今日由斯普利特 (Split) 揸車去我地係克羅地亞最後既目的地杜布羅夫尼克 (Dubrovnik)，由斯普利特去杜布羅夫尼克全程230公里，我地會途中到涅姆 (Neum) 及斯通 (Ston) 停下及玩下。
 |
| 涅姆 Neum |
涅姆唔係屬於克羅地亞既地方，而係屬於波士尼亞與赫塞哥維納 (個名太長，我地簡稱佢做波赫)。克羅地亞最東南面既國土係比波赫分開左，所以我地一定要穿過波赫先可以去到杜布羅夫尼克。揸車穿越邊界時，要比護照佢地睇一睇。
 |
| 進入波士尼亞與赫塞哥維納 |
我地去到另一個國家，點都落車影張相，當到此國一遊。我地去到海邊影左張相，跟住去左一間叫 Grand Hotel Neum 酒店飲杯咖啡、食件餅。比錢時，點解咁平既？原來佢係用波赫既貨幣。我地冇呢種貨幣，呢個時間就係信用卡出場既時候。講返呢間酒店，正架！我地坐係露台位置，對住個海飲咖啡，係好爽架。
 |
| Grand Hotel Neum |
離開左波赫，我地又返到克羅地亞，我地既午餐係去到一個叫馬里斯通 (Mali Ston) 既小鎮。馬里斯通既海灣係著名既蠔養殖場，品種係 European Flat Oyster。所以好多遊客專程黎到品嚐新鮮即開既生蠔。我地去到海灣附近既餐廳 Bota Sare Restaurant & Oyster Bar。呢度生蠔 KN10 一隻，烤蠔就 KN12 一隻。我地叫哂兩種整法既蠔，另外叫左蕃茄湯、魚湯、蠔湯及意粉。主角生蠔及烤蠔都非常好味，我搵支叉吉下隻生蠔，佢仲郁架。入口海水及蠔既鮮味都好特出，一流既味道。烤蠔都好好味，不過咁新鮮既蠔一定係生食最好。
 |
| 馬里斯通 Mali Ston |
 |
| 蠔養殖場 |
 |
| Bota Sare Restaurant & Oyster Bar |
 |
| 送既小食 |
除左馬里斯通，係一公里外有個大小小既鎮叫斯通 (Ston)。連接馬里斯通及斯通有一條五公里長既城牆。呢條長城係歐洲最長，亦係全世界第二長既城牆。我地由馬里斯通一人比左 KN70 行上城牆，本來正常係行去斯通，不過我地架車等左係馬里斯通，所以只係行左一陣就原路拆返，返去馬里斯通攞車走。
由馬里斯通去杜布羅夫尼克只係一個鐘車程。杜布羅夫尼克係克羅地亞熱門既旅遊城市，市內有個被城牆包圍，位於海邊既舊城區，區內不可行車，係遊客集中既地方。我地租住左一間係城牆東面入口附近既小小 apartment。房間不是太大，其實我唔覺得係 apartment，只係一間有個小小煮食角落既套房。
我地將行李放低後，就揸架出去 Hotel Rixos 既 Sixt 還車。Hotel Rixos 離舊城區大約 1.5 公里，我地還車後，慢慢沿海邊行返去舊城區，沿路可以欣賞下當地民居既建築。
 |
| 當地民居 |
我地由城牆西面入口 Pile Gate 行入城內，我地今晚訂左 7:30 去城內東面既 360 Dubrovnik 餐廳食晚餐，所以我地就直接係城內快快去由西面行去東面，城內面積唔係太大，我地由西行去東都只係 400 米左右，唔駛十分鐘就行完。
 |
| 西面城門 |
 |
| 舊城內 |
360 Dubrovnik 係一間米芝蓮一星餐廳，係克羅地亞摘到星既餐廳十隻手指都數得出，要搵一間我地會經過，而佢又有開門既，我都只係搵到呢間。360 Dubrovnik 位於舊城既城牆上，高高地觀望著舊港口，位置及景色都一流。我地 7:30 去到，天仲未黑，可以睇住杜布羅夫尼克由日轉夜既景色。
 |
| 網上搵既餐廳航拍照 |
我地叫左三道菜既餐，價錢係 KN640 一個餐。三道菜唔係真係只有頭盤、主菜及甜品，頭盤前會有餐前小食，麵包籃，係甜品後仲有 Petit four，都食得幾飽。頭盤叫左左鵝肝醬，個擺盤已經好靚，仲配件烤得好靚既多士。主菜叫左鴿肉，有驚喜，煮到皮香肉軟，好好食。個甜品有勁多不同食物係個碗入面，勁多不同口感同層次。呢間餐廳果然係米芝蓮摘星餐廳，環境、食物、服務全都水準之上，係非常值得光顧既餐廳。
 |
| 餐前小食 |
 |
| 麵包籃及兩款唔同口味既牛油 |
 |
| 鵝肝醬 |
 |
| 多士 |
 |
| 鴿肉 |
 |
| 牛柳 |
 |
| 甜品 |
 |
| 甜品 |
 |
| Petit four |
No comments:
Post a Comment