行程最後一日，今日將會坐下午 4:40 飛機離開，都仲有半日時間玩下！早餐我地返入舊城，去左一間正正於史特拉敦大道 (Stradun) 上既餐廳，叫 Cele Dubrovnik Gourmet & Lounge。我地坐係熱鬧既史特拉敦大道，叫左個豐富既英式早餐，享受埋今個旅程係克羅地亞既早餐。
早餐後我地搵下附近有冇超級市場，因為我地想去買下當地既零食做手信。上去 Google Map 搵，最近既超級市場叫 Tommy Supermarket，由舊城行去大約半個鐘。我地慢慢行去，沿路既民居地帶仲有一間賣蔬果既小店。係超級市場買完野，我地叫左 Uber 車我地返去舊城區，車錢係 KN37。
 |
| 蔬果小店 |
 |
| 蔬果小店 |
 |
| Tommy 超級市場 |
返到舊城區，最後衝刺去買野。要介紹下一間叫 UJE 既連鎖店，呢間店既橄欖油及松露都好出名，有成粒用油浸既松露賣，價錢唔太貴。
大約 1:00 ，我地去左 Apartment 附近一間叫 Horizont Restaurant 餐廳食個甜品，我地是但搵一間走入去食，估佢唔到整個甜品又幾有心機，擺盤好靚，味道亦不錯。
我搵過，去機場可以坐巴士，KN40 一位。Apartment 屋主搵左佢個女，揸架 BMW 黎車我地去機場，佢只係收我地 KN220，我地四個人坐巴士都要 KN160 啦。佢個女架 BMW 仲要係新車，我放行李上去時都勁小心，好驚整花佢架車。
 |
| 杜布羅夫尼克機場 |
我地坐飛機，先飛德國慕尼黑，等四個鐘就轉機返香港。係慕尼黑機場梗係要去食下德國豬手啦！不過我問左機場詢問處，得一間餐廳有豬手，而佢只係切左片既豬手，唔係成隻！
No comments:
Post a Comment