一早凌晨4:00出發，去神磯之鳥居睇日出。我哋照原定計劃，去到大洗公園停車場泊好架車，然後行去最佳位置等日出。去到都見到有幾十人一齊等。因為係向住一望無際嘅太平洋，所以個太陽係由水平線升上嚟，日出嘅陽光唔太耀眼，可以用雙眼直視。
日出之後10分鐘左右，太陽開始變為金黃色，剛剛就會停喺鳥居中間，呢個就係最佳嘅拍攝時機。因為今日天氣好好，所以影到靚相，冇白費我一早起身過嚟，好開心！
返到酒店再瞓多一陣，早上8:00喺酒店食咗個豐富嘅自助早餐，九點就離開啦！
我哋揸咗一個鐘頭左右車，就去到鹿島神宮嘅一之鳥居。一之鳥居係日本最大嘅水中鳥居，不過唔知點解，完全冇任何配套，附近只係普通嘅民居。所以我哋去到一個人都冇。
跟住我哋揸咗半個鐘左右車，去到成田夢牧場。我哋去牧場嘅目的唔係睇動物，而係睇向日葵花畑。牧場佔地約30萬平方米，夏天會種植11萬棵向日葵。向日葵分兩個品種，有小巧既「Short向日葵花田（Shortひまわり畑）」及比人更高既「Tall向日葵花田（Tallひまわり畑）」。我地去到係高身向日葵盈開既時候，一大片黃色花畑，好壯觀！
成田夢牧場其實主要係同山羊、綿羊及迷你馬等動物玩，係大熱天時下，我都嘗試左去山羊區，影左幾張相，但真係太熱，頂唔順，決定走啦！
係去機場前，去左附近既 AEON 成田，把握最後入貨機會。
 |
| AEON 成田 |
係成田空港既豐田租車還左車，然後去國泰櫃位預辦登機，國泰職員同我地講航班會由原來既 17:15 延誤到 18:10。今日成個成田空港都唔太多人，十分鐘左右就過完海關。
 |
| Toyota 還車 |
我地先去免稅店買下手信，然後去國泰既貴賓室，國泰成田空港既貴賓室有別於其他機場既國泰貴賓室，冇即製既熱食，例如招牌擔擔麵。食物種類唔多，有芝士、火腿、菜、麵包、蛋糕仔、壽司等，酒就有香檳。呢黎既好處係好少人，好靜。因為早上去牧場出左一身汗，最好係呢度沖個涼。
 |
| 國泰成田空港貴賓室 |
 |
| 香檳 |
 |
| 浴室 |
因為航班延誤左，我地好多時間，所以去埋日航既 Sakura 貴賓室。有人會問點解預辦登機時，職員只係比左一張國泰貴賓室既邀請劵，點樣入去兩個 Lounge。其實張邀請劵作用不太，只要你出示當天既商務或頭等機票，你就可以入去寰宇一家航空公司貴賓室，仲要不限次數，你鍾意出出入入都可以，而寰宇一家係包括國泰、日航、澳洲航空、英航及卡塔爾航空等。
日航 Sakura 貴賓室因主場優勢，有兩層，佔地非常之大。不過亦因為係主場，所以勁多人。食物種類勁多，最著名係咖哩飯。酒類都好多選擇，不過氣酒方面，只有西班牙氣酒 CAVA，冇香檳！好彩係國泰貴賓室已經飲左！
 |
| 日航 Sakura 貴賓室 |
 |
| 咖哩飯 |
另外想講講今次呢班機。本來架機係 A330-300，佢將兩班機合併為一班，所以改左架機去777-300，有個好處係商務位由區域性商務艙變為反魚骨式商務艙，可以180度躺平。去到派餐時就出事啦！前菜本來有意大利香醋橄欖油沙律、綠茶冷麵、烤紅鯛魚、八爪魚、玉子燒、三文魚卷及醬酒茄子。佢因為唔夠前菜派、所以應該係用經濟艙既食物變個前菜比我。成個前菜得返少少沙律菜同好肉酸既冷麵，其他野完全唔見晒！連件牛油都係商務艙既包裝牛油。我見我隔離個乘客係有晒成份前菜，我就冇左囉，我係有唔高興既！仲要我係正日生日，我專登試下正日坐商務艙會唔會有咩特別禮遇，係冇既，仲要有比人地差既禮遇。失望！
 |
| 前菜係咁樣上，中間冇左碟野 |
 |
| 仲好快上埋個主菜比我 |
 |
| 好彩都有生果，芝士及雪糕 |
No comments:
Post a Comment