Joseph@外地遊記: 202507 日本茨城第一日

今次七日行程，頭兩日留係東京，之後租車去茨城縣玩五日。出發前上網搵景點，茨城縣原來多年被票選為都道府縣魅力度最低既地方。去之前都有少少驚中伏，但為左全制霸日本都道府縣，點都要去一次茨城縣。 (全制霸日本都道府 = 去過全日本 47 個都道府縣，我而家只欠三個縣，分別係福井，三重及岡山)。不過去過茨城縣之後，我又唔係覺得咁差，可能期望不大，所以冇咩太大落差。

大洗神磯之鳥居日出

第一日，一早坐 08:15 既國泰 CX526 出發，因為早機，先入國泰 The Pier Lounge 食早餐，上到機再食左個日式比目魚早餐，食物正正常常。

The Pier Lounge 雲吞麵

機上日式麵醬比目魚飯

到達成田空港，過海關唔係太多人，下午 1:55 落機，下午 2:15 已經過完海關，拎埋行李，只係用左 20 分鐘。平時大家一係坐 Skyliner，一係坐 N'EX 成田特快去東京市區。我今次因為住淺草，所以會坐 14:47 既成田 Sky Access 特急直達淺草。呢架特急列車係一架普通列車，好似香港地鐵，乘客坐車箱兩邊，所以好平，只係 ¥1380。由成田空港第二航廈去到淺草站需時 55 分鐘。

成田 Sky Access 特急

我地會住 The b Asakusa 酒店，隣近淺草站。不過唔係近成田 Sky Access 特急既淺草站，而係都營地下鐵既淺草站。淺草站一共有4個，分別係東京地下鐵、都營地下鐵、東武、筑波快線，站與站之間既距離都幾遠。我地落左電車，仲要轉的士去酒店，的士費 ¥1200。係日本坐的士，可以用 GO 日本的士 App ，或 Uber。今程的士我係用 GO 日本的士 App，佢跟錶再加行李費收錢。後來我試過用 Uber 叫車 (唔係叫的士)，佢跟 Uber 出個價，冇再額外收行李費。所以如果有行李，用 Uber 會比較抵。

The b Asakusa 位置非常方便，行去雷門都係 5 分鐘。旁邊有 LIFE 超級市場，對面有 ROX 大商場、唐吉訶德,激安的殿堂 (Donki) 及Uniqlo等。房間有 18 平方米，超碼有位置開行李箱，而個廁所唔係平時日本全個膠倒模出黎既，係一個正常既廁所。酒店地下有免費咖啡及茶，另外晚上 8:00 - 10:00 仲有免費冬甩。

the b Asakusa

酒店附近有一間百年壽喜燒老店，米久本店。網上講係排隊人氣餐廳。我地為左避開排隊時間，所以 4:45 就去食。當我地去到，真係冇咩人，可以直入，店內亦只有一檯客人。店內是日式老宅氛圍，餐牌及門口都注明不能拍照，但我又見有其他顧客係度拍照，所以我都有影少少相。

米久本店只售壽喜燒，有 General (普通)、Special (特別) 兩種唔同等級既牛肉選擇。普通既係 ¥3160 ，特別既係 ¥3790，另外白飯一碗 ¥320。我地叫左兩份特別壽喜燒，加左兩碗飯及兩杯檸檬梳打。以壽喜燒黎講，米久本店既價錢係非常便宜，可能因為便宜，所以份量亦唔太多。兩份壽喜燒有一碟好靚既和牛、四件豆腐、十塊大蔥、兩隻蛋、少少粉絲及少少菜。

高級既壽喜燒店都會有店員幫你著。米久本店因為便宜，所以需要自己動手。但第一下店員會幫下手落牛肉、蔥及壽喜燒汁作示範煮法。因為份量唔多，好快就食完。其實我覺得咁靚既和牛，要燒烤先好食，壽喜燒或火鍋都食唔出和牛既香濃油香。壽喜燒試過就算，我唔係太喜歡。

食完壽喜燒都只係下午 5:20，因為真係冇飽既感覺，所以可以即刻走去附近既芋やす番薯專門店買左隻燴番薯食。日本既番薯真係又香又甜。

芋やす

因為天都未黑，而我地又好多年冇黎過淺草，所以做一做淺草指定行程，遊覽淺草寺。而家既東京真係好多遊客，歐美遊客、東南亞遊客都濟滿淺草寺及整條表參道，日本真係變左一個非常受世界歡迎既旅遊國家。

入夜後，我地就去行下 ROX 商場，商場內有 GU 服裝店，Nitori 家品店，西松屋童裝店。另外附近有一間 UNIQLO 淺草店，店內有淺草風既限定商品，亦有 UTme，顧客可透過店內既 iPad 設計自己既 T-shirt，並即時印出黎。我就印左一件淺草花屋敷遊樂場既熊貓 T-shirt，價錢只係 ¥1990。係 UNIQLO 對面仲有一間超大既 Donki，呢間 Donki 有好多層，但冇涉谷既 Donki 咁多人，所以幾好行。