早上 8:00 出發，由酒店坐 Uber 去上野既 Toyota 租車公司攞車。今次因為得兩個人，所以租架細車 Toyota Yaris。平時係香港揸開電車，好耐冇揸電油車，有少少擔心會唔習慣。但上車揸左一陣就熟習返揸電油車，畢竟係香港揸電車之前都揸左十幾廿年電油車。不過第一日，我有兩次離開左架車先發現冇鎖車。
我地第一站係去角川既角川武藏野博物館，係途中崎玉縣既 Gusto (ガスト) 和光店停一停食早餐。Gusto 係一間連鎖既日本平價家庭餐廳，一份早餐，有煎雙蛋、煙肉、香腸、少少沙律、多士及自助飲品吧，價錢只係 ¥750。
 |
| Gusto (ガスト) |
大約 10:45 到達角川武藏野博物館，因為今日係星期日，好多車排隊入停車場。博物館由花崗岩所組成，外型前衛。而館內最著名既係由約八米高既巨大書架包圍既圖書館，大家不期然會聯想起哈利波特既圖書館。不過年頭去過被稱為世界最美圖書館，位於維也納既奧地利國家圖書館，呢個角川武藏野博物館內既圖書館真係小型好多。
不過圖書館內會定時播出投影表演，表演利用3部投影機將影像投射於書架，令圖書館搖身一變成為數碼藝術舞台，內容就帶大家走過日本既傳統與科技。呢個表演都幾好睇！
角川武藏野博物館旁邊有個武蔵野坐令和神社，神社係走超現代風格，神社建築，手水舍及鳥居都與別不同。
係角川武藏野博物館附近，有一個全東京都最大的溫泉樂園 Spadium Japon。本來打算去玩下同食午餐，不過天氣真係太熱，鼓唔起勇氣係大熱天時去浸溫泉。所以決定直接揸車去 AEON Lake Town。
AEON Lake Town 係日本最大型購物中心之一，成個購物中心分為三大棟建築：風(Kaze)、森(Mori) 及 Outlet，有多達 700 間店鋪。
 |
| AEON Lake Town 森(Mori) |
風(Kaze)、森(Mori) 係兩棟大型購物商場。風(Kaze) 以國內外著名品牌為主，有少少似香港既圓方。森(Mori) 就有不同種類既商店，AEON Style，戲院及不少餐廳和咖啡店進註。Outlet 就係 AEON 第一間既 Outlet，大家除左三井及 Premium outlet 外，又多一個選擇。
 |
| AEON Lake Town Outlet |
我地有五個半小時係 AEON Lake Town，但都冇可能行得晒。為左慳時間，午餐就係 Outlet 既 Burger King 搞掂。5:00 左右就係森(Mori)內既 nana's green tea 食下午茶。晚上 7:00 先離開。
我地今晚會住係土浦既 「BEB5土浦 by 星野集團」。由 AEON Lake Town 去土浦要揸一個鐘車。「BEB5土浦 by 星野集團」位於土浦站樓上 3 至 5 樓，對坐火車既遊客非常方便，但對揸車既遊客就唔太方便。因為土浦火車站冇位比你泊低架車，然後去 check-in，停車要泊去土浦市駅東駐車場，離酒店有一段距離。我只好停左係土浦站既上落客位，叫老婆留係架車，我快快地一個人推兩件大行李上酒店接待處先放低。跟住匆匆地回去揸車去停車場，泊好車，再行 5 分鐘返酒店攞返行李及攞房。
 |
| 土浦站「BEB5土浦 by 星野集團」 |
酒店是一間單車友善酒店，所以空間特別寬敞，每層樓都有很大的公共空間比住客休息或存放單車。房間有 24 平方米，有經過設計，以榻榻米分出玄關與房間兩個空間。
 |
| 酒店大堂公共空間 |
晚餐我地去左火車站對面既焼肉秀門食燒宮崎和牛。佢有一個宮崎牛焼肉套餐，一份 ¥5000。我地點左兩份，套餐包 4 種前菜，5 款牛肉及白飯任裝。佢既牛肉係靚既，不過我唔鍾意佢有醬汁醃過。如果可以選冇醃過既肉就好好多！
No comments:
Post a Comment