201412 日本九州第三日 - 宮崎

早上又食 ¥600 一位的豐富自助早餐。8:45 check-out 出發去宮崎縣青島的鬼の洗濯板。由鹿児島去到青島，車程要兩個半小時。到達青島，於車上四圍睇下有邊度泊車，四周商舖內的姨姨看見我們，立即走出來揮手示意泊她們的停車場，當然是要收費。因為佢地係姨姨，唔係日本妹，我當睇佢地唔到直行直過，駛前少少就有一個免費停車場！

落車後，由大馬路轉向海岸方向，去到岸邊的沙灘就看見位於海中心的青島。我們過橋後到達青島，右邊海岸有一鳥居，再前行就是青島神社，鬼の洗濯板就在鳥居至神社間的岸邊。鬼の洗濯板其實是青島海岸一帶的海岸岩石，岩石長期受海浪衝擊及侵蝕，形成了一些樓梯形狀的波浪紋，形狀好似洗衫板的坑紋，所以叫鬼の洗濯板。

青島

青島上的鳥居

青島神社

好多繪馬

鬼の洗濯板

鬼の洗濯板

鬼の洗濯板

睇完洗衫板，我們開車到附近青島漁港，光顧一家由青島漁協直營的餐廳，名字叫「港あおしま」，即「青島港」。餐廳位於碼頭旁，全店位於二樓，可望見漁港的景色。據聞這店的龍蝦及刺身又好味、又抵食，我們看一看餐牌，有每日數量限定的龍蝦刺身套餐，不過我個人唔係太鍾意龍蝦做刺身，我覺得口感跟普通蝦差不多。所以我叫了「港あおしま定食」，有半隻龍蝦做湯及魚刺身，另外再點了一隻烤龍蝦。

港あおしま

餐廳內

我們坐在窗邊，看著的景色

定食的龍蝦湯非常香濃，以麵豉湯做湯底，跟龍蝦又好夾，入口後，有歷久不散的龍蝦香。刺身有五款魚，食得出係新鮮未有雪過的，非常鮮甜，只有位處漁港才有咁新鮮既魚生！烤龍蝦最精彩，一上檯已聞到香噴噴的龍蝦味，龍蝦肉入口彈牙，龍蝦膏香濃軟滑，漁港果然係漁港，超正！

龍蝦湯及刺身

燒龍蝦

燒龍蝦

鬼の洗濯板除了去青島睇，仲可以去鳳凰休息站 (道の駅フェニックス)，鳳凰休息站位於海邊，面向大海，可眺望日向灘的堀切岬及再次看到岸邊的鬼の洗濯板。於休息站內有一種蝦味的軟雪糕，好新奇，入口有蝦片個種味，大家一定要試試！

鳳凰休息站 (道の駅フェニックス)

這裡都有鬼の洗濯板

有蝦味雪糕

鵜戸神宮是宮崎縣其中一個必到景點，鵜戸神宮本殿建於天然海蝕岩洞內，是日本唯一在懸崖裡的神社。而由神社入口到本殿的步道全部沿海邊建造，朱紅色的建築跟藍天碧海構出獨有的景色！如果大家開車到鵜戸神宮，停車時要留意，鵜戸神宮有兩個停車場，我停了在近大馬路的大型車輛停車場，落車後要走上極多梯級的參道，穿過隧道，再步行落長長的石級才去到神社正門。而正門對出原來有個小型車輛停車場，我一見到，心中即時爆出：「我X！」，一陣仲要行返轉頭去個咁鬼遠既停車場！

去鵜戸神宮的隧道

大家記住要停圈住個停車場！

鵜戸神宮正門

位於海邊

行落去左手邊就係天然岩洞內的本殿

岩洞內的本殿

鵜戸神宮附近有一個公園叫 「サンメッセ日南 - Sun-Messe日南」。這個公園最特別是有七座南太平洋小島復活島上才有的摩艾石像 (Moai )。大家千奇唔好以為又係 A 貨景點！此七座摩艾石像是由復活島授權日本建做，以感謝日本為智利大地震賑災。Sun-Messe日南入場費 ¥700 一位，場內除了有摩艾石像，還有牧場、博物館及藝術展品。今天場內非常少人，我們去到摩艾石像的草地，尉藍天空下，望著背向大海的摩艾石像，感覺好似真係去到太平洋的小島。

摩艾石像

摩艾石像

仲有細些少的石像

面向大海！

其他藝術展品

今天晚上會到宮崎市內的 Hotel AreaOne Miyazaki (ホテルエリアワン宮崎) 酒店住一晚，由 Sun-Messe 開車去到宮崎市大約要一個小時左右。去到酒店附近，四周煙霧迷漫，車內冷氣由外面吸入的空氣帶著刺鼻的燒焦味，打開車窗聽到遠處有消防車的警聲，我估附近有火災發生。去到酒店門口停下車，急急腳走入酒店內，問一問職員泊車的位置。那位職員親自帶我出去停車場，他一看見四周煙霧迷漫，問我咩事，我話有火警掛！我都唔理得咁多，泊好車，Check-in 完，上房放下行李，跟住開車去宮崎的繁榮街。不過日本消防效率真係好高，剛才還煙霧迷漫，十多二十分鐘後便好像什麼事都沒有發生！只是有少少塞車！

Hotel AreaOne Miyazaki 

宮崎的繁榮街跟其他日本城市的繁榮街差不多，我們行了一個小時左右，決定轉去宮崎的 AEON Mall 行下好過！

宮崎繁榮街

宮崎 AEON Mall 內有超市、電器店及很多不同的小商店，而當中有一間牛角麵包專賣店叫 il FORNO del MIGNON 非常有名，雖然接近晚飯時間，但都忍唔住買了來吃！

AEON Mall

il FORNO del MIGNON

牛角包

晚餐原本打算到一間叫 ミヤチク 的餐廳食宮崎牛鐵板燒，但於 AEON Mall 行了差不多兩小時，好鬼死攰！最後決定於 AEON Mall 搵間餐廳食，明天晚上去食返佐賀牛補數！

AEON Mall 內都有不少餐廳，我們巡視了一轉，走入了一間叫「博多弁天堂」的餐廳。點解我地會走入呢間餐廳呢？因為我地比佢個九州七縣定食吸引左！定食可選二種、三種或四種菜式，我地好貪心地一人選了四種。菜式由九州七個縣中，每縣有四款菜式，即總共是有二十八款菜式，真係多到眼花撩亂！定食送到來，我地好後悔，因為碟碟都好大碟，一人食三碟餸加一個甜品，仲有白飯、湯，食完飽到上心口！

博多弁天堂門口

好多菜式

好豐富！