Joseph@外地遊記: 201503 台灣東部第六日 - 花蓮觀光糖廠，瑞穗牧場，三仙台，都蘭，小野柳，台東

今日既早餐係粢飯、豆漿及生果，聊勝於無！早餐後帶埋行李離開花蓮，向台東出發。由花蓮去台東路程都幾遠，我選擇了中途停幾個景點，花蓮觀光糖廠、瑞穗牧場、北回歸線標、三仙台、都蘭國小、新東糖廠、水向上流及小野柳。

早上的花蓮

簡單早餐

由花蓮到花蓮觀光糖廠大約一小時十五分鐘車程，去到糖廠冇咩人。糖廠中間有個鯉魚池、涼亭，好老土！我地四圍行下，睇下介紹糖廠歷史既文物館，去同火車影下相，大約半個鐘左右就走啦！都幾無聊！

花蓮觀光糖廠

有火車

三十分鐘車程左右就去到瑞穗牧場，瑞穗牧場以黑白色乳牛吸引遊客，所以一入去圍欄、洗手間、餐廳都係以黑白乳牛圖案為主。我預計會係青蔥草地上看見一大群乳牛，但成個草原得一隻駝鳥，一隻牛都冇，跟想像好大落差，好失望！冇咩做，唯有入去餐廳食件芝士蛋糕，點都算係用乳牛牛奶做呀！正想離開時，有一班人走去最入最入既牛棚，原來可以入去睇架，我地跟其他人一齊行過去，見到好多乳牛係牛棚裡面，終於都見到乳牛，不過好臭好臭！

瑞穗牧場

都有好大既草地

不過草地得一隻鴕鳥

去餐廳買蛋糕

芝士蛋糕

終於見到乳牛

隻牛牛咁眼啤住我

瑞穗牧場附近有個北回歸線標，一個白色既標誌建築，順道走去影張相。

北回歸線標

我地由近山既花東縱谷公路，經玉長公路翻過山頭，去到海旁的花東海岸公路。呢條花東海岸公路可以看到廣闊既太平洋，隨便停埋一邊，睇下個海，超正！估唔到台灣都有咁靚既海景！

隨便停車影張靚相

太平洋做背景

揸左一小時多車，我地去到台灣東海岸一個熱門的景點「三仙台」。三仙台其實係一個好近岸既小島，傳說呂洞賓、李鐵拐、何仙姑曾經登臨此島，所以叫三仙台。連接小島有一條八拱的橋，因為外形獨特，已成為當地著名的地標。不過呢條橋好睇唔好用，要過橋必須又上樓梯，又落樓梯去過呢八個拱，行完都幾辛苦。

三仙台

另一角度的三仙台

條橋又上又落

揸半小時車，我地去到南東河，有一間非常出名的「東河包子」，今日的午餐就係食包啦！我食了一個肉包，一個芝麻包及一碗貢丸湯。包子的外皮好鬆軟，有麵粉的香甜味，肉餡多汁，幾出色。呢個包我比七十五分，不過一定要趁熱食！

東河包子

今日午餐食包

由南東河向台東方向走，好快就去到都蘭村。我地首先去全台灣人氣最旺的小學「都蘭國小」，點解呢間小學咁出名呢？原因係台灣總統馬英九夫人周美青買了她學校的書包，並於公眾活動中帶上，所以印有「都蘭國小」的書包就成了潮流物品。

都蘭國小

都蘭國小內

放學時見到的祝福

學校門口地下有原住民的文字

原住民的圖案

原住民的文字

都蘭國小書包

都蘭村另一個景點就係「新東糖廠」，新東糖廠以前係一間糖廠，現在成了一個文化園區，就好似前幾日去過既松山文化園區及文化創意產業園區。台灣而家都幾多將舊工廠改建成藝術文化小村。

新東糖廠

木雕藝術品

新東糖廠附近有一個幾得意既景點，叫「水向上流」，估名思意，就係有一條水道內既水會向上流。我地去到見到呢條水道，真係向上流喎。不過我非常深信牛頓發現既萬有引力，水冇可能自然地向上流。我拎出 iPhone，打開水平尺個 App，量度一下條水道既水平，其實條水道係微微向下，但因附近行人道係跟水道相反，大家有個錯覺，覺得條水道係向上既！

水向上流，左手邊個條水道就好似流上山

到達台東前，最後一個景點係小野柳，小野柳地形跟北部野柳相似，所以叫小野柳，不過梗係唔會有女皇石啦！

小野柳

今晚我地住東椿民宿，因為我地住兩晚，第二晚係假期前夕，成個台東的酒店都好滿，幾經辛苦先搵到呢間。呢間民宿好簡樸 (大家都明咩係簡樸啦！)，乾乾淨淨，地方又大，算係咁啦！不過我地住三樓及四樓，冇電梯，要抬行李上去都幾辛苦。另外呢間民宿近台東火車站，不過原來台東火車站唔係市中心，所以附近得民居，冇咩店舖，好彩我地有車，去邊都方便，如果冇租車既朋友，我建議住市中心比較方便。

東椿民宿

我的房

今晚打算去一間係山上叫原始部落餐廳食原住民山地美食，並且有原住民的舞蹈表演。但民宿主人介紹我地去原始部落餐廳旁邊的響羅雷餐廳，佢話係原始部落餐廳的師傅走出黎開既，價錢比原始部落餐廳平，所以我地去左響羅雷餐廳。響羅雷餐廳今日唔係太多人，我地點左招牌菜脆皮燒雞、塔香鹽烤魚、塔香螺肉及阿拜。首先講下咩係阿拜，阿拜係一種類似粽既食物，唔同族群會有自己既餡料同做法，而佢地多數會係慶祝豐收時做黎食。脆皮燒雞係必食既一道菜，雞皮香脆，雞肉嫩滑，必食！塔香鹽烤魚就燒到剛剛好，魚肉仲保留水份，唔會太乾。響羅雷餐廳野食就好好，不過氣氛就麻麻，我本來以為有原住民歌曲同舞蹈睇，點知得一個後生女唱幾首流行曲，台下因為唔多顧客，佢有佢唱，下面有下面食，完全冇互動，好怪。後來走時經過原始部落餐廳門口，睇見好似比較多顧客，氣氛都好似比較好。