Joseph@外地遊記: 201503 台灣東部第七日 - 初鹿牧場，伯朗大道，悟饕池上飯包文化故事館，台東

台東呢間民宿唔包早餐，我禽晚上網睇下附近有冇吐司同豆漿，比我搵到一間路邊冇名舖仔。我地 9:00 去到，竟然咁早賣晒吐司，咁我就叫左件蛋餅食。即叫即整既早餐，又夠地道，好味！

街邊賣早餐的小店

蛋餅

今日行程係行山路上返北面。首先我地揸左半個鐘車，去到初鹿牧場。呢個牧場比之禽日去既瑞穗牧場好好多，牧場內有馬車、騾仔、草地上既乳牛，又有山羊仔同豬仔四圍走，仲可以喂佢地食野。瑞穗牧場真係一個牧場，而今日呢個初鹿牧場就係一個觀光牧場，大家自己識得選去邊個牧場啦！

瑞穗牧場

有乳牛

小山羊

小豬

乳牛 BB

仲有得玩！

伯朗大道位於池上鄉，大道位於青綠色稻田中間，因金城武於此地拍攝了伯朗咖啡廣告，所以叫做伯朗大道，而於廣告內出現那棵樹就叫金城武樹。所有汽車都不准進入伯朗大道一帶，我地先泊好車，一落車就好多人叫你租單車去伯朗大道，我地見伯朗大道好似唔係好遠，大約行十分鐘就到，所以走路過去算吧啦！沿路見到有幾棵樹，獨立於田野間，好似 Microsoft Windows XP 張 Wallpaper，好靚，唔通係金城武樹？但樹下又冇咩人，應該唔係。行多一陣，終於去到金城武樹，吓！呢棵甩皮甩骨既樹就係金城武樹？我即刻上網睇下伯朗咖啡廣告既相，棵樹個時好靚架喎！我估應該好似香港棵許願樹咁，因為大多人搞佢，所以搞死左棵樹。我覺得應該係金城武個名搞死呢棵樹，你睇之前見到個幾棵樹，冇金城武個名，佢地依然健康成長，依然咁靚！

伯朗大道旁的稻田

伯朗大道

甩皮甩骨既金城武樹

金城武樹下

悟饕池上飯包係台灣出名既飯包品牌，飯包即係我地講既飯盒。該品牌已經有七十年歷史，起初主要賣比坐長途火車由台東去花蓮既旅客，現在分店開滿全台灣，成為出名的品牌。我地去到池上，梗係順便去悟饕池上飯包老店食午餐。悟饕池上飯包老店裝修成池上飯包文化故事館，門口放有兩卡火車，顧客可以買飯包走上火車卡上食，感覺好似以前坐花東鐵路食飯包既人！

悟饕池上飯包文化故事館

門口有架火車

整得似模似樣

仲有月台位置可以食飯

店內賣野地方都整得好靚

我地係架火車上面搵到位

火車上食飯包

我食既飯包

回到台東，我地去一間台東特產「楊記家傳地瓜專門店」買手信，佢有番薯酥及番薯蜜，番薯酥脆口，番薯蜜軟甜，兩種都係手信佳品。但要留意，番薯蜜只可室溫存放一兩天。另外不可不提就係佢個即烤番薯，隻番薯烤到漏晒蜜汁，入口粉甜，真係堅好食，一定一定要試！

楊記家傳地瓜專門店

超好美烤番薯

位於寶桑路上有一家賣仙草出晒名既仙草屋，仙草熱食、凍食、沙冰，點食法都有。我地 4:15 左右去到，未開門，原來 4:30 先開，我地四圍行下，等十五分鐘到，就有得食啦！我叫了碗凍仙草，配上不同配料，例如綠豆仁、珍珠粉園、紅豆等。呢碗燒真係好得，個燒仙草係以仙草長時間熬煮，唔係用仙草粉整，入口有香濃帶微甘仙草味。真係同係賣珍珠奶茶舖頭叫既一杯杯燒仙草完全係兩回事。

仙草屋

一人一碗燒仙草

燒仙草

我地食完就去臺東鐵道藝術村行左一陣，然後開車上山睇日落同觀星。位於山上有一家「星星部落景觀咖啡」，呢間咖啡屋每日日落時先開門，好有性格。我地日落前到達，佢真係唔開門，我地等左二十分鐘，等到日落先入得。入到去隨便搵個露天位，可以眺望台東市區的景色，然後落單點吐司及珍珠奶茶。天漸漸變黑，台東市的燈光越見明亮。天空亦都可見不少星星。不過跟澳洲及紐西蘭的密麻麻佈滿繁星的星空差好遠。黎呢度可以睇下夜景，睇下星，好舒服！