今朝起身上網睇下我地今日坐班飛機狀況，一起身時睇都仲冇事，洗完面再睇就見到航班取消，因為個颱風正正下午會經過台中。咁係出動 Plan B 既時候啦！諗下 Plan B 係咩野先。
首先要聯絡港龍轉另一班機，而家台灣打風，打去台灣港龍一定唔通，打去香港港龍應該比較好。我地張電話卡可以打返香港，但因為張卡有限錢，所以唔可以講太耐。我試下打去香港港龍，又係按一字，按二字咁，之後又比音樂我聽，我等左十分鐘，唔係路！就算有人聽，我都講唔切！好收線！我叫阿王生用佢電話卡打去香港馬可勃羅熱線試下，果然呢個快好多有人聽，好順利地我地改左坐聽日同一時間既航班。都幾好呀！放多一日假，玩多日！
搞惦好晒就食早餐，呢間紅點文旅既早餐好特別，每人有一個即煮既主菜，另外有自助頭盤及飲品。我地食完早餐就 check-out，諗住都去一去機場問下港龍櫃檯有冇酒店或餐飲提供。
 |
| 紅點文旅既早餐 |
 |
| 我叫左呢個漢堡 |
 |
| 呢個似甜品多 d |
開車去機場時，不時都有陣陣強風，個風真係越黎越近。我地去到機場，港龍櫃檯得一個人，我地問佢有冇酒店或餐飲提供，係冇既，佢只係比左張表，上面列左附近酒店既資料，即係廢既！
 |
| 台中機場 |
 |
| 我班機係 UO183，取消左 |
本來今日要還車，我地決定租多一日，因為始終有架車方便搵酒店及搵食。我地走去機場間 AVIS，辦好續租手續後，就回市區搵酒店。
我記得前晚揸車時，經過一間叫
Se7en 既酒店，成坐建築及大堂都幾靚，我地即刻用手機上網睇下，佢有兩層既樓中樓房間，好特別。我地決定去睇下有冇房，如果冇就返去住「逢甲商旅」。
去到 Se7en 酒店，停左架車門口，我一開車門行出去，超級大風，我又剛好企係塊濕滑既鐵板上面，比風一吹就滑倒左！我即時爬起身扮冇事行入去大堂，其實都有少少痛！(仲好驚比人見到咁柒！)
入到去問接待處，樓中樓既房得返一間，另外佢有普通房，我地決定租一間樓中樓，一間普通既房。因為時間尚早，所以未可以上房，我地先去食午餐。
 |
| Se7en 酒店既大堂 |
 |
| 後面係酒吧 |
黎到台中冇去春水堂飲杯珍珠奶茶，好似冇去過台中咁。我上 Google Map 搵到朝馬三街春水樓人文茶館，雖然打緊風，但係係春水堂內都有好多人。我食左吐司、牛肉麵及珍珠奶茶，好好味！
 |
| 春水堂午餐 |
 |
| 春水堂午餐 |
食完野，風越來越大，街上雜物吹到飛黎飛去，真係好危險！我地即刻揸車返酒店，攞左房之後就上房休息。我住樓中樓既房，樓下係廳、廁所，樓上係睡床，房內有塊兩層樓高既大玻璃，可以清楚睇到出面打風既情況。
 |
| 我間房門口地下投影左個房號 (804) |
 |
| 房內有樓梯上樓上睡房 |
 |
| 由樓梯影返去客廳 |
 |
| 樓梯下係水吧區 |
 |
| 樓上係睡房 |
 |
| 浴室都好大 |
係房瞓下，又起身睇下電視播既「康熙來了」，跟住要諗下今晚食咩啦！上次黎台中，去到台中大遠百既
饗食天堂，因為太多人，所以食唔到，今晚可以去試下！我地打電話去問下會唔會打風唔開門，佢覆我地話唔會，咁我地就訂左 7:00 。
6:30 開車去食飯，四周圍都係塌樹，跌左落地既招牌，真係可以話係「滿目瘡痍」。香港就算打完九號風都冇咁誇張！可能因為塌樹，好多道路都行唔到，所以好塞車，我地遲左少少先去到台中大遠百既停車場。我地入去停車場時，大部份車都係離開，得我地駛入去，一落車，有個女仔同我地講個場既舖關晒門，冇野睇啦！因為我地訂左位，所以照入去睇下。坐電梯上到十一樓，一出電梯，個保安話關門啦！趕我地走，我地話訂左位去饗食天堂，佢又比我地過去，好奇怪。行到去饗食天堂，真係有開門，但裡面好少人，得十枱客左右，員工仲多過客人。
 |
| 嘩！吹斷左棵樹 |
 |
| 招牌都吹左落黎 |
 |
| 呢兩個人係街下，好勇！ |
饗食天堂晚餐每位 NT$ 798，食物種類大路，沙律、湯、刺身、海鮮、熱盤等，種類真係好豐富。甜品櫃有超多不同種類蛋糕，好吸引！整體黎講，呢個價錢，有咁多野你食，算係幾好。食餐我覺得最特別係「和風銀杏土瓶蒸」及「鮮蛤蜊清湯」，新鮮即製，味道唔錯！食完大約 9:00 ，四圍仲係「滿目瘡痍」，我地都係返酒店休息啦！
 |
| 饗食天堂 |
 |
| 饗食天堂 |
 |
| 左上係和風銀杏土瓶蒸，左下係鮮蛤蜊清湯 |
 |
| 好多甜品 |
 |
| 真係好多甜品 |
No comments:
Post a Comment