201901 泰國第二日 - 清萊

酒店既早餐都幾好，有泰式湯麵，有西式煙肉、蛋等。夠食飽飽出發。

係清萊有三座廟好出名，最有名係白廟，跟住就係藍廟 (Wat Rong Sue Ten)，另一個叫黑廟 (Baandam Museum)。今早我地就先去 15 分鐘車程既藍廟。

藍廟真係一座藍色既寺廟，除左寺廟牆壁屋企係藍色，連入面既佛像都係藍色。估唔到藍色配金色都好靚。重點黎啦！藍廟係免費參觀架！

由藍廟去黑廟，車程只係二十分鐘左右。黑廟英文係Baandam Museum，其實唔係一座寺廟，係一個博物，正確名稱係黑屋博物館。黑廟係由2014逝世既藝術家 Thawan Duchaneey 建造，佢以對比強烈既藝術品黎呈現生命與死亡既世界。講到咁深，未必人人都可以體會到。其實黑廟地方好大，入黎睇下佢既建築物，行下都唔錯架。重點又黎啦！黑廟唔係免費入場架！每位 80 泰銖，唔貴，抵入去睇下啦！

揸 15 分鐘車左右就去到另一景點，長頸族少數民族村 (Union of Hill Tribe Villages and Longneck Karen Village)。講重點先，入場費 300 泰銖一位。我地去到冇咩遊客，入到去有長頸族既人做下手工藝品，遊客可以同佢地合照，唔會另收費。我感覺呢個民族村係佢地返工既地方，唔係一條佢地真係住既村莊。

今日午餐，我地去左 Tripadvisor 清萊必到餐廳第二位，Chivit Thamma de Coffee House。呢間餐廳位於 Kok River 河畔，係一座英國維多利亞式房屋，並建有英式庭園，門口放左好多古董車，去到有如返到維多利亞時代既英國。食物方面，有西式炸魚著條、漢堡，又有泰式菠蘿炒飯。不論環境及食物都非常高分，不枉係清萊必到餐廳第二位。

午餐後就去左 Central Plaza 商場行下，去下超級市場買下野。

晚餐我地去左一間好細好地道既小店，佢個名叫 PadThai Thai Food & Drinks。呢間小店係 Tripadvisor 地道泰國小店第三位。佢個門面超級唔超眼，直情可以話係簡陋。因為小店太細，太少位，我地八個人就要等一陣先有位。入到去，我地點左炒飯、炒河及沙律等食物。呢度其實就似香港既大牌檔，地方簡陋，但食物即叫即炒，好夠火喉！

晚餐後又走去行下夜市，食下街邊串燒，去雪糕店食下雪糕。