之前試過揸車去到某地方既 AEON Mall ，入到去好似八十年代既香港吉之島，好舊，好細，完全中伏。最近 X 上有個日本網友 Kaze-3681 將全日本 AEON Mall 評分為 SS 級到 F 級。AEON Lake Town 當然係 SS 級大佬。今早我地去左車程 20 分鐘既 AEON 水戶內原，而 AEON 水戶內原被評為 S 級，雖然冇 AEON Lake Town 咁勁，但都好大，好多商舖。
 |
| AEON Mall 入面既 Muji |
我係 AEON 入面發現一間叫 ふるいち既玩具模型店，入面既 PS5 遊戲及高達模型都好平，可以免稅。我入手左 PS5 既新遊戲 Death Stranding 2，只係 ¥6980 (約 HK$380，香港官方賣緊 HK$568)，勁抵。
午餐係 AEON Mall 入面一間拉麵店 - 鶏白湯専門店つけ麺，冇咩特別，最特別係快，慳左時間可以行多幾間店舖。
係 AEON Mall 行左四個鐘，下午 2:00 我地出發去日本三大名瀑之一既袋田瀑布，其餘兩個分別係和歌山縣既那智瀑布及栃木縣既華嚴瀑布。車程大約一個鐘頭十五分鐘。我地駛去袋田瀑布時，開始落雨，仲行雷閃電。今次成個七日行程，得袋田瀑布係落雨，一離開袋田瀑布就好返天。可能因為袋田瀑布位於深山中，天氣唔太穩定。袋田瀑布高120米、闊73米，因岩壁斷層形成 4 段式瀑布，水量亦充足，所以都算係壯觀既。
係袋田瀑布逗留左一個鐘左右，跟住就去有全日本最美電車站美譽既「日立駅」。今次車程約一小時。日立駅由出生於茨城縣既知名建築師「妹島和世」設計。2014年榮獲了布魯內爾獎Brunel Awards - Station Building Awards 。車站除了用高透光簡約設計，背後仲有廣闊既太平洋，因此成為一個絕景車站。
車站最近太平洋既一端，就係海景咖啡廳「Sea Birds Cafe」。我地入去食個下午茶，一邊享受海景，一邊品嚐咖啡及美點。
 |
| 踏入福島縣 |
Teamlab 五浦 幽谷隠田跡晚上 7:40 先開始營業，我地 7:30 左右去到。佢既位置係荒山野嶺，停車場直情伸手不見五指，泊好車，我地靠手機燈行去售票處。Teamlab 五浦 幽谷隠田跡入場費一人 ¥2200，停車場就 ¥500。
呢個室外 Teamlab 有少少似大阪長居植物園既 Teamlab。佢都以燈光及自然環境製造一個個不同既藝術空間。例如樹上或海面上投上不斷轉變顏色既燈光。漆黑樹上掛上非常多光條，而高速光粒於光條上快速穿梭，形成好似好多流星係樹林中飛來飛去。最特別係遊客可以係一個佈滿發光球既湖面上步行，大家都練成輕功水上漂！
 |
| 海面上投上燈光 |
我地係 Teamlab 玩左一個半鐘，大約 9:00 左右走。因為之前食左下午茶，又唔係太肚餓，所以今晚係冇食晚餐。我地揸左一個鐘車左右，返到水戶，然後再去昨晚去過既 ゆるうむ (Yuluumu) 浸溫泉，咁就玩左一日啦！
No comments:
Post a Comment