
今次係第二次去九州，上次去晒熱門的北九州，如別府、湯布院、熊本及阿蘇等地方。今次想去一些冷門少少的，如鹿児島、宮崎、佐世保及門司港等。不過這些地方位於九州東、南、西、北，即係要走遍整個九州，開車一定開到傻。編行程時都幾頭痕，因為九州太大，無可避免，每日最少開幾小時車，最勁一日由宮崎開去佐世保，路程超過 400 公里，想起都有少少驚。唯有盡量中途加插景點，可以休息一下！不過，最後我放棄了去門司港，改去柳川睇下運河及食鰻魚飯，還是悠閒些好！
出發當日坐 13:05 飛機直飛福岡空港，飛機準時起飛，大約 5:00 到達福岡空港，比預計時間早了些少。一步出機場，走去 Toyota 租車櫃檯取我預先訂了的 Toyota AQUA 混能車，即香港的 Toyota Prius c。
 |
| 到達福岡機場 |
 |
| 機場 Toyota 租車 |
 |
| 我們租了這架 Toyota Aqua |
最近九州 EXCO西日本首次推出於2014年10月1日至12月26日期間使用的外國遊客路費PASS，名叫
Kyushu Expressway Pass (KEP)，於購買日期內可以以固定優惠價格無限次使用九州高速公路！我買了 6 天，只須 6,500 円。正價一程由福岡去鹿児島，已經要 6620 円，所以行一程已經回本！
好順利地，6:20 已經搞好晒租車手續，可以出發。第一程車就係由福岡空港直駛去鹿児島，約 280 公里，車程預計要三個半小時。點解安排一落機就開長途車？一落機如果去福岡住一晚，明早才開車去鹿児島，便會浪費了明天白天的三個半小時。所以不如今晚即刻開車去鹿児島，明早便可開始玩鹿児島！
一開車已經是天黑，加上落雨，於冇街燈的高速公路上飛馳，加上要熟習這架車的性能，開頭都不敢開太快。開了十多二十分鐘後，開始可以超速了！哎呀！唔係超速！係加速先真！大家當我冇講過「超速」！講一講架車，我覺得三個字「唔夠力」，加速時常要地板油，搞到加車「her ....her...」聲。去到 130 km/h 已經好極限，成架車好多噪音同埋 「her」 住去，唯一可取係超慳油。(我冇開到 130km/h 架！真係冇架！我唔「超速」架！)
三個半小時車，中途不停一停休息是不可能的。當駛到接近熊本時，高速公路有一個
北熊本休息站 (Service Area - SA)，我便駛入去食個晚餐。休息站地下有便利店及快餐，我們光顧了二樓一家叫「レストラン」的餐廳。我們點了一份鐵板牛扒定食及一份牛肉石頭飯。食物係一貫日本餐廳的好味，不過驚喜不大。
 |
| 北熊本休息站 |
 |
| 牛肉石頭飯 |
 |
| 鐵板牛扒定食 |
 |
| 牛肉石頭飯 |
吃了大約 45 分鐘飯，又繼續餘下的兩小時車程。我們今晚的目的地是鹿児島的
Chisun Inn Kagoshima (チサンイン鹿児島)，此酒店正正位於鹿児島著名的商店街天文台通旁，地點優越。價錢方面，簡直無敵，我上網搵了多家酒店網站，日本酒店通常 Jalan 係最平，但 Expedia 突然有優惠，HK$555 兩晚 (不包早餐)， 仲要唔係最細既 Semi-double room，而係 Superior Double Bunk Bed Room，可以瞓三個人，面積有 18 平方米。
 |
| 鹿児島的 Chisun Inn Kagoshima (チサンイン鹿児島) |
 |
| 大堂有免費飲品 |
 |
| 我們的三人房 |
去到酒店已經是晚上 10:15，把車泊於後一條街跟酒店有聯繫的停車場，一晚 1000 円。入到酒店，大堂有免費飲品機，可以沖茶及咖啡飲。上到房放下行李，落街去了附近的 Mister Donut，買了兩件冬甩宵夜！
 |
| 深夜的天文台通，很少人 |
 |
| 宵夜食冬甩，加酒店免費綠茶 |
No comments:
Post a Comment