201412 日本九州第六日 - 柳川，福岡

一起身即時走去浸溫泉，跟住就去食早餐。早餐是自助餐，有非常多種類食物，仲有嬉野溫泉豆腐。不過我有少少失望，因為唔係一人一份既日式料理早餐。大約 9:30 離開溫泉旅館，攞車時看見成架車被一層薄薄既冰包住，昨晚一定好凍！

和多屋別莊門口

早餐，左上面係嬉野溫泉豆腐

成架車被一層薄薄既冰包住

今日原來想去門司港一日遊，由嬉野溫泉開車去門司港都幾遠。諗諗下，都係唔好咁趕，所以最後決定近近地去柳川。由嬉野溫泉去柳川途中經過佐賀 YouMe 商場，見有時間就入去睇下。 YouMe 商場跟 AEON Mall 差不多，場內有很多商店，行下行下就行左超過一個鐘，仲係無印良品買左件特價羽絨外套。

佐賀 YouMe 商場

佐賀 YouMe 商場內

柳川市區內有很多運河穿插，所以被稱為水都。遊客可以坐小船悠哉悠哉地遊覽運河。我們到達柳川大約11:30，先去「水辺の散歩道」參觀柳川運河。柳川運河其實沒有特別之處，我地等小船經過，再配合河邊的垂柳拍照，照片上的感覺好似比較良好。

柳川運河

有船經過

柳川運河

柳川運河

上船地方，不過我冇去坐船

我去柳川主要其實不是去睇運河，而是去食鰻魚飯。識食鰻魚飯，一定食柳川鰻魚飯！柳川是日本鰻魚飯的發源地，而最有名的是創業三百多年的「元祖本吉屋 本店」。我們開車穿過窄窄的小街，到達「元祖本吉屋 本店」，一落車，已經聞到陣陣燒鰻魚的香味，好香呀！因為今日係平日，人不太多，所以唔駛等位。之前我已經上網做定功課，睇定餐牌，所以一坐低就可以即刻點菜。黎到「元祖本吉屋 本店」其實最出名係「蒸籠鰻魚飯」「せいろ蒸し（きも吸,香物付）」，其他定食，浦燒鰻魚全部要當睇唔到。我地兩個好貪心，叫左兩客有個「特」字係頭既「特せいろ蒸し（きも吸,香物付）」，「特」即係再大份，多鰻魚既「蒸籠鰻魚飯」，一客 ¥3800。

元祖本吉屋 本店

因為即叫即蒸，等半個鐘左右就有得食。「蒸籠鰻魚飯」由一個特製既長方型蒸籠載著，一打開蓋，立即飄來一陣香噴噴既煙，而整個面層舖滿睇見都流口水既鰻魚。好想即刻放入口，但要忍一忍，相機先食！相機及 iPhone 食完頭啖湯，到我可以食啦！以我呢個自稱鰻魚飯專家一試，「元祖本吉屋 本店」取代左名古屋「薘萊軒」，成為我心目中最喜愛鰻魚飯第一位！係第一位呀！恭喜！恭喜！這個「蒸籠鰻魚飯」的鰻魚非常油潤肥美，入口有炭燒的香味。因為以特製蒸籠炮製，蒸氣由底層經飯粒上到面層的鰻魚，而鰻魚的味道及醬汁又可均勻地透入米飯中。最驚喜是這個「特」係有雙層鰻魚，飯中間仲有一層鰻魚。一客「特」的份量非常多，不過因為太好味，我地兩個都食晒成個飯，食完飽到上心口！

特せいろ蒸し「特蒸籠鰻魚飯」

一人一份

個底好特別既設計

2:30 由柳川開車去博多港的 Bayside Place 光顧冬季 (1/12-15/3) 限定的燒蠔小屋。(剛剛食飽鰻魚，又去食燒蠔！痴線架！) 燒蠔小屋內一個一個炭爐，開爐費每人 ¥300，而每一盤蠔就 ¥1000，大約有 10 至 13 隻蠔。我們先點了一盤蠔，開頭未掌握好燒蠔技巧，燒到乾晒，變左蠔豉乾。後來慢慢熟習火路，就燒到仍保留蠔汁的美味烤蠔。眨下眼好快就食完一盤，我地再加多一盤，燒下燒下就食晒囉！

燒蠔小屋海報

燒蠔小屋門口

燒蠔小屋就係下面帳篷

帳篷內

食即烤蠔

肥美新鮮烤蠔

食完下午蠔，先開車去 Dormy Inn 博多祇園攞房及放底行李，然後開車去博多站前的豐田還車。今晚選 Dormy Inn 博多祇園，唔駛講梗係貪佢有溫泉浸，而唔知點解佢又突然間 22.5 平方米的雙人房做特價，¥10000 一晚，價錢唔貴，又近地鐵祇園站，不二之選。

Dormy Inn 博多祇園

去到豐田還車，跟住就去博多站附近商場行下，行下 Tokyu-hand、Yodobashi，然後去食晚飯。下午個餐都未落格，跟本都唔想點食，但唔食又驚夜晚會好肚餓。是是但但係博多站走入一間叫「まぐろ屋」食海鮮飯，呢間餐廳自稱出名吞拿魚刺身，就試一試你個吞拿魚。唔知係唔係我真係仲好飽，食呢碗飯覺得好似只係一個任務，完全唔享受！個吞拿魚又好一般！

好大間 Yodobashi

「まぐろ屋」食海鮮飯

「まぐろ屋」食海鮮飯

食完飯，走到博多站前的戶外地方，四周都掛滿聖誕燈飾，好靚！原來車站外舉行一個聖誕市集 (Christmas Market)，一間間小屋賣啤酒、食物、聖誕飾物，扮得都幾似德國的聖誕市集。點解香港搞唔到呢 d 咁有氣氛既市集呢？講開聖誕燈飾，回港後，走左去尖東，香港的聖誕燈飾點解同我十年前睇既冇咩分別？都係用燈泡！點解人地日本博多 d 燈飾靚咁多？香港搞咩呀？

博多站前聖誕市集

好靚既燈飾

聖誕市集