201904 克羅地亞第七日 - 扎達爾 (Zadar)

今日會離開十六湖去扎達爾 (Zadar)，食完自家早餐就將行李放上車，一撻車，錶板仍然出現 "Refill AdBlue" 既警告，我要首先去扎達爾既 Sixt 租車公司搞返好佢先。由十六湖去到扎達爾要大約兩個鐘，我地大約 11:00 去到 Sixt。我本來以為可以換另一架車，但工作人員幫我加返 AdBlue，架車就冇左個警告。冇得換車，有少少失望！

扎達爾係沿海城市

Sixt 整車

扎達爾係克羅地亞第五大城市，不過我地只係集中參觀係古城牆內既舊城區。我地將架車泊左係舊城外既露天停車場。然後開始扎達爾半日遊。

我地由陸路城門 (Kopnena Vrata) 入古城，陸路城門係扎達爾其中一個地標，城門上既聖馬可石獅子雕刻就係威尼斯既標誌。原來城門係威尼斯建築師於十六世紀建造，見證當年被威尼斯統治既歷史。

陸路城門 (Kopnena Vrata) 

穿過陸路城門，右手邊就係五井廣場 (5 Well Square) 及船長塔 (Captain's Tower)，亦是當年由威尼斯人幫手興建既古蹟。

五井廣場 (5 Well Square) 

船長塔 (Captain's Tower)

古城內既景點好集中，有最高既聖多那教堂 (Crkva sv. Donata) , 教堂前既古羅馬城遺跡既羅馬廣場 (Roman Forum) ，最北面由海浪拍打產生既風聲產生音樂既海風琴 (Sea Organ)及晚上上演燈光表演既城市光廊 (The Greeting to the Sun)。不用兩小時就參觀完。

古城內市集

聖多那教堂 (Crkva sv. Donata)

午餐食包

海風琴

城市光廊

顏色醒目既燈塔

城內有一間著名雪糕店 (Donat Ice Cream)，我地因為時間多，所以可以坐低食雪糕及飲咖啡。

Donat Ice Cream 雪糕店

仲有時間，我地就上左去聖多那教堂既高塔，鳥瞰札達爾市區。

玩到下午 5:00 左右，我地返去停車場攞車，然後揸去位於古城外既 Apartment Luky。呢間 Apartment 位於扎達爾西北面既住宅區，係一間四層既民宿。我地預訂住一間兩房 Apartment，屋主留左最好既單位比我地，有廳，開放式廚房，兩間睡房及一個大露台。不過呢個單位係四樓，要行樓梯上去。我地大大件行李，實在太大挑戰。所以我就係架車旁開喼，拎要用既衫褲及日用品上去就算。

休息左一陣，我地又揸車返去舊城區，今次泊左架車係城牆旁既街錶位。我地見幻象博物館(Muzej iluzija ) 仲未關門，比左 KN60 入場費入去玩下。

幻象博物館 (Muzej iluzija)

黃昏時候，我地行左去海邊睇日落，都幾多人同我地一樣尊登黎睇。呢度個日落係直接落入水平線。 

晚餐去左係 Tripdvisor 評價幾好既 OX - Meet and Eat 餐廳，呢間餐廳係出名食牛扒。餐廳安排我地坐戶外位置，入夜後既扎達爾都幾凍。我地叫左個魚湯，牛肉湯，烤海鮮盤及牛扒。全部食物都好好食，個牛扒好出色，算係克羅地亞咁多日內，牛扒最好食既一間。

食完飯，天黑晒，就係去城市光廊睇燈光表演既時候。燈光係漆黑中不斷變化，都幾特別，我睇返相及影片，都捕捉唔到現場既感覺，所以去扎達爾既朋友，一定要黎感受一下。