今日離開羅維尼 (Rovinj) 啦！一早 8:00 出發，離開前我地揸車到海邊，依依不捨地跟羅維尼道別！
我地今日既目的地係十六湖國家公園 (Plitvicka Jezera)，由羅維尼到十六湖國家公園要三個半小時車程，我地先會揸三小時到個叫羅斯托克 (Rastoke) 既小村食午餐，然後再揸半小時到十六湖國家公園。係開頭呢三個鐘既車程中段，架車既錶板突然出現 "Refill AdBlue"，咩黎架，我揸左十幾廿年車都未見過，咩係 AdBlue！我即刻搵個安全既位置停車，上網搵下係咩黎，原來油渣車定時要入 AdBlue，冇咩即時問題，但有某款車可能熄左車後，著唔返！我只要唔熄車揸到羅斯托克小村應該冇事既，但見到呢隻字係錶板總係好不安。
羅斯托克又名水車村，呢度以水車、瀑布及燒鱒魚聞名。我地泊好車，行入村前已經聽到流水聲。午餐既餐廳叫 Petro Rastoke，餐廳係村內較大的餐廳，建於河川上。今日天氣超好，我地坐係露天位置，睇住河流瀑布，超正既環境下食午餐。
我地每人叫左一條 1 Kg 既燒鱒魚，每條 KN180，係等緊既時候，我又打電話去 Sixt 問下架車既情況。佢叫我地渣架車去附近既 Sixt 分店睇下，我搵下我地最近既 Sixt 係 160 公里外既扎達爾 (Zadar) 市內，而我地玩完十六湖國家公園就會去扎達爾。咁算啦！希望架車呢兩日冇事，捱到去扎達爾。
講返個燒鱒魚午餐，除左燒鱒魚，仲可以加燒蔬菜伴碟，有甜椒及茄子等！個燒鱒魚好大條，好多肉，燒到剛剛好，唔會太乾。個燒蔬菜用好大隻既甜椒或茄子，所以仲有好多汁，好清甜！呢個地方同呢個餐廳真係極力推薦去十六湖國家公園既人一定要黎食個午餐！環境及食物都冇得頂！
我地 2:00 出發前往十六湖國家公園，半小時左右就去到。我地租左一間兩房既公寓住兩晚，公寓係公園二號入口再向南走既住宅區內，間屋離主公路幾遠，如果冇車就唔方便啦！公寓內部可以睇下面既相，裝修好新，有少少專登做一種 80 年代既感覺，大花牆身、大花窗簾及大吊燈。
十六湖國家公園分兩個區，上湖區及下湖區，上湖區有 12 個湖，下湖區有 4 個湖，加埋就係 16 個湖啦！十六湖國家公園內有非常多不同既大小瀑布，因為其特殊既自然景觀，於1979年列入聯合國教科文組織的世界自然遺產。我地本來打算今日先遊上湖區，明天遊下湖區。當我地買門票後，我問下個職員有咩介紹，佢同我講明天開始下湖區會關閉。好彩問一問，所以我地改為今日先遊下湖區。
十六湖國家公園兩天既門票係 KN160 一位。官方設定左七條遊園路線，適合不同程度既遊園人士。下湖區我地就選擇左行 B 路線，全長約 4000 公里，大約需時 4 小時。我地由二號入口出發，沿 B 路牌走，先坐船橫渡十六湖中最大既湖 (Kozjak)，跟住經過好多大大小小既瀑布，最後會去到公園內最大既瀑布 Great Waterfall。睇完 Great Waterfall 就行返上比較高既地方，原來係高處望返落去仲靚。上返去半山地區既馬路，我地可以坐小火車回到入口，完結呢個 B 路線。
 |
| 坐船橫渡 (Kozjak) |
 |
| 公園內最大既瀑布 Great Waterfall |
 |
| Great Waterfall |
今日第一日遊十六湖國家公園，因為天色唔係太好，所以影既相比較灰暗。但我地都感受到呢個瀑布天堂既特別之處。明天我地會遊上湖區，等我聽日遊埋上湖區就比較下上下湖區既分別。
晚餐我地去左公園既 Poljana 餐廳，佢好似宜家傢俬既餐廳咁，拎晒食物先去比錢。我叫左兩個湯、肉醬意粉、煎魚柳、薯仔沙律同蘋果批，一共 KN143。係園區內其實冇咩特別野好食，呢間食物正常，價錢又平，叫解決了今晚既晚餐。
No comments:
Post a Comment