今早係酒店食早餐後，08:15 退房，然後向大洗方向出發。首先我地係去國營常陸海濱公園，入場費 ¥450。國營常陸海濱公園係一個賞花既地方，一年四季都有唔同既花，冬天有梅花及冰鬱金香，春天有粉碟花及鬱金香，秋天有紅色既掃帚草，而我地而家夏天就有未變紅既掃帚草。
 |
| 國營常陸海濱公園 |
國營常陸海濱公園最多人既時候係粉碟花及紅色掃帚草既花期，園內既見晴之丘會非常多人，你想影一張少人少少既相都好難。我地而家呢個時候去，成個公園都冇咩人，我估二十個人都冇，所以你見我既相都係冇人既。不過影靚相係有代價既，我地由公園入口行去見晴之丘，大約二十分鐘路程，全程冇遮擋，太陽直射落黎，真係好熱，好熱！
國營常陸海濱公園附近有個地瓜乾神社，神社最出名係金色鳥居。點解佢係金色，因為佢跟返番薯乾既金黃色。呢個神社係勁細，我地有車先順道過黎影張相，冇車我就唔建議黎啦！
 |
| 地瓜乾神社 |
午餐我地去那珂湊魚市場內非常出名既市場寿し食回轉壽司。一去到，有成二三十人排緊隊，我地係排隊本簿寫左名跟隊先，然後去行下個魚市場。魚市場內有另一條隊，原來係排即開即食生蠔，細隻少少既宮城縣養殖生蠔 ¥500 兩隻。茨城縣野生大大隻既就 ¥700 一隻。我地兩種都有買，先食養殖生蠔，好鮮味，再食野生，成個太平洋食左入個口，好好味！
返去回轉壽司，呢間回轉壽司價錢平，質數中間偏上少少啦！呢個價錢合格啦！佢最精彩係原隻大蝦壽司。不過我一坐底食左一碟，之後想再食，佢都冇再出過。所以一見到應該要即搶。
 |
| 原隻大蝦壽司 |
係大洗有一間叫 Potato labo 既番薯專門店。我地夏天去到冇熱既烤番著，但有夏天限定既冰番薯。我地買左黎試，估唔到佢既番薯凍既都勁甜，真係幾好食喎。
 |
| 冰番薯 |
 |
| 冰番薯 |
大洗最著名既景點係大洗磯前神社既神磯之鳥居，大洗磯前神社面向太平洋，神磯之鳥居就位於海上岩礁上，日出時，陽光會穿過鳥居，所以係非常著名景觀。我地明天早上會黎睇日出，所以而家先行探路，睇下邊度可以停車，點行去鳥居，邊個位影相最好。停車可以停大洗公園駐車場，跟住沿海邊行去「大洗酒店ANNEX」就係最住位置。
 |
| 神磯之鳥居 |
今晚我地住係剛剛早幾日新開既「亀の井ホテル 大洗」酒店，酒店非常近大洗磯前神社，只係幾分鐘車程，方便我地明天早上去睇日出。酒店係溫泉旅館，一泊二食。我地太早去到酒店， 預約左 7:00 先食晚飯，見有時間，我地揸車去左 AEON Town 水戶南行下。AEON Town 水戶南有超級市場、Daiso、西松屋等。
 |
| AEON Town 水戶南 |
準時 7:00 前返到酒店食晚餐，我地因為 Agoda 訂房，所以冇得選菜單，只係跟最基本既餐。如果係 Jalan 定就可以選擇唔同既菜單。晚餐有刺身、陶板燒蠔、雞豬肉火鍋、鯛魚茶漬飯等。可能因為係基本餐，份量唔算太多，食完唔係好飽。好彩剛剛係 AENO Town 買左西瓜，今晚可以浸完溫泉食。
 |
| 酒店晚餐 |
 |
| 日本西瓜 |
No comments:
Post a Comment