201503 台灣東部第三日 - 宜蘭，羅東

早上浸一浸溫泉，然後去酒店餐廳食早餐，早餐種類都幾多，有麵包及台式清粥等。大約 10:00 搬埋行李上車出發去蔥仔寮體驗農場玩。

礁溪溫泉

Just Sleep 的早餐

宜蘭的三星蔥非常出名，我地去蔥仔寮體驗農場參加了一個 DIY 活動，活動包括蔥田導覽、摘蔥、洗蔥及自製蔥油餅，每位 TWD$150。一開始有位姨姨介紹三星蔥點解咁出名，然後大家戴上草帽，出發去蔥田摘蔥，我地唔會帶新鮮蔥走，所以只係體驗一下，每人試摘一枚蔥。大家帶住剛摘既蔥去水池洗下佢，姨姨會教我地洗蔥既技巧。最後我地走去另一場地整蔥油餅，其實個麵團同蔥粒都一好預備好，我地只係搓平個麵團，放蔥粒，再捲好個餅，跟住就拎去比另一個姨姨幫我地煎。煎好既蔥油餅熱辣辣，裡面蔥粒仍好新鮮，好多水份，好香，三星蔥果然名不虛傳！當我想買枝汽水飲時，小賣店個姨姨推介我試金車黑麥汁，又真係幾好飲，又比汽水健康！

姨姨先介紹三星蔥

落田摘蔥

洗蔥

整蔥油餅

另一位姨姨煎蔥油餅

田邊食蔥油餅

好好飲既黑麥汁

12:40 開車去金車威士忌酒廠，金車威士忌KAVALAN 剛剛奪得全球最佳單一麥芽威士忌 (World's Best Single Malt Whisky)，所以我地專登黎睇下。酒廠佔地很大，參觀是免費的。我地本來想參加導覽團，不過今日太少人，所以冇導覽團。我地可以自己走入酒廠參觀，睇下釀酒的工具、過程及木桶儲存區。參觀完酒廠就可到旁邊的酒堡，酒堡有試酒區，賣酒的販賣部及咖啡館。我地試完酒，然後就買了幾支得獎威士忌帶返香港！

金車威士忌廠的會議中心

蒸餾廠門口

釀酒工具

木桶儲存區

有威士忌味雪糕

KAVALAN 出好多不同既威士忌

品酒

今年攞獎既 Solist 威士忌

下一個目的地就係羅東林業文化園區，泊好車見開始肚餓，係停車場對面有一間傳統小店叫「林場肉焿」，附近一帶最旺場係呢間，所以我地入去試一試。店內只賣肉焿，有肉焿麵、肉焿米粉、肉焿粿及肉焿飯。我叫左碗肉焿米粉，好唔好味？我地香港人平時好少食肉焿，都唔知咩係好味既肉焿，咩係唔好味既肉焿，總之放入口，感覺唔太差啦！對肉焿，我地真係識條鐵咩！

林場肉焿

羅東林業文化園區昔日是太平山林場製木材、儲木及辦公的地方，佔地16公頃。現在保存了以往日式建築物、儲木場、儲木池、運木材的蒸汽火車、森林鐵路及竹林車站。遊客可在這鬧市中的綠州，悠悠地感受當年羅東輝煌的林業景象。

羅東林業文化園區入口

儲木的地方，好多大大條既木

環湖木棧道

儲木池

森林鐵路

運木材的火車

另一架載客火車

28/3 至 17/5 剛好有個宜蘭綠色博覽會的活動於武荖坑風景區舉行，好似有好多花花草草睇。我地 5:00 去到門口，準備入場，但門口保安話 6:00 關門，5:00 開始停止入場，所以唔比我地入！白白走了一轉過黎！

宜蘭綠色博覽會門口

今晚我地住羅東市山水商務飯店，開車去到酒店門口，一見個樣唔對路，都幾殘舊。入到大堂，感覺好似十年前去台北住麒麟大飯店既格局。我記得上網訂房時，張相唔差架喎，網上仲話係 SPA 飯店！死啦！中伏！成間酒店仲有當年麒麟大飯店果陣霉舊味。冇辦法下照上房啦！都係捱一晚啫！(大家去佢網頁睇下房相，睇相真係唔差架！)

羅東市山水商務飯店

我地住既房

因為唔想逗留係呢間酒店，所以一放低行李就去食飯。今晚我地去宜蘭出名既渡小月餐廳，此渡小月不同台北食擔擔麵的度小月，此渡小月是辦過國宴、有五十年以上歷史的中式台菜餐廳。點菜又係去放滿食材的點菜區，但今次完全冇價錢，因為餐廳會跟據人數預份量。

渡小月餐廳

點菜的地方

我地今次點了風味西魯肉、油條珍珠蚵、鮮蝦鱈花魚、蘭陽酥糕渣、及炒 A 菜。風味西魯肉是一個湯羹，裡面有好多不同材料，如豬肉、菇、白菜及芋頭，材料足，又香濃，好味！油條珍珠蚵以油條包住蝦膠，再跟蠔仔一齊炒，油條的脆脆口感跟蝦膠的爽滑又好匹配。鮮蝦鱈花魚就是以鱈魚肉包鮮蝦，我地每人以一隻元寶型的碗放上一件，賣相已經100 分。蘭陽酥糕渣，糕渣是蘭陽地道美食，可能我地唔慣，口感怪怪的，但黎到宜蘭，點都要試下。最後甜品係杏仁豆腐，大家唔好以為好普通，呢個杏仁豆腐好特別，因為豆腐不是平是軟滑的豆腐，而是帶有煙韌口感及香濃的杏仁味，真係要比個讚。去宜蘭，大家真係要去試一試渡小月餐廳，平時係香港跟本食唔到呢種手工傳統台菜。我地四個食到好滿足，一共只係食左 TWD$1230，完全唔貴！

炒 A 菜 、蘭陽酥糕渣、油條珍珠蚵、風味西魯肉

鮮蝦鱈花魚及杏仁豆腐

晚上我地去左羅東觀光夜市，因為係渡小月餐廳食得好飽，所以係夜市都係食唔到野，只係行左一陣，買左杯愛玉冰飲。

羅東觀光夜市

羅東觀光夜市

去完夜市就要返酒店，一聽見要返酒店就好失落。返到酒店，快快去沖涼，然後瞓覺。去到浴室，有個有黑色漬既浴缸，浴缸上面有部殘舊既機器，好似吹手機，但有條喉，可以駁去一個吹氣墊，我估係開一缸水，放個墊落浴缸，開左部機，個墊會有氣泡出，所以呢間酒店自稱為 SPA 酒店。喂！我見到你個有漬既浴缸已經唔敢浸浴啦！而部機舊到開唔開得著都成問題，如果開得著，我驚放落水電死我！本來我對羅東既感覺都幾好，就係呢間酒店令我對羅東有少少負面評價。其實去旅行住間靚靚酒店真係令你比較開心，對個地方既回憶都好好多！今次真係中伏！