今日先揸車到附近麥當勞食早餐，然後揸左一個多小時車由扎達爾到克爾卡國家公園 (Krka National Park)。
克爾卡國家公園入場費 KN100，由入口可以坐免費巴士到大瀑布群。公園內一共有十七條瀑布，景色可跟十六湖國家公園(Plitvicka Jezera) 媲美。我上網搵資料時，睇見克爾卡國家公園允許遊客係大瀑布前遊水，唔游水浸下腳都可以。不過我地當日去到，天氣比較涼，所以冇人落水。
 |
| 大瀑布 |
 |
| 大瀑布 |
遊客可選擇公園預先設定路線參觀，我地今日就行 Skradinski Buk Trail，全長 1900 米，大約行一小時。不過我地影下相，又四圍行下，都玩左三個鐘。呢條路線除左有瀑布睇，仲會經過一個群小屋，有水車睇，仲有紀念品店及小食店。如果有時間，仲可以坐船遊湖去另一個入口 Skradin。
我地差唔多 2:30 先遊完湖，午餐就係克爾卡國家公園售票處對面間快餐店食漢堡飽。
本來我地既行程係去酒莊及 Outlet，但臨時改去位於斯普利特 (Split)近郊既庫利斯要塞 (Fortress Klis)，呢個城堡亦係權力遊戲既拍攝場地。城堡位置山上，可俯瞰下面斯普利特一帶，景色優美。以軍事角度黎講，地理位置優越，易守難攻。
由庫利斯要塞揸一個鐘車就去到斯普利特 (Split)，斯普利特將會成為我地既要塞，我地會住三晚，其中一日仲會出海去玩。
係斯普利特，我地預訂左一間 Apartment。個屋主唔係度，佢留言叫我地自己係門口地毯底拎鎖匙開門入去。呢間 apartment 係一座三層建築，有 d 似香港既村屋，一個單位一層，我間房係地面個層， 出面有個空地，可以曬下衫，不過好多昆蟲。最搞笑係房主只有一卷廁紙比我地，我 Whatsapp 問佢，佢話廁紙應該我地自備，不過我叫清潔姐姐第二日比多一卷我地，我真係第一次聽，多謝晒！
今晚既晚餐，我地去左 Bakra - Steak & Pizza Bar，呢間係 Trip Advisor 內斯普利特排第五既餐廳，我地去到餐廳內已經好多人，好彩都安排座位比我地。睇見個餐牌，好多野都想食，叫下叫下，我地四個人叫左好多野，有雞翼薯條，湯，木火爐烤既牛扒、薄餅、麵包及蔬菜。呢間既野食真係極好味，可能佢係用木火爐 (Wood-fired oven)，所以好香。薄餅及麵包又熱又好味。個牛扒又係燒到剛剛好，外香內軟，再配杯紅酒，勁飽勁滿足既一餐。
No comments:
Post a Comment