Joseph@外地遊記: 202507 日本茨城第四日

住「BEB5土浦 by 星野集團」是沒有包早餐，但可以係佢大堂既咖啡店買簡單既三文治早餐。我地選擇去左車站既 Tully's Cafe 食早餐。今日會離開土浦，然後去笠間及水戶，晚上住係水戶市內。

BEB5土浦 by 星野集團

昨日係 AEON Laketown 買左西瓜，今早切左黎食

早上 9:00 出發去笠間稻荷神社，車程大約一個鐘。有 1360 年歷史既笠間稻荷神社係日本三大稻荷之一，其餘兩個分別係京都既伏見稻荷大社及佐賀縣既祐德稻荷神社。神社地方不大，短短十分鐘內就參觀完。如果五月黎到可以欣賞紫藤花，十月就有菊花祭。我地七月黎係咩都冇。

笠間稻荷神社行幾分鐘就可以去到笠間日動美術館，美術館分四個區，有展示日本本地畫家作品既日本館及企畫展示館，有展示雕塑既戶外展區及展示西方畫作既本館。平時去日本好少去睇西洋畫既美術館，點解要黎笠間日動美術館？因為佢竟然展出莫內、梵谷及畢卡索呢三位大師既作品。雖然展品唔多，但都係估唔到係日本都可以睇到咁著名既大師畫作。

笠間盈產一種白色既花崗岩，被稱為「稻田石」。係百多年前，已經係笠間市石切山脈一帶開採。我地跟住就係去石切山脈參觀一個已經停止運作既採石場遺跡。係採石場可看到被開採過既山頭露出白色一層層既石紋，山頭前由泉水及雨水匯聚而成既湖，景色好獨特。採石場旁有間露天 Cafe，遊客可以買一杯用笠間出產既栗子所做既 Mont Blanc (蒙布朗)，享受甜品同時欣賞石切山脈既景色。但我七月黎到，仲要接近中午最熱既時間，都係快快影幾張相，即閃！

午餐我地揸車去左一間位於水戶，叫和牛庵既餐廳食高級版牛丼。和牛庵位置比較隱蔽，泊好車都要搵下先見到。餐廳係一間獨立既日式傳統建築，四周圍繞著花園 (其實唔只花園，可以叫森林)。入到餐廳，內裡係日式既奢華氛圍。

和牛庵，建築物被樹木包圍

和牛庵係專門食茨城和牛「常陸牛」。佢地提供里肌肉、腿肉、牛腱，並以低溫慢煮，再烤到外層焦香，中間粉嫩。和牛庵最出名係和牛三吃「ひつまぶし（Hitsumabushi）」，呢個食法令我諗起名古屋鰻魚飯既食法。

一碗鋪滿常陸牛既牛丼放於高級既錦龜甲飯碗，賣相已有滿滿儀式感。餐廳建議先把飯十字切成四等份，第一食係直接品嚐原味，因為牛肉以慢煮，所以唔會有食燒肉既沖擊感，反而係淡淡滲出常陸牛既香。第二食可以加上新鮮芥末、蔥及芝麻，因為牛肉中間既嫩滑，再加上芥末，有少少以為自己食緊大吞拿魚腩，第二食我覺得係最好食。第三食係加入日式高湯做成茶漬飯，加入左高湯，沖去牛肉既油膩感，係比較清淡既食法。最後既一份就跟據自己喜愛隨意品嚐。

和牛三吃

環境好好

蘑菇湯

套餐仲包括蘑菇湯、沙律、雪糕及飲品。飲品可以選咖啡或茶，因為天氣太熱，所以點左凍烏龍茶。後來發現佢既咖啡係專人即沖既手沖咖啡，好後悔冇點熱咖啡呀！

食完飯大約下午3:00，可以去今晚住宿既酒店 Hotel Sealuck Pal Mito (ホテルシーラックパル水戸) 攞房休息下。呢間酒店位於水戶市中心南邊，離水戶站有 5 公里，揸車都要 15 分鐘，只係適合揸車既遊客。我選呢間酒店係因為佢有免費停車場，房間又有 18 平方米，仲包早餐。

Hotel Sealuck Pal Mito

酒店休息左一個鐘左右，下一個景點係水戶藝術館，早上去完笠間日動美術館，而家又去藝術館，真係咁有藝術氣息？其實唔係既，我地黎水戶藝術館，唔係參觀藝術館，而係水戶地標，高達100米既水戶藝術塔，水戶藝術塔以生物遺傳結構 (DNA) 的雙螺旋設計，坐升降機可以登上塔頂，透過一個圓窗一覽水戶市既全景。

水戶藝術塔

水戶藝術塔上既風景

日本三大名園有金澤市既兼六園、岡山市既後樂園及水戶市既偕樂園，我地下一個景點就係呢個日本三大名園之一既偕樂園。我地 5:30 去到偕樂園既停車場，收費處既更亭已經關門，我停左架車都冇地方可以比錢，算啦，來都來了！偕樂園入場，每位 ¥320。跟據之前去兼六園既經驗，唔係花季，去名園都只係睇下日本園景，會有少少悶。果然，真係冇咩野睇，我地行左唔夠半個鐘就走。走既時候，入口售票處都關左門，我見仲有人6:00 後入去，自出自入，唔駛比入場費。