201901 泰國第一日 - 清萊

五年前去過清邁，跟過一日遊去清萊，都只係走馬看花。今次見香港快運開左條直飛清萊既航線，價錢 $1000 左右，好平，所以就飛去玩下。價錢咁平一定唔會早機去晚機返，但佢都有良心，15:45 去，19:15 返，冇早機去，都有晚機返，返到香港 23:00 落機。由香港飛去清萊只需三小時，我地 15:45 上機，當地時間 17:45 落機。

落機後，先去櫃員機提款，提款時會寫明收 150 泰銖做手續費，計落個匯率係 0.2522。當日恆生現金賣出係 0.256，電匯係 0.2552。用櫃員機個匯率係最好既。

我地出發前上去網向 AVIS 租車公司預訂左兩架 Toyota VIOS，租足五日，每架車都只係港幣 $1000 左右。

由機場揸 15 分鐘就去到我地係清萊住既洛納卡拉酒店 (Nak Nakara Hotel)，呢間酒店房間係蘭納風格，一望已經好泰國。酒店中央地帶有個泳池，不過我地冇時間去游水曬太陽。價錢每間房一晚約 2200 泰銖。地點好，價錢唔貴，係幾好既選擇。

Check-in 完都已經晚上 7:30，我地既晚餐就去左附近一間叫 Ribs&Co. 既美式餐廳食野，上網睇佢個豬肋骨非常有名，另外我地叫左意粉、雞翼等小食。我地一行八個人，只係食左 2565 泰銖，大約 HK$650，係香港食同樣既野，兩個人都唔只 HK$650 啦！

由餐廳行幾個路口就去到清萊地標之一清萊鐘樓，清萊鐘樓係位於交通迴旋處既一座金色鐘樓，晚上會以不同顏色既燈光照著呢個鐘樓。

行幾個路口，我地就去到清萊夜市 (Night Bazaar)。清萊夜市除左買野同食野，仲有現場音樂表演。係附近空地剛好有個花卉展，我地順便入去睇下，影下相。