Joseph@外地遊記: 201503 台灣東部第二日

2015/03/29

201503 台灣東部第二日 - 宜蘭，礁溪溫泉

今日正式租車向台灣東部進發。一早於酒店食完自助早餐就坐的士去和運忠孝站租車，辦理租車手續都搞左超過半個鐘。今次租既 Toyota Camry Hybrid 車尾箱比想像中大，三個大行李加一個細行李都冇問題。

和運租車

呢架就係我地架 Toyota Camry Hybrid

首先開車去宜蘭縣頭城鎮的金車頭城城堡咖啡館，經過蘭陽博物館後，見到左手邊接天宮紅色牌樓，便沿山路駛上山頂。城堡是仿歐洲建築物，似迪士尼的假城堡。因位處山上，眺望太平洋，藍天白雲及蔚藍的海洋，風景非常優美。來到咖啡館，我地當然試試金車的伯朗咖啡，以前我以為伯朗咖啡係外國野，今日先知原來係台灣品牌。

城堡咖啡館

城堡內的景觀

個泡芙都好好食

嘆返杯伯朗咖啡

仲有風車

另一庭城堡咖啡館

落山後，我地駛去蘭陽博物館，蘭陽博物館建於濕地上，外型獨特，為了本著「與環境共生」、「與自然融合」的核心精神，博物館旁保留了一大片完整的濕地生態公園。入到蘭陽博物館，唔知裡面有咩野睇，小冊子介紹裡面，好似比細路仔睇既野多，唔係太吸引，所以冇入去參觀，只係外面影下相。

蘭陽博物館

蘭陽博物館內

蘭陽博物館旁邊就係烏石港，我地入左一間「烏石港活海鮮」食午餐。點菜要去點餐區，所有食材放左眼前，你要食咩、點樣煮就直接同侍應講。我地點左六道菜，有生魚片、蝦、蠔仔湯、花枝丸、吊筒及炒菜。蝦、花枝丸及吊筒超好味。

烏石港活海鮮

點菜的地方

魚生片、吊筒

花枝丸，好好味架！

由烏石港開車到宜蘭設治紀念館，宜蘭設治紀念館是以前縣長的官邸，建於1906年，和洋式混合建築風格，庭園則是全日式景觀。去到紀念館範圍，庭園的山水景、屋內的榻榻米及木格窗門，真係好似去左日本咁。

宜蘭設治紀念館

於宜蘭火車站外就是「幾米廣場」，廣場內把幾米的繪本作品轉成真實場景。雖然我唔係幾米 Fans，但我都識條「向左走向右走」(唔係高登用語)！

幾米廣場

呢個向左走

宜蘭火車站

5:00 由幾米廣場離開，開車去礁溪溫泉。中途見有時間，去左一間叫「四圍堡車站」的咖啡店，此咖啡店模仿哈利波特風格，一入去好似係魔法村的小巷，最入的用餐區就好似魔法學校的食堂。我地四個咩野都冇幫襯，只係入去睇一圈，影下相就走！

四圍堡車站

都好似哈利波特的魔法村小巷

魔法學校食堂

今晚我地入住礁溪溫泉新開的「捷絲旅 Just Sleep 宜蘭礁溪館」，整間旅館走無印良品的簡約路線。我們入住的是「沛日式客房」，房間地方不大，但有一個私人溫泉池。不過最奇怪係個花灑冇凍水，熱到跳舞，最後我只好用個小木桶攞溫泉池水沖涼，沖得好唔爽！

捷絲旅 Just Sleep 宜蘭礁溪館

接待處好有型

牆身舖上榻榻米，好香

大堂一旁的休息地方

我間房，有私人溫泉

房內的洗手間

放杯的地方都好有型

公眾露天大浴池，要穿泳衣

男裸湯

晚餐走去旅館附近的一家「添喜海鮮小吃部」，網上不少好評，說是平價又好味的小店。添喜海鮮小吃部樣子非常平實 (即係冇裝修)，點菜跟下午的「烏石港活海鮮」一樣，走去放滿食材的點餐區點。我地點左一條蒸魚、臭豆腐、炒溫泉空心菜、糕渣、角蝦及一個湯。今次應該係我第一次食角蝦，肉質鮮甜，好好味！臭豆腐及糕渣都幾特別，一試無仿。呢一餐四個人一共食左 TWD$1370，又真係好抵食喎！