202001 英國旅遊遺失 BNO 英國國民（海外）護照 British national (overseas) passport 的緊急補領方法

如果大家去旅行時，遺失護照，只要到當地的領事館補領就可以。例如持香港特區護照就到中國領事館，持英國國民（海外）護照 (BNO) 就去英國領事館。不過如果持英國國民（海外）護照 (BNO) 於英國旅遊時遺失護照，英國境內當然沒有英國領事館，咁究竟要去邊度緊急補領呢？




今年 2020 年初同屋企人去英國玩，係農曆年廿九晚，家人於倫敦比人偷左個背囊，所有錢，證件，包括英國國民（海外）護照 (BNO) 及香港身份證都唔見晒。而當晚係星期四，我地星期日就要飛返香港，所以只有星期五及星期六一個半天既時間去補領，補領唔到就要改機票。

準備既文件及資料：
- 你遺失左既 BNO 護照編號
- 如有香港身份證正本或副本會更好 (因為我家人連身份證都比人偷左，所以我冇，但當局有問過我攞)
- 信用卡 (比補領護照錢)
- 回程機票既證明，要比佢睇到你就快要上機，同呢張機票唔係剛剛買，我就比左機票既 Confirmation 佢睇，上面有個 Payment Date 證明我兩個月前買。

以下文件就會教大家點攞：
- 附有案件編號 (Crime Number) 既 Victim Care Card 及一張寫有案件詳細資料既文件。
- 預約補領護照既電郵
- 相片兩張
- 護照申請表


1. 報警
我地一唔見左背囊當晚，飯都冇食，就去左倫敦既 Charing Cross Police Station 報警。你一定要報警，因為你要取得附有案件編號 (Crime Number) 既 Victim Care Card 及一張寫有案件詳細資料既文件。一定要有呢兩份野，我地先可以用 4 小時緊急補領護照既 Paper Premium service。

2. 搵啱正確既補領護照部門 - HM Passport Office
入境事務處有個協助在外香港居民小組 24 小時求助熱線，熱線號碼為 (852) 1868。唔好打比佢地，我就係因為打左比佢地，比佢地教左行錯條路，浪費時間。因為我地用英國國民（海外）護照 (BNO) ，佢地係唔識幫我地。佢教我去英國既移民局，我就一早走左去位於西敏區既 UK Visas and Immigration Office，去到問局內職員，佢話我地要去 HM Passport Office。咁我就又走去位於 Victoria Station 旁既 HM Passport Office。所以記住，我地要補領既部門係 HM Passport Office。

3. 網上預約
其實 HM Passport Office 係唔受你即時行去補領，你一定要上網預約。我打左好多個電話問 HM Passport Office 既顧問 (advisor)，而個顧問又唔係好知有關 BNO 補領，佢都問左好多其他人，將我個電話飛黎飛去，問左成個幾鐘，先搞清楚要點做。如果你想打去問下，可以打 HM Passport Office 既熱線: 03002220000。呢個熱線開頭係一個類似 Siri 既話音系統，我同佢玩左好耐先搵到真人同我講野。

入返正題，如果你睇我呢編野，可以唔駛打去 HM Passport Office 熱線問啦！你直接上 HM Passport Office 網站既 Get a passport urgently 網頁。

https://www.gov.uk/get-a-passport-urgently

佢有三個服務，一個係要一星期先可以攞到護照既 1 week Fast Track，另一個係 4 小時可以攞到護照既 Paper Premium Service，最後一個係 Online Premium Service。不過因為我地唔係住係英國，你選 Paper Premium Service 及 Online Premium Service 佢都唔比你過，要你選返 1 week Fast Track。

我地照選 1 week Fast Track ，然後按 Book an appointment and pay by card。

於 How many passport applications are you marking? 選 1 ，並填寫個人資料。

於 What type of passport application are you marking? 選 Replace a lost, stolen or damaged passport

你會見到佢話要收你 142 英磅，照去。

下一畫面會出現可以預約既 HM Passport Office 及日期，我就選左 London 既即日 16:15。你地當然選最近你既 HM Passport Office 及最近既時間。其實個時間唔仲要，因為我都唔跟呢個時間去 HM Passport Office。

之後再入埋其他資料，例如電郵地址，信用卡付款資料，比埋錢。佢就會 email 個預約補領護照既電郵 (Confirmation of your appointment email) 比你，去確認你個預約。


4. 去已經預約既 HM Passport Office 約見
我一預約好，就即刻去我預約左既 HM Passport Office 既詢問處同佢講我個情況。我同佢講我家人禽晚比人偷左本 British National (Overseas) 護照，我地過兩日就要上機飛返香港，同埋我地已經報左警。詢問處個女仔好好人，佢同我地打去佢地個 Emergency Unit (緊急部門) 講我地個情況。佢安排左我地變成 Premium service，我地唔駛等到預約時間，即刻可以入去約見辦護照。呢個時候，你係詢問處可以拎張護照申請表填，並可於 HM Passport Office 既自助影相機影護照相。係詢問處附近會有個叫 check-in 既櫃位，要記得過去拎個籌。

5. HM Passport Office 約見
去到約見既地方，其實好似香港入境處一樣，一個個櫃位。我地去到個櫃位，個職員問我地點解要搞快證，我又講一次個故仔佢聽，跟住比晒相關文件比佢。快證係要 177 英磅，我地之前網上比左 142 英磅，再比埋個差價，跟住佢就比張紙我，叫我 4 個鐘後到樓下 Passport Collection 個櫃位出示呢張紙領取護照。

四小時後，我地順利緊急補領英國國民（海外）護照。由遺失到補領成功，全程唔駛 24 小時。

呢本就係即時拎返有十年效期既 BNO

網上好少人講點樣係英國補領英國國民（海外）護照，希望呢編野幫到有需要既人。