Joseph@外地遊記: 201503 台灣東部第一日

三月頭，綿羊先生打電話問我月尾去唔去台灣？我其實都唔打算去，因為剛剛一月尾去完韓國，黎緊六月又會去日本。不過都好八卦上 Expedia 網睇下三月尾去台灣幾錢機票，香港航空連稅八百幾蚊一張飛，咁平！搞到我忍唔住應承左綿羊先生一齊去。我地打算 28/3 出發 1/4 返香港，玩五日。夜晚返屋企正想訂機票，價錢加到成千蚊一張，我同綿羊先生講唔急既，等幾日再試，因為香港航空時常失驚無神做特價。

Hong Kong Airline 去台北

第二晚放工返到屋企，上網又睇下價錢，價錢都係成千蚊。當晚綿羊先生突然打電話比我，佢話搵到 $851 一張機票，我因為好眼瞓，我同綿羊先生講：「咁你買啦！」然後就上床瞓啦！第二朝早，返到公司，綿羊先生打電話比我，佢話佢整錯野！我問佢係唔係買錯機票？佢話係！佢買左 28/3 出發，4/4 返，一共去八日。唔買都買左啦，唯有請多日假啦！

八日台灣都幾頭痕，左諗右諗，決定 Hea 玩宜蘭、花蓮及台東。編排行程及訂酒店都花左唔少時間。出發前一個星期，上和運網頁租 Toyota Wish，外國人租車要落租車要求，再等佢地覆。我等左兩日見佢未覆，我經網頁意見欄再問，終於有位張先生覆，佢反問我係唔係會員，我答佢我係外國人，唔可以成為會員。又過一日，佢又唔覆，我再係意見欄問，張先生再覆我，今次問我那家門市預約，我覆佢忠考店，跟住佢就再冇覆我。出發前兩日，仲未有聲氣，我再係意見欄問，第二日 (即出發前一日)，忠考店終於覆我話冇車。我心中罵出一大堆粗口！我嘗試去問艾維士、台灣 AVIS、香港 AVIS、小馬租車及維格，除左維格，間間都話冇車，維格就直情冇覆過。聽日就要出發，冇車真係好大鑊，搞亂晒成個行程。我電郵去和運忠考店，我話佢地太遲覆，之前位張先生又唔係幫我跟進預約，而家搞到我行程亂晒，都唔知點算。和運忠考店今次好快覆我話比少少時間佢，佢會幫我再搵其他車。大約一個鐘後，佢覆我話搵到一架 Toyota Camry Hybrid，去到呢刻，你比咩車我都要啦！

出發當日，坐早上 9:05 飛機，零晨五點起身，坐巴士去機場。去到機場唔見綿羊先生，打電話比佢，佢叫我地 check-in 先，然後係貴賓室等，我估佢應該遲左好多出門口，有排先到。去到貴賓室食住野等，佢地差不多遲左成個鐘先到，不過遲有遲好，因為機位 overbook，航空公司居然 upgrade 佢地兩公婆去商務客位，真係早起鳥兒反而冇蟲吃！

去到台北機場係早上 10:40，過海關後先去櫃員機提款，我提了 TWD$20000，銀行計埋手續費扣左 HK$4989.83，匯率 4.0082。當日百年匯率 3.938，台灣機場銀行 3.881。所以最好係用提款機，然後百年，最後係台灣機場銀行。有錢後就去大哥大櫃檯買上網 simcard，TWD$500 一張 3G 七日無限上網，雖然不是 4G，但速度都好快。

桃園機場

大哥大 3G 電話卡價錢表

我地先坐的士去城市商旅南東館寄存行李，然後行去松山文創園區，睇地圖好似幾近，但都行左二十分鐘。松山文創園區前身為「台灣省菸酒公賣局松山菸廠」，煙廠於 1998 年停止生產，舊址經綠化後景觀優美，2010年正式轉型為藝術文化展覽場地。而台灣文化代表「誠品」更於園區內開設了自家品牌的酒店。

城市商旅南東館

松山文創園區的誠品行旅

松山文創園區內一間咖啡店

去到松山文創園區，第一件事係去春水堂食午餐，春水堂源於台中，是珍珠奶茶的始祖，除左出名的珍珠奶茶，春水堂的台式簡餐都非常出色。

春水堂食午餐

珍珠奶茶

春水堂

食飽後，我地四個就去舊煙廠行下，欣賞古舊建築及有少少歐洲風格的中庭花園。大約 4:00 左右就坐捷運去淡水睇日落。

松山菸廠的庭園

松山菸廠

由台北市坐捷運去淡水，車程都差不多一個鐘。今朝因為大家都好早起身，其實非常累。上到捷運，一有位坐底，好快就瞓著左！

本來綿羊先生打算去漁人碼頭，我上次去過，碼頭得條橋，咩野都冇，我建議不如去行下淡水老街先，差不多日落時才坐車去漁人碼頭。我地沿公明街，中正路行，然後再轉出海旁。海旁有個新既大草地，好多人係度放風爭、踏單車、坐草地，係呢度睇日落未仲好過去漁人碼頭！所以我地最後係冇去漁人碼頭。

淡水老街

淡水海旁草地

睇日落

去到淡水更要幫襯阿媽的酸梅湯

又坐成個鐘捷運返去台北市，又可以瞓一陣。我地去到中山站，然後去出名既肥前屋食鰻魚飯，去到肥前屋門口，廿幾三十人排緊隊。唔想等，去左附近間京都屋，都係食鰻魚飯。鰻魚飯賣相都好靚，香味撲面而來，試一試件鰻魚，好普通，油唔多，唔夠肥美。可能之前去過九州柳川食「元祖本吉屋本店」的鰻魚飯，好難再搵到更好既鰻魚飯。好後悔！早知去鼎泰豐食小籠包好過！

肥前屋排大隊

轉去京都屋

京都屋的鰻魚飯

京都屋內

我地坐的士去台北車站預先買定四月四日由台東回台北的火車票，綿羊太太就會四月一日自己由花蓮回台北，再坐飛機先回港。

老婆次次去台北都要去西門町的猴子物語買公仔，所以我地坐的士去一去西門町，不過原來猴子物語已經結業了。

人來人往的西門町

鴨肉扁新裝修

我地得一日係台北，所以幾累都要去一去夜市，我地由西門町坐的士去饒河街觀光夜市，行左一陣，食左芋圓冰，跟住就行返城市商旅南東館。由饒河街觀光夜市行去酒店大約只係四分鐘，好近。

饒河街觀光夜市

芋圓冰

城市商旅南東館位於十字路口，門口車水馬龍，但一推開酒店大門入內，完全是另一世界，時尚寧靜的大堂，超高天花板，感覺好舒服。我地訂左兩間豪華雙人客房，房間面積有 33 平方米，加上挑高的樓底，空間非常寬裕。浴室有淋浴及浴缸，馬桶電動廁板，最驚訝是浴室跟臥室中間的玻璃，一按電掣就會變成不透明。城市商旅南東館的唯一缺點係交通唔方便，離捷運站好遠，出入都要坐的士，不過我地四個人剛好一架的士就問題不大。