Joseph@外地遊記: 201503 台灣東部第四日

今早 8:00 去酒店大堂食早餐，真係酒店大堂呀！佢係大堂即時擺膠檯椅，旁邊放食物，就變成食早餐既地方！都係快快食完快快走啦！

酒店大堂食早餐

今日會去太魯閣國家公園行山，先由宜蘭開車去太魯閣遊客中心，車程要三小時。本來由綿羊先生開車，一去到蘇花公路就轉為我開。蘇花公路是連接花蓮及北部的唯一道路，大部分臨海鑿岩闢建，路線多急彎及陡坡。最攞命係成條路都好多大型泥頭車。有時過窄彎，對面線既泥頭車都過晒中線。你想慢慢揸，我覺得係冇可能，因為成條路都係車，你一慢就塞住後面既車。揸呢條路真係要膽大心細，最緊要唔好驚。我覺得蘇花公路都算難揸既一條路。

蘇花公路

途中停一停清水斷崖，但太多樹木，咩野都睇唔到

大清水？

去到太魯閣遊客中心已經 11:30。係遊客中心睇左一陣，就去遊客中心內一間餐廳食午餐。咁早食午餐係因為一陣行山時就唔會再有餐廳食野。

太魯閣遊客中心

遊客中心前有一大片草地

午餐

遊客中心有雪條賣，又靚又好味

今日打算去行白楊步道，我地先由遊客中心開車向山區前進，沿東西橫貫公路駛去天祥。整條公路都是於峽谷開鑿，我地駛經不少山洞及崖壁，當年興建東西橫貫公路的工程真係好厲害！

東西橫貫公路

斷崖鑿出黎既路

將車停泊於天祥，然後沿馬路上山，行大約二十分鐘就會去到白楊步道入口。白楊步道係一條容易行既山路，好少上落斜，來回需時大約兩小時。白楊步道本來是興建發電廠的施工道路，後來因保育而擱置計畫，這條施工道路就成了大家欣賞峽谷溪流景觀的白楊步道。

天祥遊客服務站

附近好多馬騮

白楊步道入口

白楊步道地圖

行白楊步道大家要準備雨衣及電筒，因為全條白楊步道有七條漆黑一片的鐘乳隧道，而最終目的地就是水濂洞，洞內的水由洞頂傾洩而下，大家一定全身濕透。

開始行白楊步道

沿河谷行

好多隧道

隧道內的鐘乳

吊橋去睇白楊瀑布

白楊瀑布

下面水流仲勁過白楊瀑布

水濂洞入口

水濂洞內，左邊有條河，我地沿右邊行

好多水由洞頂流落黎

好難先影到相

挑戰成功

由白楊步道回到天祥已經下午 4:15 ，上車沿山路駛落山，中途於慈母橋停車影張相 (最近因為香港發生既事，對慈母呢個字好反感)。本來想去燕子口及長春祠睇下，但去到燕子口開始落雨，所以算把啦！直接駛去花蓮！一離開太魯閣就見到東西橫貫公路的路牌，呢個牌落幾大雨都要落車影啦！

慈母橋

呢段路都係崖邊鑿出黎

東西橫貫公路的路牌

2012 年係另一邊谷關影既東西橫貫公路的路牌，集齊一套，有冇獎換？

東西橫貫公路石碑

大約開四十分鐘車就去到花蓮的璞拉漫民宿，去到花蓮又變返好好天。璞拉漫民宿由周先生及太太經營，全間民宿走中東風格，一入去到好舒服及親切的感覺。璞拉漫共有四種房型，分別是璞拉漫、亞瑪、Yoga及舒活。我今次入住亞瑪雙人房。房間位於三樓，好彩璞拉漫有電梯。亞瑪雙人房面積都幾大，房內有張小梳化，傢俬以原木為主。浴室面積亦很大，有浴缸，非常清潔。我每一晚都浸一浸暖水浴，舒緩一下！

璞拉漫民宿

民宿內

我的房

床頭燈都好靚

好大既浴室

今晚打算到專食曼波魚的三國一休閒餐廳，開車到去餐廳附近，轉左幾圈都搵唔到，停埋一邊上網查下，原來已經結業。打電話比民宿周太太有冇另一間食曼波魚餐廳，佢介紹去竹陽海鮮餐廳。竹陽海鮮餐廳裝修簡樸 (都係冇咩裝修！)。我地點了曼波魚湯、炒曼波魚、雞、蒸魚及炒菜。曼波魚入口煙韌，唔似平時魚肉，好得意，去到花蓮，大家要試一試。今餐我地四人一共食了 TWD$2200，比昨晚渡小月貴 TWD$1000，我覺得渡小月比較好食！